Read Uab Meto HAKIM-HAKIM 15 Bible Online

HAKIM-HAKIM 15 - Uab Meto bible

HAKIM-HAKIM 15

¹Neno fauk-fauk namuni te, leka tabu lefi ane kase antia, Nai Simson in anao ma ansenu in fenai. In neki bibi tipu mese neu in fenai. Nai Simson nak neu in ama-babaf nak, “Au lomi he tam eu ke'an he utef ok au fenai.” Mes in ama-babaf ka nafetin fa in.

²In nak neu Nai Simson nak, “Au utenab ak ho muto'an in namneo-namneo, es nane te, au fe ulali in neu ho biaf. Mes nabe'i ho maiti in olif. In namas annesi.”

³Oke te Nai Simson natae nak, “Sa' le of au tao ma mo'e neu atoni Filistin anbi tabu le i, nane au ka usanab fa!”

⁴Oke te in anao ma anheke asu fui natun tenu. Asu fui nane sin ikon in anfutu sin nua-nua. Anbi futus nane in atnanan, in antao nopo' mese.

⁵Oke te in notu nopo' nane ok-oke ma nafetin ale asu fui nane antam neu atoni Filistin sin lene. Ma ale ane kase le fe anlefi nalali anbi nane anputu nani ok-oke. Nesi na'ko nane te ale ane kase le fe anbi lene ma ale tua min kase sena anbi lene amsa anputu nani ok-oke.

⁶Atoni-atoni Filistin anao ma antae naleko-leko neu sekau es anmo'e lasi nane. Oke te atonas naton neu sin nak Nai Simson in es anmo'e lasi nane, natuin in ama babaf anbi Timna anfe nalali Nai Simson in fenai neu Nai Simson in biaf. Es nane te atoni Filistin sin notu bifel nane nok in amaf ume nanan ok-oke neki ai.

⁷Oke te Nai Simson in nak neu atoni Filistin sin nak, “Onane ka hi mo'e lasi senu banit ka? Au sup au of ka usnas fa leka au fe ka senu banin fa lasi i neu ki!”

⁸Nalali te in nem ma anlaban sin nok maufinu ma namate sin amfau le'uf. Oke onane te, in anao ma natua anbi nuat in nanan anbi neten fatu mese anbi Etam.

⁹Oke te atoni Filistin sin nem neu pah Yehuda ma sin nahakeb sin um-ume anbi nane, nalali te sin anlaban kot Lehi tuaken.

¹⁰Atoni Yehuda sin natoti atoni Filistin sin nak, “Nansa' hi aim hem laban kai?” Sin natae nak, “Hai aim hem heke Nai Simson he nati' hai mo'e in onle in anmo'e kai.”

¹¹Leka sin nen lasi nane te atoni Yehuda nifun tenu sin anao neu nuat anbi tubu fatu anbi Etam. Anbi nane sin nak neu Nai Simson nak, “Simson, ai ho ka muhin fa ka neu atoni Filistin. Sin naplenat kit ka? Ho mo'e lasi sa' neu kai ka!” Nai Simson natae nak, “Au al a'moe senu banin sa' le sin anmo'e neu kau.”

¹²Oke te sin nak, “Hai aim neu hem futu ko ma mina'at ko neu atoni Filistin sin. Mes Nai Simson in nak, “Hi manba'an mihunu fe neu of hi ka mimate kau fa.”

¹³“Leko,” sin nak onane, “namneo hai al hem futu ko ma mina'at ko neu atoni Filistin sin. Hai of ka mimate ko fa.” Oke te sin anfutu in neki tani nono nua le fe fe'u, ma sin neki in anao na'ko nuat nane.

¹⁴Leka sin neki Nai Simson nem antia Lehi, onane te atoni-atoni Filistin sin naen nem ma ansenu in ma sin naba'. Mes nok askeken in napeni be'it ma matani natuin UISNENO In kuasat. Ale tani le anfutu in niman nane in nafek nani sin onle tani nane tani le namnoe kun.

¹⁵Nalali te, in napeni bikase luke mnanu in nui su'in le fe fe'u oke te in anpake ma in neso atoni 1.000 talantia sin anmate.

¹⁶Ma Nai Simson in ansi nak, “Au tepo umate atoni nifun mese, eki bikase luke mnanu in nuif; au tupu' sin aon nitun, eki bikase luke mnanu in asu'in.”

¹⁷Nalali onane te, in anpolin nuif asu'if nane. Es nane te bale nane nakanab nak Ramat-Lehi.

¹⁸Nalali te Nai Simson in anaben anmeno anmate, talantia in ansakoi neu UISNENO nak, “Koi UISNENO, Ho es amfe mulali kau lasi mnisat anaek neu kau. Tabu i au mes he mate ka natuin au meno oe, talantia atoni Filistin le sin ka nahin Ko fa sin hen heke kau ka?”

¹⁹Nalali te Uisneno anfai bola' anbi tubu fatu anbi Lehi, oke te oe anpoi na'kone. Nai Simson in ninu, ma in nekan anfani. Es nane te oe mata nane antek nak Oe Mata Hakor. Oe mata nane fe nabalah anbi Lehi antia neno i.

²⁰Ton bo'nua Nai Simson in naplenat to Israel on alef lasi anbi tabu atoni Filistin naplenat sin.