Read Uab Meto HAKIM-HAKIM 13 Bible Online

HAKIM-HAKIM 13 - Uab Meto bible

HAKIM-HAKIM 13

¹Atoni Israel anmo'e sanat anteni neu UISNENO, oke te UISNENO nafetin atoni Filistin naplenat sin ton bo'ha.

²Anbi tabu nane anmu'i atoni mese anbi kot Zora. In kanan Nai Manoah, na'ko uf Dan. In fenai ankiu.

³Mes anbi neno mese ahake UISNENO nalil'on neu in ma nak neune nak, “Kiso ho amkiu ma ka muhoni fa, mes ka lo fa anteni ho of muapu, ma mupeni anmone mese.

⁴Es nane te ampanat ho aom lek-leko. Kais ho minu tua mina mtasa ai mninut amafut, ma kais hom bukae mnahat le nalahi.

⁵Leka nahonis nalali ho anah nane, ka nabe'i fa he hom eu in anakan funun, natuin fe anbi ho apun natetab nalali in hen fani ate Uisneno. In es of anmabe'u he nafetin nonot Israel na'ko hamu'it atoni Filistin.”

⁶Oke te Nai Manoah in fenai anao neu in mone ma nak neune nak, “Tat, anmu'i haef Uisneno nem neu kau; in masan on ahake Uisneno, talantia au umtau. Au ka utoti fa in neu in nem na'ko me, ma in amsa ka naton fa in kanan neu kau.

⁷Mes in nak au of u'apu ma upeni anmone mese. In nak neu kau amsa nak ka nabe'i fa he au inu tua mina mtasa ai mninut amafut ai bukae mnahat le nalahi, natuin li'ana nane mes tana'at tani neu Uisneno hen fani ate Uisneno anbi in amonin.”

⁸Leka Nai Manoah in nen lasi nane, Nai Manoah in onen neu UISNENO, nak on i, “Koi UISNENO, kalu Hom lomi amsonu Ho ate nane anteni neu kai he naton neu kai sa' le mes hai he mo'e nok li'ana nane leka nahonis nalali in.”

⁹Uisneno In nen Nai Manoah in onen totis. Ahake UISNENO nane in nem anteni leka Nai Manoah in fenai fe antok-toko anbi in lene. Anbi tabu nane in mone kan bi fa bale nane.

¹⁰Es nane te, in naen anao natonan in mone neu lasi nane nak, “Tat, amkiso, atoni le afi nem neu kau nane, in nem anteni!”

¹¹Nai Manoah nok lab-laba anao natuin in fenai. In anhaumak atoni nane ma natoti in nak, “Au Usi ko ho es afi meki beno alekot neu au fenai ka?” Ahake nane in natae nak, “Namneo.”

¹²Oke te Nai Manoah in natoti nak, “Kalu sa' le au Usi ho muton mulali le nane of anbol te, of li'ana le nane in mes hen tao ma anmo'e sa' ka. In amonin nane of onme ka?”

¹³Ahake UISNENO nane natae nak, “Ho fenai nane ka nabe'i fa he ninu tua mina mtasa ai mninut amafut, onane amsa ka nabe'i fa in anbukae sa' le na'ko hau tua min kase, ai in anbukae sa' le nalahi. In mes hen tao ma anmo'e sa' le naton nalali neune, ma ampanat he nati' katit fa sa' es le in kan tao ma kan mo'e fa.”

¹⁵Oke te Nai Manoah nak neune nak, “Amlomi Usi te ampao fe akleo. Hai of mihan ma mibalab bibi tipu mese neu ko Usi.”

¹⁶Mes ahake UISNENO nane nak, “Maski au pao bi i, au of ka bukae fa sa' le ho mubalab nane. Mes leka hom lomi he mubalab amsa, mubalab on fua u'tulu mnotu, ma mutu neu UISNENO.” Nai Manoah in fe ka nahin fa neu le namolok nok in le nane ahake UISNENO kun. Es nane te in nak, “Kalu onane, Usi hom lomi te muton kau fa ho kanam Usi, he nati' leka sa' le Usi ho muton nane anbol nalali te, hai amfe hai lasi tola neu ko Usi.”

¹⁸Mes ahake UISNENO nane nak, “Nansa' hom lomi he muhin au kanak? Au kanak nane kanaf amkakat kun.”

¹⁹Es nane te Nai Manoah in naiti bibi tipu mese nok ane kase akle'o oke te antao neu fatu tunan ma natulu nani neu UISNENO, In kun UISNENO le antao ma anmo'e ale lasi-lasi amkakat.

²⁰Leka ai aklahan fe ansae na'ko baki u'tulu nane, Nai Manoah nok in fenai sin nit ahake UISNENO nane ansae neu fafon anbi ai aklahan nane, an ali neno tunan. Anbi tabu nane Nai Manoah in nahin nak nane ahake UISNENO kun; es nane te in nok in fenai sin naluli ma nabes. Sin ka nit anteni ahake nane anteni.

²²Oke te Nai Manoah nak neu in fenai nak, “Namneo-namneo hit of atmate natuin hit tit talali Uisneno!”

²³In fenai natae nak, “Kalu UISNENO he namate kit, of In kan simo fa fuat le hit tatulu neu In; In amsa of kan nalila fa ale lasi i neu kit ai an etun kit lasi-lasi le in anaton neu kit le i.”

²⁴Funan fauk namuni te Nai Manoah in fenai nahonis li'anmone mese oke te in nakanab in Nai Simson. Li'ana nane anfonat ma nanae ma UISNENO anfe tetus ma athoen neno neu in,

²⁵ma leka in natua anbi um-ume uf Dan anbi Zora ma Esytaol atnanken, UISNENO In Smanan Knino anfe neune be'it ma matani.