Read Uab Meto 2 TESALONIKA 3 Bible Online

2 TESALONIKA 3 - Uab Meto bible

2 TESALONIKA 3

¹Oke te, bae benu alki, him onen toti neu kai, he nati' beno na'ko Uisneno nasitbon labah ma masimo nok alekot, onle afi anbol nalali neu ki.

²Him onen toti amsa he nati' Uisneno namonib kai na'ko atoni amaufinut ma atoni amoe lasi amle'ut. Fun ale atoni ok-oke kan nafnek fa neu beno na'ko Uisneno nane.

³Mes Uisneno aki'at kun. In of anhatani hi nekam ma anpao ki na'ko amle'ut in tuaf.

⁴Ma haim nafnek neu hit Usi, fun hi mo'e sa' le haim ba'an milali ki ma of hi mo'e piut.

⁵So Usif tunan antopu hi nekam talan te hi mihin manekan Uisneno ma nek sutais le Neno Anan anfe ki.

⁶Bae benu alki, nok kuasat Usif Yesus Neno Anan, hai miplenat ki he nati' hi mi'lo mi'ko ale atoni apehet, ma le ka natuin fa lasi noina le haim fe milali neu ki.

⁷Fun hi mihin hi mes mituin hai heta onme, natuin hi beno hai mok ki hai kam pehef.

⁸Ma hai kam bukae fa es ini mnahat lum-luman. Hai mepu fai manas nok haet ma puse he nati' kais amhafen es anbi ki.

⁹Ka natuin fa hai ka mu'if hak hem toti he nati' him tuntaku kai; mes natuin haim lomi hem fani heta neu ki.

¹⁰Fun afi fe hai mok ki, hai mimnauba ki lasi i mak, “Atoni le kan mepuf, kais amfene he nah.”

¹¹Hai mimolok lasi i, fun haim nen nak anmu'i atoni anbi ki le anmoni nok pehe. Sin an tam nok atoni bian sin lasi, ma kan mu'if mepu mese le sin anmo'e.

¹²Nok kuasat Usif Yesus Neno Anan, hai miplenat ale atoni nane ma mimnauba ki, he nati' sin mepu nok alekot ma nami mnahat neu sin aon.

¹³Mes neu hi, bae benu alki, kais hi misnasan mo'et alekot.

¹⁴Oni anmu'i atoni le kan lomif he natuin sa' le hai mi'uab mani anbi sulat i, hi mitaka in human, ma kais mimnono mokan, he nati' in anmae.

¹⁵Kais him kiso in on musu, mes amfainek mani on hi bae.

¹⁶Usif tunan nane uf neu hit lasi honis. So In anfe halan nekaf piut neu ki anbi ale lasi. So Usif tunan nok ki alki.

¹⁷Han seon na'ko kau, Nai Paulus. Han seon i au tui kuk eik au nimak. I taka anbi ale au sulat sin.

¹⁸So hit Usif Yesus Neno Anan anfe tetus neu ki alki. Na'ko hai teun kai, Nai Paulus, Nai Silwanus ma Nai Timotius