Read Uab Meto HAKIM-HAKIM 14 Bible Online

HAKIM-HAKIM 14 - Uab Meto bible

HAKIM-HAKIM 14

¹Anbi neno mese Nai Simson in anao neu Timna ma in nit li'feto Filistin mese anbi nane.

²Oke te in anfani nem ma in nak neu in amnasi sin nak, “Au lomi li'feto Filistin mese anbi Timna. Au toti ama ma aina hi amnao hem toti in hen fani au fenai.”

³Mes in amnasi sin nak, “Nansa' ho amnao meu atoni Filistin he mupeni ho fenai anbi nane, fun sin le nane sin kan tam fa nonot UISNENO? Ai anbi hit nonot ma ai anbi hit uf ok-oke kan mu'i fa li'feto mese ka le anmatom nok ho lomim?” Nai Simson natae in amaf nak, “Mes li'feto Filistin nane es au lomi. Ma au toti ama ho amlomi hem toti in neu kau.”

⁴Nai Simson in amnasi sin ka nahin fa neu UISNENO es anmo'e Nai Simson antao lasi nane. Natuin, UISNENO In fe nami sona he nale'un atoni Filistin. Anbi tabu nane atoni Filistin sin naplenat atoni Israel.

⁵Es nane te Nai Simson nok in amnasi sin anao neu Timna. Leka sin nem antia lene tua min kase mese, Nai Simson in natef nok meo asu tipu mese. Meo asu nane nakunut,

⁶ma nok askeken Nai Simson in napeni be'it ma matani natuin UISNENO In kuasat. Oke te in anpisu meo asu nane neki in niman, onle meo asu nane on kun bibi ana mese. Lasi nane in ka natonan fa in amnasi sin.

⁷Nalali te Nai Simson in anao ma ansenu li'feto nane ma namolok nok in, natuin Nai Simson anlomi in.

⁸Neno fauk-fauk namuni te, Nai Simson in anao anteni he anmafe nok li'feto nane. Anbi lanan nane, in anbeo hen kiso nit meo asu amates le afi in namate nalali nane. Leka in nem antia bale nane in nit oni amfau le'uf antam anbi meo asu amates nane in aon, ma oni oef anmu'i amsa anbine.

⁹In naiti napoitan oni oef nane antao anbi in niman, oke te in anao anfini kun fun in anao nok te in anbukae oni oef nane. Nalali te in anao neu in amnasi sin ma in anbatin sin oni oef amsa, ma in amnasi sin anbukae amsa. Mes Nai Simson ka natonan fa sin neu oni oef nane in naiti na'ko meo asu amates nane.

¹⁰Leka Nai Simson in amaf anao neu li'feto nane in ume, Nai Simson anmo'e fesat anbi nane, natuin atoni munif sin antak anmo'e onane.

¹¹Leka atoni Filistin sin nit in, sin anbeti atoni munif bo'tenu he nok in.

¹²Oke te Nai Simson nak neu sin nak, “Au mu'i teka mese. Leka him tek man te, of au fe neu ki mese-mese pilu muti fe'u a'naka mese ma bale pake amasat pasan mese. Au fe ki neno hitu in a'lon leka tolas mafet mamonet i nanaobon, he nati' hi amtek mani.

¹³Mes kalu hi kam tek man, hi alki mese-mese amfe neu kau pilu muti fe'u a'naka mese ma bale pake amasat pasan mese na'ko hi es-es.” Oke te atoni-atoni Filistin nane sin nak, “Leko! Mufetin ho teka nem nai.”

¹⁴Oke te Nai Simson nak, “Bukae anpoi na'ko abukaet, ma min oni anpoi na'ko abe'it.” Leka neno tenu anfini te sin kan tek nahin fa teka nane.

¹⁵Es nane te leka neno ha namsopu te sin nak neu Nai Simson in fenai nak, “Ho mes amfuli ho mone he nati' in naton a'teka nane in otan neu kai. Leka kahaf, hai of motu ko mok ho amsa ume nanan meki ai. Ait hom hone kai he muneku ale hai maus ka!”

¹⁶Oke te, Nai Simson in fenai anao neu Nai Simson ma ankae ma nak, “Au uhin ho kam nek kau fa. Nansa' hom fe teka mese neu au biaf sin, mes ho ka muton fa in otan neu kau? Namneo ho mutoan kau!” Mes Nai Simson nak, “Ampao fe! Neu au mnasi sin amsa au ka utonan fa sin, nansa' au he uton neu ko?”

¹⁷Anbi neno hitu fesat nane nanaobon Nai Simson in fenai ankae piut. Ma natuin in antoti piut, ma ankaen in mone ka nas-nas nit fa, onane te anbi neno hitu namsopu Nai Simson naton a'teka nane in otan neu in fenai. Oke te Nai Simson in fenai nane naton nani neu atoni-atoni Filistin.

¹⁸Es nane te anbi neno hitu nane nahun na'ko manas fe kan mofu fa, atoni-atoni kot nane sin nak neu Nai Simson nak, “Sa' namin anesin min oni, oni hau ka? Sa' nabe'in nesin meo asu ka?” Nai Simson natae nak, “Leka hi kam bet fa aen oek meki au bijae tipu, hi kam tek man fa au teka nane!”

¹⁹Mes nok askeken Nai Simson in napeni be'it ma matani natuin kuasat UISNENO, oke te in anao neu Askelon. Anbi nane in namate atoni bo'tenu le sin anpake bale pake amasat leok le'uf. In naiti sin bale pake nane ma in anfe nani sin neu atoni bo'tenu le sin antek nan in a'teka nane in otan. Oke onane te, in anfani neu in amaf ume nok nek susal.

²⁰Oke te in ama-babaf anfe Nai Simson in fenai nane neu atoni le anfani atuin neu Nai Simson anbi tabu mafet mamonet nane.