Read Uab Meto 2 TIMOTIUS 4 Bible Online

2 TIMOTIUS 4 - Uab Meto bible

2 TIMOTIUS 4

¹Neno Anan Yesus of ankoenon nem anteni neu pah pinan i he nafek ale atoni amonit ma amates sin lasi. Ma of In nanoebon nem on Kesel he naplenat. Es nane au toti neu ko anbi Uisneno ma Neno Anan Yesus In matan ak:

²So hom etun Beno Alekot na'ko Uisneno nane, so hom panat nai anbi leku leko ai leku le'uf. So ho munoina sin mulile sin sanat ma amfe fainekat neu sin.

³Fun leka In leku ante of ale atoni kan lomif hen simo noina amneot. Mes sin nabuaba anoni ai kulu namfau natuin sin lomin he nanoina ale lasi le naminab sin luken neki lasi le sin natnin nani.

⁴Of sin sun sin luken neu lasi amneot ma antahan sin luken neu lasi nu'un kahahine.

⁵Maski onane ho mes ampanat ho aom anbi lasi onme amsa. Malan anbi sutais, munaoba ho mepu on amneki Beno Alekot ma munaoba ho mepu nok alekot on atuthaes Uisneno.

⁶Neu au aok, leku antelen au mate on fua tulu neu Uisneno. Ala kle'o anten of au usaitan pah pinan i.

⁷Au utuin foti nok alekot, ma au tia foti in amsopun neu au nek ateb knino.

⁸Ma tomas i sobe amnisat anpao kau. Bi Neno Amsoput, Usif tunan, alef lasi amneot of anfe baen nane neu kau fun au moni uleko ok Uisneno. Mes ka al fa neu kau, mes neu ale atoni le anpao Usif tunan he nanoebon nem nok nek amlilat.

⁹Ho mami lanan he aum meu kau laba,

¹⁰fun Nai Demas nao nasaitan kau natuin in nek pah pinan. In nao kun neu Tesalonika. Nai Krekes in nao neu Galatia ma Nai Titus in nao neu Dalmatia.

¹¹Al Nai Lukas es nabala nok kau. Ho muman Nai Markus ma mokan nem neu i, he nati' in bab kau anbi au mepu.

¹²Au lelu ulali Nai Tikhikus neu Efesus.

¹³Kalu ho aum, meki kau au sobalu mnanu le nabala anbi Troas anbi Nai Karpus in ume. Meki kau au sulat sin amsa nes-nesi sulat le anmo'e na'ko pasu.

¹⁴Nai Aleksander, atoni atusi niti molo nane anmo'e lasi amle'ut namfau neu kau. Usif tunan of anseunbanin in mo'et nane.

¹⁵Ho amsa ampanat ho aom na'ko in, fun in kan simof hit lasi noina.

¹⁶Bi neno au utae lasi ahunut nane, katit fa atoni mese le hen bab kau; sin alsin naen nasaitan kau. Nati' Uisneno kais nasanab sin anbi lasi nane!

¹⁷Mes Usif tunan anhake nok kau. In anfe kau matani talan te au etun beno knino nane, he nati' ale atoni le kan tamaf nonot Yahudi sin natnin nani. Natuin lasi nane te nafetin kau na'ko asu neno in fefan.

¹⁸Ma Usif tunan of nafetin kau na'ko ale salit amle'ut. In of neki kau nok aomina neu Ini plenat anbi neno tunan. Apinat neu In talan te nabal-bal! Amin.

¹⁹Au sonu tabe neu bi Priska ma Nai Akwila ma neu Nai Onesiforus nok in ume nanan sin.

²⁰Nai Erastus nabala anbi Korintus ma Nai Trofinus au usaitan anbi menas anbi Miletus.

²¹Ho manap he aum meu kau nahunu na'ko neno oefat manikin. Nai Ebulus, Nai Pudes, Nai Linus, Nai Klaudia ansonu han alekot neu ko; onane amsa bae benu bian.

²²So Usif tunan anhake nok ko. So Usif tunan anfe ki tetus. Na'ko, Nai Paulus