Read Uab Meto HAKIM-HAKIM 11 Bible Online

HAKIM-HAKIM 11 - Uab Meto bible

HAKIM-HAKIM 11

¹Nai Yefta atoni meo pa'e mese le abe'it matain le'uf. In natua anbi Gilead. In amaf kanan Nai Gilead mes in ainaf bife akaket mese.

²In amaf nane anmu'i amsa anmone bian na'ko in fe amneot bian. Leka in anah-anah nane sin nanae, sin anli'u Nai Yefta na'ko sin ume. Sin nak neune nak, “Ho of ka mupeni fa bale bela sa'-sa' na'ko hai ama, natuin ho le nane anah na'ko bife teta.”

³Es nane te Nai Yefta nasaitan in biafen oke te in anao ma natua anbi pah Tob. Anbi nane atoni abulalut pukan mese nem nabua nokan oke te sin anao ma nabak anbi me-me.

⁴Tabu fauk-fauk namuni na'ko nane te atoni Amon sin nem ma anlaban atoni Israel.

⁵Leka lasi nane anbol, ale atomatas Israel anbi Gilead sin anao ma anhone Nai Yefta he nasaitan pah Tob.

⁶Sin nak, “Amna' ma amtopu kai he hai amlaban atoni Amon.”

⁷Mes Nai Yefta natae nak, “Ait hi kam lomi mani kau fa ka? Him li'u milali kau na'ko au ama in ume. Nansa' anbi neno hi anbi susal in nanan, hi aim meu kau?”

⁸Sin natae nak, “Hai aim natuin haim lomi he nati' ho amna' ma amtopu tuafen Gilead ok-oke hem ken uf Amon anbi neno i amsa.”

⁹Nai Yefta natae nak, “Leka him hone kau he au fani neu Gilead he ken uf Amon, ma UISNENO anfe mnisat neu kit, au es of a'fani ana' aplenat neu ki.”

¹⁰Sin natae nak, “Hai amlomi, UISNENO anfani saksi neu kai.”

¹¹Onane te Nai Yefta in anfen ma anao nok ale anakaf Gilead. Namuni te tuafen Gilead sin naiti nasaeb in anfani akuasat ma ana' aplenat neu sin. Ma anbi UISNENO In human In matan anbi Mizpa, Nai Yefta natiaba in fef ba'an sin neu Gilead tuakenu.

¹²Oke onane te Nai Yefta ansonu haef neu kesel Amon he naton neune nak on i, “Hai misanab sa' talantia hi hem ken hai pah?”

¹³Kesel uf Amon in natae haefen nane nak, “Leka nonot Israel sin nem na'ko Mesir, sin naiti hai pah, na'ko Noe Arnon antia Noe Yabok ma Noe Yordan. Anbi tabu le i amfe mifani sin nok lasi halan.”

¹⁴Oke te Nai Yefta in ansonu anteni haef neu kesel Amon,

¹⁵he natae on i, “Nonot Israel namneo-namneo ka nasik fa pah atoni Moab ai atoni Amon sin pah.

¹⁶Leka atoni Israel sin anpoi nasaitan Mesir, sin an ali neu Tasi nonof Akaba anao nok mnela snaen oke te sin nem antia Kades.

¹⁷Nalali te sin ansonu haef neu kesel Edom antoti he nafetin sin anao nok in pah. Mes in ka nafetin fa sin. Namuni te sin antoti lasi papmese amsa neu kesel Moab, mes in amsa ka nafetin fa sin he nao nok in pah. Es nane te nonot Israel sin natua anbi Kades.

¹⁸Nalali te sin anao anfini anao nok mnela snaen, mes sin ka nao nok fa pah Edom ma Moab, somak sin anfun ma natef nem antia Moab neno saen, anbi Noe Arnon aon bian. Sin nahakeb sin um-ume anbi nane, mes sin kan lak fa noe nane, natuin pah nane Moab in pah.

¹⁹Oke onane te nonot Israel ansonu haef neu Nai Sihon, kesel Amori anbi Hesybon antoti he nafetin sin he sin anao nok pah Amori, natuin sin he nao neu sin pah.

²⁰Mes Nai Sihon in ka nafetin fa sin he nao nok in pah. Mes in nabuab ale in to meo amakenat sin ok-oke ma sin anpuknok anbi Yahas oke te sin anlaban Israel.

²¹Mes UISNENO, Israel sin Uisneno, anfe lasi mnisat neu atoni Israel sin nis ma anbe'u Nai Sihon nok in to meo amakenat sin. Onle nane nonot Israel sin nasik nan pah-pah atoni Amori le sin natua anbi pah nane.

²²Pah atoni Amori nane sin natua nani na'ko Arnon bian a'ne'u, talantia bian a'li Noe Yabok, ma na'ko mnela snaen neno saen, talantia Noe Yordan neno tesan.

²³Es nane te UISNENO, Israel sin Uisneno, nane es anli'u atoni-atoni Amori neu nonot UISNENO sin alekon.

²⁴Ma tabu le i ai hom lomi he maiti mufani ka? Pah le Kamos, hi uisneno teta nane, le anfe neu ki nane nabe'i anfani hi ini kun piut. Mes sa' le UISNENO, hai Uisneno anfe nalali neu kai, of hai amna' mihelan piut.

²⁵Ai ho muleko mnesi na'ko Nai Balak Nai Zipor anmone, kesel Moab? Nai Balak in kan laban nit kai fa ai in kan maken nok nit kai fa.

²⁶Ton natun tenu Israel natua Hesybon ma Aroer ma ale kuan le anfun natef nan sin, ma ale kot-kot anbi Noe Arnon ninen. Ma nansa' ho ka maiti mufani fa anbi tabu nane?

²⁷Kahaf, hai ka misanab fa neu ko. Ho es musanab natuin ho es aum ma amlaban kai. UISNENO In es alef lasi anbi neno i he nafek lasi i anbi nonot Israel ma uf Amon.”

²⁸Mes kesel Amon in kan nen fa lasi le na'ko Nai Yefta nane.

²⁹Oke te UISNENO In Smanan Knino antam neu Nai Yefta. Es nane te in anao ma nono pah Gilead ma Manasye nalali te anfani neu Mizpa anbi Gilead. Na'ko nane in anao anfini neu pah atoni Amon.

³⁰Oke te Nai Yefta anmo'e fef bela neu UISNENO nak, “Leka UISNENO nafetin kau ma au is ma be'u atoni Amon,

³¹ma au fani aum nok aomina ma sekau in es ahun-hunut anpoi na'ko au ume ma ansenu kau, of au u'tulu on fua u'tulu mnotu neu UISNENO.”

³²Oke te Nai Yefta in anlak Noe Yordan he nape' ma anken atoni Amon, ma UISNENO anfe lasi mnisat neu in.

³³Nai Yefta in nale'un naskuku sin ok-oke na'ko Aroer talantia pah Minit anfun natef — ok-oke kot bo'nua — ma antia Abel-Keramim. Atoni Amon anmate amfau le'uf, talantia sin an aetnon neu atoni Israel.

³⁴Leka Nai Yefta in anfani nem neu Mizpa, in anfeto anpoi nem nabso' ma neso a'kae ma ansenu in amaf. Nane in anfeto fua mese katit fa naof ma katit fa anfeto bian anteni.

³⁵Ma leka Nai Yefta in nit onane te, Nai Yefta in nekan antu' anae le'uf talantia in anpisu in bale pake, ma in anbai nak, “Koi au anah, au nekak in noe nain kun! Nansa' ho es amoe au nekak he nasusbon ka? Au sup ulali neu UISNENO, ma au ka nabe'i fa he hel ufani!”

³⁶Oke te anfeto nane nak neu Nai Yefta nak, “Ama hom sup mulali neu UISNENO, ma UISNENO anlomi nalali he nati' Ama hom senubanin lasi amle'ut atoni-atoni Amon, Ama ho musu sin. Es nane te, sa' le Ama ho mo'e mulali fef bela nane, namautu nai Ama ho munaoba.”

³⁷“Alaha,” anfeto nane namolok anteni nak, “au toti lasi mese: Amfe neu kau tabu funan nua he au u'on-oni anbi neten in tunan ok au biaf sin. Anbi nane au of a'kae neu au monik, natuin au of anmate anbi tabu au fe ao temef kau.”

³⁸In Amaf ankolan in, oke te nafetin in ma in anao. Anfeto nane ma in biafen sin anao neu neten in tunan hen kae ma ankul anbi nane, natuin in of anmate leka in fe kan mamone fa ma kan mu'i fa anah.

³⁹Leka funan nua namsopu te, in anfani nem neu in amaf, oke te in amaf nanaoba sa' le in anmo'e nalali fef bela neu UISNENO. Ma anfeto nane in anmate leka in fe ao temef. Nane es anfani lasi ahun-hunut nansa' anbi atoni Israel, anfani

⁴⁰halat mese ale anfeto anbi ton-ton sin anao neno bo'ha in a'lon he sin ankae ma ankul sin namnau Nai Yefta in anfeto anbi Gilead.