Read Uab Meto 1YOHANES 1 Bible Online

1YOHANES 1 - Uab Meto bible

1YOHANES 1

¹Sulat i nesan antom A'ar honis, esle' A'an le esan na'ko un-unu. Haim nen milali, ma hai mit milali meki hai matam. Hai mit milali, ma haim na'milali meki hai nimam.

²Leka honis nane nalilon, hai mit mani, es nane haim fe saksi antom neun. Haim eut ki alki antom honis amneot le nabal-bal, le nabua nok Ama, ma le nalile nalali neu kai.

³Sa' le hai mit milali ma amnen, nane amsa haim eut mani neu ki alki, he nati' hi mok kai atmoni nek mese, tamesbok tok Ama ma tok In Anmone Yesus Neno Anan.

⁴Haim tui lasi i he nati' hit nekak namneo-namneo anmalin.

⁵I beno le haim nen milali na'ko In Anmone ma le hai mitiaba neu ki. Uisneno lo meusine kun, ma katit fa mesokan anbi In.

⁶Leka hit tak, hit moni tamesbok tok In, mes hit moni atbi mesokan, nane hit tapoibok ai ta'moe teki hit uab ma hit mo'et.

⁷Mes leka hit moni atbi meusine onle Uisneno anbi meusine, hit moni nek mese es nok es, ma Yesus In Anmone, In na' naknino kit na'ko ale sanat.

⁸Leka hit tak, hit kat mu'if sanat, nane hit tapoibok; hit ka tahin fa Uisneno anbi hit nekak.

⁹Leka hit tahoeb hit sanat-sanat neu Uisneno, of In natiaba In manta'en ma anmo'e ale sa' nok amnonot. In of ansako hit sanat-sanat ma naknino kit na'ko ale amle'ut.

¹⁰Leka hit tak, hit kat mo'ef sanat, onane te hit mo'e Uisneno anfani apoiba ma hit ka tabela fa Uisneno a'an anbi hit nekak.