Read Uab Meto YOSUA 9 Bible Online

YOSUA 9 - Uab Meto bible

YOSUA 9

¹Han beno antom ale lasi mnisat Israel nane anao antia ale kesel anbi Noe Yordan aon neno tesan — anbi nuaf, ma anbi nonof, ma anbi mnela Tasi Tnana ninen talantia Tubu Libanon anbi bian a'li; esle' kesel Het, Amori, Kanaan, Feris, Hewi ma Yebus.

²Ale kesel sin le nane sin nabuan ma nafek he sin bua'-bua' sin anmaken nok Nai Yosua ma to Israel.

³Mes atoni-atoni Gibeon na'ko uf Hewi sin a'nen nalali sa' le Nai Yosua anmo'e neu Yerikho ma Ai.

⁴Oke te sin nafek he na mo'e Nai Yosua nok lasi moel sin nasaeba neu sin bikase luke mnanu: ale kalo-kalo mna, ale bale tua mina mtasa mna le anmo'e na'ko pasu. Ma on bukae, sin nabalab utunu' le anmeto ma an'aba nasu.

⁵Sin anpake bale pake le natpisu ma peni haef amna ma malape.

⁶Nok mo'et onane sin anao natef nok Nai Yosua anbi um-ume anbi Gilgal ma nak neu in ma neu atoni-atoni Israel nak, “Hai aim mi'ko pah a'lo, hai aim he mo'e lasi manba'an mok hai Usi ki.”

⁷Mes atoni-atoni Israel sin natae nak, “Neu sa' hai he mo'e lasi manba'an mok ki ka? Oni hi pah anhaumak esle' i ka!

⁸Mes sin natae nak, “Haim lomi he mepu sa' le Usi ho muplenat neu kai.” “Hi sekau ki ka? Ma hi mi'ko pah me?” Nai Yosua in natoti sin onane:

⁹Sin natae nak, “Hai aim mi'ko pah le a'lo le'uf kun, Usi, natuin hai mnen neu UISNENO le hai Usi ki hi miluli ma mibes neu In. Hai mnen neu ale sa' le In anmo'e anbi Mesir,

¹⁰ma neu sa' le In anmo'e neu kesel nua en Amori anbi Yordan aon neno saen, es Nai Sihon kesel Hesybon ma Nai Og kesel Basan le natua anbi Asytarot.

¹¹Ale hai nakaf sin ma tuafen anbi hai pah anlenu kai mibalab bukae he aim meu i mitef mok hai Usi ki, ma miton mak hai mina'tom neu hai Usi ki. Es nane te, haim toti hai Usi ki hi nek alekot, he nati' hi mo'e lasi manba'an mok kai.

¹²Hai Usi ki neu him kiso mit, utunu' hai bukae i. Leka hai amfen aim, utunu' i fe maputu. Mes tabu i, him kiso nai! Utunu' i anmeto ma an aba'nasu nalali.

¹³Ma tua mina mtasa in bale nane fe fe'u leka hai mitua sin; mes tabu le i, him kiso nai! Natpisu nani ok-oke. Hai blua pake ma hai peni haef amsa namle'u natuin lanan a'lo le'uf kun.”

¹⁴Oke te atoni-atoni Israel sin ansimo mnahat akle'o na'ko atoni-atoni Gibeon nane, ma sin ka natoti anteni fa UISNENO neu lasi nane.

¹⁵Ma Nai Yosua anmo'e lasi manba'an lasi halan nok atoni-atoni Gibeon nane, ma anmanba'an neu of ka namate fa sin. Ale nakaf to Israel amsa, sin ansup neu of nanokab sin lasi manba'an nane.

¹⁶Mes natonon, anbi neno tenu namuni na'ko lasi manba'an le sin anmo'e nalali nane, atoni Israel sin nasik nani kot Gibeon, Kefira, Beerot, ma Kiryat-Yearim pah atoni-atoni nane. Oke te fe na sin nahin neu atoni Gibeon nane sin bale le sin natua anbine ka na'lo fa na'ko Gilgal.

¹⁸Mes atoni Israel ka namate fa sin, natuin to Israel sin anakaf sin ansup nalali neu sin anbi UISNENO Israel In kanan. To Israel ok-oke sin neku nisin neu sin anakaf sin natuin lasi nane.

¹⁹Mes sin anakaf sin natae nak, “Neu het mo'e onme! Natuin haim sup milali mok sin anbi UISNENO Israel In kanan. Es nane te ka nabe'i fa hit atmo'e amle'ut neu sin.

²⁰Ka nabe'i fa hit tamate sin natuin hit atsup talali; ma leka hit at tanhai hit lasi supat nane Uisneno of ankas kit.

²¹Es nane te, tafetin sin he sin anmoni, mes hit ok-ke atmo'e sin anfani apolo hau ma aloi oe neu kit ok-oke.” Onle nane ale anakaf anlek lasi nane neu sin.

²²Oke te sin no'en atoni-atoni Gibeon nane sin nem neu Nai Yosua. Nai Yosua nak neu sin nak, “Nansa' mi'mo'e kai ma hi mak hi pah nane a'lo le'uf kun, mes in anhaumak esle' i?

²³Natuin hi mo'e onane, Uisneno ankas ki. Hi nonot nane of anfani ate piut, apolo hau ma aloi oe neu au Uisneno In Ume.”

²⁴Sin natae nak, “Hai mo'e onane natuin hai amnen nak UISNENO le Usi ho mululi ma mubes neune anlenu nalali Nai Musa, In ate nane, hen fe neu ko Usi ale pah i ma mumate ale tuafen anbi tabu Usi ho maiti pah nane. Hai mimtau anae le'uf kaisa-kaisa ho mumate kai, es nane te hai mo'e ale lasi i.

²⁵Tabu le i hai es kai Usi ho nimam nanan. Amtao ma mo'e kai natuin sa' alekot le Usi hom lomi.”

²⁶Es nane te Nai Yosua in anmo'e lasi i: In naneo ma nahafo atoni-atoni nane ma ka nafetin fa atoni Israel he namate sin.

²⁷Mes anmo'e sin anfani ate — esle' apolo hau ma aloi oe neu atoni Israel ma neu baki tulu UISNENO. Talantia neno i sin fe nanaoba mepu nane anbi bale le UISNENO anbeti anfani bale luli besa neu In.