Read Uab Meto 1YOHANES 4 Bible Online

1YOHANES 4 - Uab Meto bible

1YOHANES 4

¹Bae benu manekat! Kais him palsai neu ale atoni le nak sin anmu'i Smanan Uisneno, mes amsu' mihunun sin he mihin mak smanaf le anbi sin nane na'ubon na'ko Uisneno ai kahaf. Fun mafefa apoiba namfau nasitbon nalali neu me-me.

²Anbi lasi i hi mihin mak nane Smanaf Uisneno ai kahaf. Atoni le anmanaku nak Usif nane Kesel Afetin le ankoenon neu pah pinan on mansian, atoni nane anmu'i Smanaf le nem na'ko Uisneno.

³Mes atoni le kan manaku fa lasi i antom Yesus, kan mu'if Smanaf Uisneno. Atoni nane anmu'i Smanaf na'ko musu Neno Anan. Him nen milali nak Smanaf nane of nem, ma tomas i in nem nalali anbi pah pinan i.

⁴Mes au anhenu, hi mi'ubon mi'ko Uisneno. Him be'u milali ale mafefa apoiba, fun Smanaf le anbi ki anmu'i kuasat nesin na'ko smanaf le anbi ale atoni pah pinan ini.

⁵Mafefa-mafefa apoiba nane na'uab lasi-lasi pah pinan, ma pah pinan natuin sin uab, fun sin na'ubok na'ko pah pinan.

⁶Mes hit lo anah-anah Uisneno; ma atoni le nahin Uisneno natnin hit uab amsa. Atoni le ka Uisneno In, ka nenaf hit uab. Anbi lasi i hit tahin, lasi suli na'ko Smanaf le antopu atoni he nahin Uisneno ma smanaf le he nasekeb atoni.

⁷Bae benu manekat! Aim nai hit manek es nok es, fun manekat nane na'ko Uisneno. Atoni le anmu'i manekat, nane anah Uisneno ma in nahin Uisneno.

⁸Atoni le kan mu'if manekat, in ka nahin fa Uisneno, fun Uisneno nane manekat.

⁹Uisneno nalile In manekan anbi hit nekak, es nane Uisneno ansonu In Anmone mes tilo nem neu pah pinan, he nati' hit tapeni honis natuin In Anmone.

¹⁰Manekat nane esle' i: Hit es kat nek Uisneno, mes Uisneno In nek kit ma ansonu In Anmone he nati' nok In hit tapeni ampun neu hit sanat sin.

¹¹Bae benu manekat! Leka Uisneno nek kit onane, hit amsa so atmanek es nok es.

¹²Katit fa atoni mese le nit Uisneno, mes kalu hit manek es nok es, Uisneno namesbon nok kit ma In manekan nokbon anbi kit.

¹³Fun Uisneno anfe nalali kit In Smanan, es nane hit tahin nak hit moni tamesbok tok Uisneno, ma Uisneno anmoni namesbon nok kit.

¹⁴Hai mit milali Anah Uisneno ma amsaksi neu atoni bian nak Ama ansonu In Anmone neu pah pinan hen fain Kesel Afetin neu pah pinan i.

¹⁵Atoni le nateb, nak Yesus nane Uisneno Anmone, Uisneno anmoni namesbon nok In, ma In namesbon nok Uisneno.

¹⁶Hit tahin ma atpalsai manekan Uisneno neu kit. Uisneno nane manekat, ma atoni le nabala anbi manekat, in namesbon nok Uisneno ma Uisneno namesbon nok in.

¹⁷Anbi lasi i, manekan Uisneno nanokbon anbi kit, he nati' hit atmu'i nek amaspetis bi neno lef lasi. Hit of atmu'i nek amaspetis, fun hit moni atbi pah pinan i onle Neno Anan anmoni.

¹⁸Atoni le anmanek, ka nahinef tenab amtaus; fun manekat le nanokbon naneku ale tenab amtaus. Onane te, manekat fe ka nanokbon fa anbi atoni amtaus in aon, fun lasi amtaus anbol anmatom nok kasat.

¹⁹Hit manek fun Uisneno nek nahunun kit.

²⁰Leka atoni es nak, “Au nek Uisneno,” mes in nekan na'unu neu in bae, nane in atoni apoiba. Atoni le in ka nekaf in bae le in nit nani, leka me in he nek Uisneno le in ka nitef.

²¹Plenat i hit simo na'ko Neno Anan. Atoni le in nek Uisneno, in mes he nek in bae amsa.