Read Uab Meto 1YOHANES 5 Bible Online

1YOHANES 5 - Uab Meto bible

1YOHANES 5

¹Atoni le nekan nateb knino, nak Yesus nane Kesel Afetin le Uisneno anba'an nani, atoni nane Anah Uisneno. Ma atoni le in nek Ama, in nek Anmone amsa.

²Nok lanan i hit tahin tak hit nek anah-anah Uisneno: hit nek Uisneno ma tahin In aplenat sin.

³Fun kalu hit nek Uisneno, nane on hit tatnin neu In aplenat sin. Ma In aplenat sin ka mafena fa neu kit,

⁴fun ale anah Uisneno mes anbe'u pah pinan amle'ut i. Ma hit be'u pah pinan teki hit nek ateb knino.

⁵Sekau es hen be'u pah pinan amle'ut ka? So al atoni le nekan nateb nak Yesus nane Anah Uisneno.

⁶Yesus Neno Anan le nem neu pah pinan neki In oe bobok tetus ma neki In na'. In nem ka al fa neki oe, mes neki oe ma na'. Ma Smanan Uisneno es anfe saksi nak nane namneo, fun Smanaf nane amneot.

⁷Es nane anmu'i tenu le ansaksi anbi neno tunan esle': Ama, A'an Uisneno ma Smanan Knino ma sin tenu sin mese.

⁸Ma sin tenu le ansaksi anbi pah pinan: Smanan Knino ma oe ma na', sin tenu sin saksi papmese.

⁹Hit palsai neu saksit mansian, mes saksit Uisneno anmatani nesi anten. Nane saksit le Uisneno anfe nalali antom In Anmone.

¹⁰Es nane, atoni le anpalsai neu Anah Uisneno, in simo nalali saksit nane anbi in nekan; mes atoni le kan palsai fa neu Uisneno, in mo'e on Uisneno apoiba, fun in kan palsai fa sa' le Uisneno, nauab nani antom In Anmone.

¹¹Ma saksit nane on i: Uisneno anfe nalali neu kit honis nabal-bal ma In Anmone nane lasi honis un.

¹²Atoni le anmu'i Uisneno Anmone, in anmu'i honis nane. Ma atoni le kan mu'if Uisneno Anmone, in kan mu'if honis.

¹³Au tui ale lasi i, he nati' hi le ampalsai neu Uisneno Anmone, mihin mak hi mu'i milali honis nabal-bal.

¹⁴Ma nabe'i hit athake atbi Uisneno In human, fun hit palsai nak In nen ma natnin hit onen totis, kalu hit toti sa' am sa' le natai nok In lomin.

¹⁵Fun hit tahin nak In nen nalali kit kalu hit toti neu In, hit tahin amsa nak In fe nalali kit sa' le hit toti na'ko In.

¹⁶Leka hi mit hi bae anmo'e sanat le ka neki fa neu maten, him onen toti neu Uisneno; ma Uisneno of anfe honis neu atoni nane. I natai nok sin, le sin sanat ka neki fa neu maten. Mes anmu'i sanat le neki neu maten, ma au ka u'uab fa he nati' him onen toti neu Uisneno antom lasi nane.

¹⁷Ale mo'et amle'ut nane sanat, mes anmu'i sanat le ka neki fa neu maten.

¹⁸Hit tahin, nak ale atoni le anfani anah-anah Uisneno kan mo'ef sanat piut-piut, fun Uisneno Anmone naneo ma namafo sin, ma Amle'ut ka nabe'i hen mo'e sa'-sa' neu sin.

¹⁹Hit tahin, nak hit ta'ubok ta'ko Uisneno, maski pah pinan i ok-oke anbi Amle'ut in kuasat.

²⁰Hit tahin, nak Uisneno Anmone nem nalali ma anfe nalali nek hinef neu kit he nati' hit tahin Uisneno le amneot. Hit moni tamesbok tok Uisneno le amneot ma hit tamesbok tok In Anmone Yesus Neno Anan. In kun lo Uisneno amneot, ma In lo honis nabal-bal.

²¹Au anhenu, mi'lob hi aom na'ko ale le'u mahuma.