Read Uab Meto 1PETRUS 5 Bible Online

1PETRUS 5 - Uab Meto bible

1PETRUS 5

¹Au toti matani neu ale penatua le anbi hi tolas knino, on bae penatua ma asaksit Neno Anan In lasi mane'at, le of napeni apinat amsa, leka Neno Anan In apinat nane nalilon neu mansian. Au toti nok matani,

²he nati' hi mituku ale bibi kase le Uisneno nana'at sin neu ki. Mituku sin nok nek malinat onle Uisneno anlomi, ma kais nok nek mafena. Ma kais hi mepu he mipeni osaf mes natuin namneo-namneo him lomi hem tuthae.

³Kais hi mo'e on ana' aplenat neu sin le nana'at sin neu ki, mes him fani heta neu sin.

⁴Leka Atukus Amnanut ankoenon nem, of hi mipeni sobe apinat le ka namle'u nitaf.

⁵Onane amsa hi nonot munif, hi mibaunom meu nonot amnasit. Ma hi alki, mibaunom es neu es, fun antui nani nak, “Uisneno antumatan atoni le nanaebon, mes In nek atoni le nabaun in nekan.”

⁶Es nane te hi mibaun hi aom ambi Uisneno In niman matani, he nati' In na'aiti ki leka in leku ante.

⁷Mina'at ale hi nek na'unu neu Uisneno, fun in es anpanat ki.

⁸Him pao nai ma ambe' nai! Fun Nitu nane hi musu. In onle asu fui le naoinson neu ma nem ma nakunut nami ini mnahat.

⁹Amtumatan in meki hi nek palsait, fun hi mihin, mak ale hi bae knino bian anbi pah pinan amsa ansutai mane'at onle hi.

¹⁰Mes leka him sutai milali mane'at leku tuk es, Uisneno of nanokab ki. In of natetu ki ma anhatani ki ma namepan ki. Fun In lo Uisneno le nekan leok le'uf, le anboin nalali ki hem tamis In apinat nabal-bal natuin Neno Anan.

¹¹In kun es anmu'i kuasat talan te nabal-bal! Amin.

¹²Au sulat tuk-tuka i au tui neu ki eki Nai Silwanus in niman, le au ak in on bae knino aki'at. Au lomi he etun ki, ma afainek ki ak i lo halinat Uisneno namneo so him na' mimepan neu halinat nane.

¹³Hi bae knino tolas knino mese anbi Babilon le mabeti amsa natuin Uisneno. ansonu tabe neu ki; onane amsa au anah Nai Markus le au nek ani.

¹⁴Hi masimo es nok es nok manekat on bae knino. So Usif tunan anfe halan nekaf neu ki alki le amfani Neno Anan ini. Amin. Na'ko, Nai Petrus