Read Uab Meto HAKIM-HAKIM 1 Bible Online

HAKIM-HAKIM 1 - Uab Meto bible

HAKIM-HAKIM 1

¹Leka Nai Yosua anmate nalali, to Israel sin natoti UISNENO nak, “Koi UISNENO, uf me na'ko kai esle mes he nao nahunu hen laban atoni Kanaan?”

²UISNENO natae nak, “Uf Yehuda. Au fe ulali kuasat neu sin he nasik nan pah nane.”

³Oke te uf Yehuda nak neu uf Simeon nak, “Ambab kai he hit atken atoni Kanaan ma tasik tan pah le UISNENO anlek nani neu kai. Mes hai amsa of ambab ki he tasik pah le UISNENO anlek nani neu ki.” Onane te uf Simeon

⁴ma uf Yehuda sin anao ma sin anmaken bua-bua. Ma UISNENO anfe neu sin lasi mnisat fun sin nis ma anbe'u atoni Kanaan ma atoni Feris. Solalus atoni nifun bo'mese na'ko musu le sin anmate anbi Bezek.

⁵Sin napeni Nai Adoni-Bezek, kesel pah nane, ma sin anlaban in.

⁶Nai Adoni-Bezek in naen, mes sin anli'u in ma anheke in oke te sin an ote nafek in kalulun ainaf anbi in niman ma in kalulun ainaf anbi in haen.

⁷Oke te Nai Adoni-Bezek in nak, “Afi ahunut kesel bo'hitu au ote ufek sin kalulun ainaf anbi sin niman ma kalulun ainaf anbi sin haeken, oke te au ufetin sin nah ale au mnah nesif le anmofu na'ko au mei. Tabu le i Uisneno antao ma anmo'e kau onle afi au tao ma mo'e sin.” Nai Adoni-Bezek namuni te sin neki sin in neu Yerusalem, ma in anmate anbi nane.

⁸Atoni Yehuda sin nem ma sin anlaban Yerusalem, oke te sin nasik nan kot nane ma notu nani kot nane oke te namate kot nane sin tuaken.

⁹Nalali te sin anao anteni ma sin anlaban atoni Kanaan le sin natua anbi neten, anbi bnapaf, ma anbi mnela; onane amsa le natua anbi pah meto anbi bian a'ne'u,

¹⁰ma anbi kot Hebron, kot le afi nakanab nak Kiryat-Arba. Anbi nane atoni Yehuda sin nis ma anbe'u nonot Nai Sesai, Ahiman ma Talmai.

¹¹Na'ko Hebron atoni Yehuda sin anao anlaban ma anken kot Debir, le anbi tabu nane in kanan Kiryat-Sefer.

¹²Atoni mese na'ko uf Yehuda nane, in kanan Nai Kaleb, in nak, “Sekau le nasik nan kot Kiryat-Sefer, of au fe au anfeto bi Akhsa neu in, on in fenai.”

¹³Nai Otniel, Nai Kenas anmone, Nai Kaleb olif, in nasik nan kot nane. Onane te Nai Kaleb anfe in anfeto, bi Akhsa, anfani Nai Kaleb in fenai.

¹⁴Anbi sin neno mafet mamonet, Nai Otniel naseke bi Akhsa he nati' antoti nain pisa mese na'ko in amaf. Ma bi Akhsa in ansanu na'ko in bikase luke mnanu, oke te Nai Kaleb natoti neu in sa' le in anlomi.

¹⁵Oke te bi Akhsa natae nak, “Au lomi oe mata honis fauk-fauk, natuin nain le ama hom fa neu kau nane anbi bale pah meto.” Ma Nai Kaleb anfe neune oe mata honis fauk-fauk antom fafon ma antom apinan.

¹⁶Nai Musa in babaf, Nai Keni in sufan, sin nok atoni Yehuda sin anpoi na'ko Yerikho, kot boen no', ma sin anao neu pah mnela snaen bian a'ne'u Arad anbi Yehuda. Anbi nane sin natua anbi uf Amalek sin atnanken.

¹⁷Namuni te sin nok uf Simeon, uf Yehuda nane sin anao ma anlaban ma sin nis ma anbe'u atoni Kanaan le natua anbi kot Zefat. Sin ansukat kot nane, ma sin nale'un nani oke te sin nakanab kot nane nak Horma.

¹⁸UISNENO anbab atoni Yehuda talantia sin nasik nan bale neten nane. Mes sin ka nasik nan fa Gaza, Askelon, ai Akron amsa nok bale-bale le anhaumak anbi nane, natuin uf-uf le natua anbi bale mnela nane sin anmu'i aklet-aklet makenat na'ko besi; es nane te atoni Yehuda kan li'u nabe'i fa sin na'ko nane.

²⁰Onle Nai Musa anlek nani, anfe Hebron neu Nai Kaleb, natuin afi Nai Kaleb anli'u Nai Enak anmone tenu sin sufken na'ko kot nane.

²¹Uf Benyamin sin kan li'u nabe'i fa atoni Yebus anpoi na'ko kot Yerusalem. Es nane te atoni Yebus fe sin natua nabala nok atoni Benyamin talantia neno i.

²²Uf Efraim ma Manasye Nai Yusuf sufan, sin anao ma anlaban kot Betel, le anbi tabu nane in kanan Lus. Ma UISNENO anbab sin. Anbi tabu ansonu atnu'us sin an ali kot nane,

²⁴sin naeku nok atoni mese le in anpoi nem na'ko kot. Ma sin nak neu in nak, “Leka hom lomi hem bab kai he nati' haim tam anbi kot in nanan, hai of amtao ma mo'e ko nok alekot.”

²⁵Oke te atoni nane natonan sin lanan he sin antam neu kot nane. Oke te atoni-atoni Efraim ma Manasye sin antam neu kot nane ma sin namate tuafen kot nane ok-oke, al atoni nane nok in ume nanan sin.

²⁶Namuni te in natnani neu atoni Het sin pah, oke te nafena kot mese anbi nane ma nakanab in nak Lus. Kot nane fe in kanan nabal piut onane.

²⁷Uf Manasye kan li'u fa tuafen kot Bet-Sean, Taanakh, Dor, Yibleam, ma Megido nok kuan-kuan le anhaumak anbi nane. Es nane te atoni Kanaan sin natua nabala anbi nane.

²⁸Namneo leka atoni Israel sin nahel ma anmatani, sin naseke atoni Kanaan hen mepu neu sin, mes sin amsa kan li'u fa atoni-atoni Kanaan na'ko bale nane.

²⁹Anbi kot Gezer, uf Efraim kan li'u fa atoni Kanaan, tuafen kot nane. Es nane te, atoni Kanaan fe sin natua nabala anbi nane nok sin.

³⁰Tuafen kot Kitron ma Nahalol uf Zebulon amsa kan li'u fa sin. Es nane te uf Kanaan fe natua nabala anbi nane nok sin, mes sin naseke atoni-atoni Kanaan hen mepu neu sin.

³¹Tuafen kot Ako, Sidon, Ahlab, Akhzib, Helba, Afek, ma Rehob amsa uf Asyer kan li'u fa sin.

³²Es nane te atoni Kanaan, pah nane tuaken fe natua anbi nane nok atoni Asyer.

³³Tuafen kot Bet-Semes ma Bet-Anat amsa uf Naftali kan li'u fa sin. Es nane te pah nane tuaken fe natua bua-bua anbi nane nok atoni Naftali. Mes, naseke sin anmepu neu atoni Naftali.

³⁴Uf Amori fe natua nabala anbi Ayalon, Saalbim ma Tubu Heres, natuin sin anbe'u uf Dan neu pah neten ma ka nafetin fa sin hen sanu neu pah amnela. Mes uf Efraim ma Manasye sin anhamu'i uf Amori piut ma naseke sin hen mepu neu uf nua en nane.

³⁶Anbi bian a'li Sela, nakat atoni-atoni Amori sin pah anfini Saet Akrabim.