Read Uab Meto 1YOHANES 3 Bible Online

1YOHANES 3 - Uab Meto bible

1YOHANES 3

¹Kiso, Uisneno manekan nae le'uf neu kit, talan te antek kit nak anah-anah Uisneno; ma namneo onane hit lo anah-anah Uisneno. Natuin lasi nane pah pinan amle'ut i ka nahin kit fa, fun pah pinan ka nahinef Uisneno.

²Bae benu manekat! Muni i hit lo anah-anah Uisneno kit, mes hen bol neu kit onme, nane fe ka mahine fa. Mes hit tahin nak kalu Neno Anan ankoenon nem, hit of atfani onle In, fun hit of tit In anbi In masan le namneo.

³Ale atoni le anmu'i afnekat i neu Neno Anan, anpanat in aon he nati' namneo-namneo knino, muti na'ko sanat onle Neno Anan amsa knino.

⁴Atoni le anmo'e sanat, atanhai plenat Uisneno amsa. Fun sanat nane lo atanhai plenat Uisneno.

⁵Ma hi mihin, mak Neno Anan ankoenon nem he nati' ansako ale sanat mansian, ma kan mu'if sanat anbi In.

⁶Ale atoni le anmoni namesbon nok Neno Anan kan mo'ef sanat piut-piut. Atoni le anmo'e sanat piut-piut, ka nit fa Neno Anan ma ka nahinef In.

⁷Au anhenu kais amfe menuan he nati' atoni bian nasekeb ki. Atoni le anmo'e natuin Uisneno lomin, nem na'ko Uisneno, onle Neno Anan amsa nem na'ko Uisneno.

⁸Mes atoni le anmo'e sanat piut-piut, in na'ubon na'ko nitu, fun nitu nane anmo'e sanat na'ko un-unu. Natuin lasi i, Uisneno Anmone ankoenon nem he nati' naskuku nitu in mepu.

⁹Atoni le anfani Anah Uisneno, kan mo'ef sanat piut-piut, fun Uisneno nabalah anbi in. Ma natuin Uisneno nane in Amaf, in ka nabe'i fa hen mo'e sanat piut-piut.

¹⁰In on taka neu anah-anah Uisneno ma anah-anah na'ko Nitu. Atoni le kan mo'ef Uisneno lomin, ai ka nekaf in bae, in ka Anah Uisneno fa.

¹¹Na'ko un-unu him nen milali beno i: Nak hit mes atmanek es nok es.

¹²Kais hit onle Nai Kain le na'ubon na'ko amoe Amle'ut ma namate in olif. Nansa ka es Nai Kain namate in olif? Fun ale sa' le in anmo'e nane ka namneof, ma ale sa' le in olif anmo'e nane namneo.

¹³Bae benu manekat, kais hi mimkak, leka pah pinan na'unu nekan neu ki.

¹⁴Hit tahin talali, nak hit poi ta'ko maten ma ta'oni teu honis nabal-bal. Hit tahin lasi nane fun hit nek hit bae benu sin. Atoni le kan mu'if manekat, in nabalah anbi maten.

¹⁵Atoni le nekan na'unu neu in bae, nane in atoni a'otes, ma hi mihin, mak atoni a'otes kan mu'if honis nabal-bal.

¹⁶Nok lanan i hit tahin manekan Uisneno. Neno Anan nana'at nalali In monin neu kit. Es nane hit amsa mes tana'at hit monik neu hit bae sin!

¹⁷Kalu atoni mese anmu'i maus pah pinan, ma in nit in bae anbi manukat, mes in kan lomif hen tuthae in bae nane, leka me atoni nane nabe'i na'uab nak in nek Uisneno?

¹⁸Au anhenu, kais hit manek al anbi fefak ai al teki a'at. So hit manek teki manekat amneot, le talile teki hit mo'et.

¹⁹Anbi lasi i hit tahin nak hit on atoni le na'ubon na'ko Uisneno, tal hit nekak antainine anbi Uisneno matan.

²⁰Kalu hit nekak nasanab kit hit tahin nak Uisneno naek nesin na'ko hit nekak nane ma In nahin ale sa'-sa'.

²¹Bae benu manekat, leka hit nekak ka nasanab kit fa, nabe'i hit athake atbi Uisneno matan nok amaspetis.

²²Ma sa' na'ko In of hit tapeni, fun hit tatuin In aplenat sin ma atmoe sa' le anhalin In nekan.

²³Lasi le In naplenat neu kit, esle': Hit mes atpalsai neu In Anmone, esle' Yesus Neno Anan; ma hit mes atmanek es nok es, onle Neno Anan naplenat nalali neu kit.

²⁴Ale atoni natuin neu ale plenat Uisneno, anmoni namesbok nok Uisneno, ma Uisneno namesbon nok sin. Mat hit tahin nak Uisneno anmoni namesbon nok kit, fun In anfe nalali In Smanan neu kit.