Read Uab Meto HAKIM-HAKIM 10 Bible Online

HAKIM-HAKIM 10 - Uab Meto bible

HAKIM-HAKIM 10

¹Leka Nai Abimelekh in anmate nalali, Nai Tola Nai Pua anmone, in anfani ana' aplenat he nafetin atoni Israel. In le nane Nai Dodo upuf na'ko uf Isakhar. In natua anbi Samir anbi neten Efraim.

²In naplenat Israel on alef lasi ton bo'nua am tenu, oke te in anmate ma ansub in anbi Samir.

³Namuni na'ko Nai Tola, Nai Yair naplenat on alef lasi anbi Israel ton bo'nua am nua. Nai Yair in na'ko Gilead.

⁴Nai Yair in anmone sin bo'tenu. Sin anmu'i bikase luke mnanu bo'tenu le hen sae neu sin ma kuan bo'tenu anbi pah Gilead. Kuan-kuan nane fe antek sin nak kuan-kuan Nai Yair.

⁵Nai Yair amsa anmate, ma ansub in anbi Kamon.

⁶Nonot Israel nasanab anteni neu UISNENO. Sin ka natuin fa UISNENO In aplenat ma ka naluli nabes fa neu In anteni. Sin naluli nabes neu uisneno teta Baal ma Asytoret, ma uisneno teta of Siria, Sidon, Moab, Amon ma Filistin.

⁷Es nane te UISNENO nato'an nonot Israel, talantia In nafetin uf Filistin ma uf Amon naplenat sin.

⁸Ton bo'es am fanu in a'lon uf nua en nane sin anhamu'i ale atoni Israel le natua anbi Gilead, pah atoni Amori antom neno saen Noe Yordan. Sin antao ma anmo'e atoni-atoni Israel nok mafena naek.

⁹Atoni Amon sin anlak Noe Yordan ma sin anao ma anken uf Yehuda, Benyamin ma Efraim talantia nonot Israel sin napeni hamu'it anae le'uf.

¹⁰Oke te nonot Israel sin anbai neu UISNENO, nak, “Hai misanab milali neu Ko, natuin hai kam sian Ko fa, koi hai Uisneno. Hai miluli ma mibes neu uisneno teta Baal.”

¹¹UISNENO natae nak, “Afi ahunut uf Mesir, Amori, Amon, Filistin, Sidon, Amalek ma Maon sin an aten ki. Oke te anbi tabu nane hi am anbai neu Kau, he Au bab ki ka? Aiti hi mimnau mit, ai Au ka ufetin ki fa na'ko sin kuasat?

¹³Maski onane amsa, hi fe amkoti Kau, oke te hi amnao ma miluli mibes neu uisneno teta sin. Es nane te Au ka lomi fa he ufetin ateni ki.

¹⁴Amnao nai meu ale uisneno teta sin le him beti sin nane. Ambai nai neu sin! Mautu he nati' sin anbab ki anbi tabu hi anbi susal in nanan.”

¹⁵Mes nonot Israel sin nak neu UISNENO nak, “Hai misanab milali, koi UISNENO. Amtao ma amoe sa' le Hom lomi, al nati' Hom bab kai anbi neno i.”

¹⁶Nalali te sin anpolin ale le'u mahuma, oke te sin naluli ma nabes neu Uisneno. Fun Uisneno In nekan antu' leka In nit sin anbi susal in nanan.

¹⁷Anbi tabu nane to meo Amon fe sin naloitan hen makenan. Sin nahakeb sin um-ume anbi Gilead. Ma Israel sin amsa nabua nalali ma nahakeb sin um-ume anbi Gilead.

¹⁸Anbi nane ale to ma ale ana' plenat na'ko uf-uf Israel nane sin anmantotin es nok es ai anmu'i anbi sin le nabe'i naiti bale makenat hen laban uf Amon. Atoni nane of naiti nasaeba in anfani ana' plenat neu Gilead tuakenu ok-oke.