Read Uab Meto 1 TIMOTIUS 1 Bible Online

1 TIMOTIUS 1 - Uab Meto bible

1 TIMOTIUS 1

¹Neu au anah Nai Timotius! Ho au anah natuin palsait neu Neno Anan, Sulat i au tui on haef knino Neno Anan Yesus. Au fani haef knino natuin plenat Uisneno, hit Afetin ma natuin plenat Neno Anan Yesus hit afnekan. So Uisneno, hit Ama ma Neno Anan Yesus hit Usif anfe tetus, nek mamun ma halan nekaf neu ko.

³Au lomi he nati' ho mumaika mubala anbi Efesus. Lasi nane au u'uab ulali bi neno au nao eu Makedonia. Au lelu ko he mubala anbi Efesus, fun anbi nane amu'i atoni fauk le an etun noina ka amneot. Ma ho mes, musnasab sin.

⁴Amfainek sin he nati' kais sin tao nekan neu lasi nu'un pah pinan ma lasi pe'ot likin pe'en le ka nafnek nitaf. Ale lasi nane al neki matoes ma ka nanaoba fa bekot Uisneno le al mahine natuin palsait.

⁵Fainekat nane in lomin esle' nafena lasi manekat le anpoi na'ko nek muti, nek aknino ma palsait namneo.

⁶Anmu'i atoni le kan monif onane anteni fun sin kiku anbi molok huma-huma le in lasi luman kun.

⁷Sin anlomi hen fani anoni Plenat Knino unu, mes sin ka natenab nahin fa ale a'at le sin he na'uab ai ale lasi le sin he natiaba nani nok alekot.

⁸Hit tahin, nak Plenat Knino unu nane leko ma namas, kalu tanoba nok alekot.

⁹Hit mes tamnau nak Plenat Knino unu nane kan mo'e nani fa neu atoni amneot, mes neu atoni atanhai plenat sin, neu atoni abulalut, neu atoni le ka nahin Uisneno, neu atoni asanat, neu atoni pah pah pinan le kan mu'if Uisneno, neu atoni le namate in amaf ma in ainaf ma neu atoni ao'tes bian.

¹⁰Neu atoni amoe lasi mapaisa, atoni le anbuion, abak atoni, apoiba, neu atoni le ansaksi poi ma neu atoni le in mo'et nasuli nok noina amneot.

¹¹Noina nane mapeni anbi Beno Knino na'ko Uisneno le apinat ma mapules, le nana'at nalali neu kau.

¹²Au utulu nekak neu Neno Anan Yesus, hit Usif, le anfe kau matani he nati' au tuthae In, ma ankius kau on atoni atam ota neu mepu nane.

¹³Afi au u'akan ulali, ma hamu'i ma ukle'at In. Mes Uisneno nek kau, fun bi leku nane au fe ka palsaif, es nane au ka uhin fa sa' le au mo'e.

¹⁴Mes Usif tunan nek mamun nahoebon neu kau. In fe kau palsait ma manekat le anfani au ini leka au umesbok ok Neno Anan Yesus.

¹⁵Tebes namneo a'at i — es nane hit mes atsimo ma atpalsai nok alekot, “Neno Anan Yesus ankoenon nem neu pah pinan he namonib atoni asanat.” Ma au le'i atoni asanat le anbulalu nesi.

¹⁶Mes natuin lasi nane, Uisneno nek kau, he nati' Yesus Neno Anan nalile In seusabat neu kau on atona asanat anesit. Ma lasi i anfani leta mese neu ale atoni le of anpalsai neu In ma napeni honis nabal-bal.

¹⁷Uisneno, Kesel ale batan, so matola ma mapules piut, fun In kun le nabal-bal, le ka mamnita, lo mese kun! Amin.

¹⁸Au anah Nai Timotius! Au fe ko mepu i fun umnau plenat Uisneno le mafefa knino sin natiaba nani anbi Tolas Knino antom neu ko. So plenat nane anfani bukael neu ko anbi ho mepu alekot.

¹⁹Ho mautnom nok palsit neu Neno Anan ma nok nek muti. Anmu'i atoni le kan lae nan fa sin nek tenab, telan te sin palsait namneku.

²⁰Fun anbi sin Nai Himeneus ma Nai Aleksander. Au una'at ulali sin nua sin neu Santuaf, he nati' sin nanoina ma nas-nas na'ko nasi'u Uisneno.