Read Uab Meto 1YOHANES 2 Bible Online

1YOHANES 2 - Uab Meto bible

1YOHANES 2

¹Au anhenu ki! Au tui ale lasi i neu ki, he nati' kais hi mo'e sanat. Mes leka es anmo'e sanat, hit mui ababat mese, esle' Yesus Neno Anan le amneot nane; In of antoti neu kit anbi Ama matan.

²Nok Yesus Neno Anan nane hit sanat-sanat masako. Ma ka al fa hit sanat-sanat, mes to mansian ok-oke sin sanat amsa.

³Kalu hit tatuin ale plenat Uisneno, nane on taka nak hit tahin Uisneno.

⁴Atoni le nak: “Au uhin Uisneno,” mes In ka natuin fa In plenat, atoni nane apoiba ma in ka nahin fa Uisneno anbi In nekan.

⁵Mes atoni le natuin a'an Uisneno, atoni nane nek Uisneno nok alekot. Nok lasi nane hit tahin, nak hit moni tamesbok tok Uisneno.

⁶Sekau le in nak in moni namesbon nok Uisneno, in mes anmoni onle Neno Anan.

⁷Bae benu manekat! Au tui i ka plenat fe'u fa. I plenat amna le natiaba nalali neu ki na'ko un-unu; esle' beno na'ko Uisneno, le afi him nen milali.

⁸Maski onane, plenat le au tui fe'u amsa; fun In amneot mamnita anbi Neno Anan ma anbi ki nok. Fun mesokan nane anfinien ma meusine amneot anpinen.

⁹Atoni le in nak in anbi meusine, mes na'unu nekan neu in bae, in nabalah anbi mesokan talan te leku i.

¹⁰Atoni le nek in bae, atoni nane anmoni anbi meusine, ma katit fa sa' es anbi in, le of anmo'e atoni bian hen mofu anbi sanat.

¹¹Mes atoni le na'unu nekan neu in bae, in nabalah anbi mesokan, In nao anbi mesokan, ma in ka nahin fa he nao neu me, fun mesokan nane anmo'e in tal in ka nitaf.

¹²Au tui neu ki, Anah-anah, fun hi sanat masako natuin Neno Anan.

¹³Au tui neu ki, Amaf-amaf, fun hi mihin milali In, le esan na'ko un-unu. Au tui neu ki, hoi atoni munif, fun him be'u milali lasi amle'ut.

¹⁴Au tui neu ki, Anah-anah, fun hi mihin Amaf Uisneno. Au tui neu ki Amaf-amaf, fun hi mihin In, le esan na'ko un-unu. Au tui neu ki, hoi atoni munif, natuin hi mibe'i. Ma Uisneno In a'an nabalah anbi hi nekam ok-oke ma him be'u milali lasi amle'ut nane.

¹⁵Kais him nek pah pinan ma sa' le anbi pah pinan i. Kalu him nek pah pinan, hi kam nekaf Ama.

¹⁶Fun ale sa' le anbi pah pinan i esle' ale sa' le ansinmakan natuin ta'uf mansian le asanat, ale sa' le sin nit ma anlomi he napeni — ma ale sa' le anbi pah pinan i le sin nanaebok ale lasi nane ka na'ko fa Ama mes na'ko pah pinan.

¹⁷Pah pinan ma ale sa' anbine le mansian ansinmakan nani, of namneku. Mes atoni le natuin lomin Uisneno, anmoni nabala talan te nabal-bal.

¹⁸Au anhenu, leku amsoput anhaumaken. Afi aneut nalali neu ki nak: Neno Anan In musu of nem; ma tomas i Neno Anan In musu namfau anbol nem. Nane on taka, nak neno amsoput anhaumaken.

¹⁹Musu-musu Neno Anan nane esle' atoni-atoni le nao nasaitan kit, fun sin le nane hit ka atoni sin. Kalu sin le nane hit atonin, of sin nabalah nok kit. Mes sin anpoi na'ko kit, he nati' hit tahin nak katit fa atoni mese na'ko sin le namneo-namneo antam neu kit.

²⁰Mes hi mipeni milali Smanan Knino le anop nalali natuin Yesus Neno Anan. Es nane te hi ala ki mihin Uisneno le amneot.

²¹Au tui i neu ki ka natuin fa hi ka mihin fa Uisneno le amneot, mes natuin hi mihin mani, ma hi amsa mihin, nak Uisneno amneot nane fe ka napoibon fa.

²²Apoiba nane esle' atoni le na'uab nak Yesus nane ka Kesel Afetin le Uisneno anba'an nani. Atoni nane Neno Anan In musu. In es natotan Ama ma Anmone.

²³Atoni le natotan Anmone, in amsa kan simof Ama. Atoni le ansimo Anmone, in ansimo Amaf amsa.

²⁴Es nane beno le him nen milali na'ko un-unu so him panat lek-leko anbi hi nekam. Kalu beno nane him panat lek-leko, of hi moni mimesbom piut mok Anmone ma mok Amaf.

²⁵I lasi manba'an le Neno Anan anba'an nani neu kit, esle' honis nabal-bal.

²⁶Au tui lasi i neu ki, antom ale atoni le nami he nasekeb ki.

²⁷Mes neu hi, Neno Anan an op nalali In Smanan neu ki. Ma leka In Smanan anbi ki atoni bian ka nabe'i he nanoina ki. Fun In Smanan nanoina ki antom ale sa'; ma sa' le In nanoina nane namneo, ka napoibon fa. Es nane, so hi mituin sa' le Smanan Knino nanoina nani, ma so hi moni mimesbom mok Neno Anan.

²⁸Es nane au anhenu, moni mibala mok Neno Anan, he nati' anbi leku In koenon nem, hit hake atbi In matan nok amaspetis, ma kais ta'tolo' natuin atmae.

²⁹Hi mihin milali mak Neno Anan anmoni natuin Uisneno lomin. Es nane hi mes mihin amsa mak ale atoni le anmoni natuin Uisneno lomin nane Anah Uisneno.