Read Uab Meto HAKIM-HAKIM 16 Bible Online

HAKIM-HAKIM 16 - Uab Meto bible

HAKIM-HAKIM 16

¹Anbi neno mese Nai Simson in anao neu Gaza. Anbi nane in nit bife amapaisa mese oke te in anao ma antup nok bife nane.

²Ma tuafen Gaza sin nen nak Nai Simson in anbi bale nane. Es nane te, sin anfun natef nan bale nane ma sin anpao in anbi fai nane anbi kot nane in baki lape enon. Mes sin kan mo'e fa sa'-sa' anbi fai nane natuin sin natenab nak, “Leka manas anpe', oke te hit tamate in.”

³Mes Nai Simson in kan tup fa anbi bale nane talantia manas anpe'. Mes anbi fai atnanan in anfen ma in anao neu baki lape kot in enon. In anpukai eno nane ok-oke nok ale in ni sin nok ale in kuasat ok-oke. Oke te in naiti eno nane neu in hanun, ma in neki neu nu'af tunan anbi Hebron aon bian.

⁴Nalali te Nai Simson in nekan anmofu neu bife mese na'ko Nonof Sorek. Bife nane in kanan bi Delila.

⁵Es nane te nakaf nim na'ko Filistin sin nem neu bife nane ma nak neune nak, “Amfuli Nai Simson he nati' in naton neu ko in lasi tolo' na'ko in matanin nane, ma nok lasi sa' ka he taneku in matanin nane. Nok nane te hai nabe'i aim ma amfutu in he hai mis ma ambe'u in. Mes hai mese-mese of amfe neu ko noni muti 1.100.”

⁶Es nane te bi Delila nak neu Nai Simson nak, “Simson, nansa' ho mube'i matain le'uf onle nane? Mes hen futu ko neki sa' ka he nati' ho be'im le nane namneku? Bait ho muton kau in lasi tolo' nane!”

⁷Nai Simson natae nak, “Leka anfutu kau neki tani aklaot nono hitu le fe kan meto fa leko, of au ole ma au fani onle atoni bian.”

⁸Oke te ale anakaf Filistin nane sin anfe neu bi Delila tani aklaot fe'u nono hitu le fe kan meto fa leko. Nalali te, atoni Filistin sin anpao anbi ke'an bian, ma bi Delila in anfutu Nai Simson neki tani-tani nane oke te no'en in nak, “Simson! Atoni Filistin sin nem!” Nai Simson in nafek tani-tani aklaot nane. Tani-tani nane natfek onle tani abas antom ai ma natfek. Lasi tolo' Nai Simson in be'in fe ka natonon fa.

¹⁰Oke te bi Delila nak neu Nai Simson nak, “Ah, ho mumoe! Ho al he mumaeba kau. Neu nai, muton kau nai nabe'i anfutu ko neki sa' ka!”

¹¹Nai Simson natae nak, “Leka anfutu kau neki tani fe'u le fe kan pake nani fa, of au ole ma fani onle atoni bian.”

¹²Atoni Filistin fe sin anpao anbi ke'an bian, onane te bi Delila in naiti tani fauk-fauk le fe fe'u, oke te anfutu Nai Simson. Nalali te in no'en nak, “Simson! Atoni Filistin sin nem!” Mes Nai Simson in nafek tani-tani nane na'ko in niman onle atoni nafek abas.

¹³Oke te bi Delila nak neu Nai Simson nak, “Ah, ho mumaeba kau anteni. Ho mumoe. Neu nai muton neu kau nai nabe'i anfutu ko neki sa' ka!” Nai Simson natae nak, “Leka au nakak funun nono hitu an ane sin neu tani abas anbi bale tenu' nalali te anfutun sin neu hau bale tenu' nane, of au ole ma fani onle atoni bian.”

¹⁴Onane te bi Delila in anmo'e Nai Simson ma antup oke te in an ane Nai Simson in nakfunu nono hitu neu tani abas anbi bale tenu' nane. Nalali onane te in anfutun sin neu hau bale tenu' nane oke te in no'en nak, “Simson! Atoni Filistin sin nem!” Nai Simson in anfen amsa oke te in antet in nakfunu sin talantia nafetnon na'ko bale tenu' nane.

¹⁵Nalali te bi Delila nak neu Nai Simson nak, “Ah, ho mak hom nek kau mes ho nekam in na'lo na'ko kau! Haef tenuen ho mumaeba kau, ma talantia neno i amsa ho kam lomi fa he muton kau nansa' ho mube'i ma matani onane.”

¹⁶Fun neno-neno bi Delila antoti piut ma ankaen Nai Simson ma naseke in, talantia Nai Simson anlen anmate anen in.

¹⁷Anbi amsoput Nai Simson naton in lasi tolo' nane. “Fe kan eu nit fa au nakak funun sin,” Nai Simson in nak onane. “Nana'at nalali kau neu Uisneno anfani in-ini kun le anbeti nateta nani. Na'ko nahonis kau au fani ulali atoni le una'at au aok neu mepu Uisneno. Leka an eu au nakak funun au be'ik au matanik of namneku; of au ole ma fani onle atoni bian.”

¹⁸Bi Delila in naben nak Nai Simson naton nalali neune in lasi tolo' in nekan nanan. Es nane te in ansonu haef neu ale anakaf Filistin nak, “Aim nai hae mese anteni le i. Nai Simson in naton nalali in lasi tolo' nane neu kau.” Sin al-al sin nem ma sin neki noni neu bi Delila.

¹⁹Oke onane te bi Delila anfuli Nai Simson talantia antup anbi in aifan, oke te in no'en atoni mese ma anlenu in an eu Nai Simson in anakan funun nono hitu le an ane sin nane. Nalali te anhamu'i Nai Simson, natuin Nai Simson in be'in in matanin nane namneku nalali.

²⁰Oke te in no'en nak, “Simson! Atoni Filistin sin nem!” Nai Simson in anfen ma natenab nak nabe'i in nafetnon onle tabu-tabu ahunut. In ka nahin fa neu UISNENO nasaitan nalali in.

²¹Oke te atoni-atoni Filistin anheke in ma anlo'i napoitan in matan fuanen. Sin neki in neu Gaza ma anfutu in neki kolen besi niti molo nua, oke te natam in neu o'of nanan. Anbi o'of in nanan in anmepu anfole fatu fole.

²²Mes anbi tabu nane in anakan funu sin anmoni anfani anteni.

²³Anbi neno mese ale anakaf kot pah Filistin sin nabua hen mo'e fesat ma natulu fua u'tulu anaek neu Dagon, sin uisneno teta. Sin ansi nak, “Hit uisneno teta anfe nalali neu kit lasi mnisat antom Nai Simson, hit musu nane!”

²⁴Leka sin fe namlil ma namoke sin nak, “Meki Nai Simson nem neu i he nati' in namanib kit!” Ma sin naiti Nai Simson na'ko o'of, ma in namanib sin. Sin anlenu in anhake anbi ni nua sin atnanken. Leka atoni amfaun nane sin nit Nai Simson, sin naliatas sin uisneno teta Dagon ma sin ansi nak, “Hit uisneno teta anfe nalali neu kit lasi mnisat antom hit musu le nale'un nalali hit pah ma le namate hit atoni amfau le'uf!”

²⁶Ma Nai Simson nak neu li'mone le antopu in nak, “Mufetin kau fa au nimak he nati' au ana' neu ale ni le ansutai ume i, natuin au lomi he sonlaitok anbi nane.”

²⁷Ume nane nahenu nok atoni amfau le'uf. Ma anakaf nim na'ko pah Filistin sin amsa nok anbi nane. Ma ume penen amnela abit fafon atoni oni 3.000 nahenu anbi nane. Sin al-al sin ankiso ma anmanis Nai Simson.

²⁸Anbi tabu nane Nai Simson in onen; in nak, “Koi, UISNENO Anesit Afinit, Hom nek ma mumnau kau fa. Amfe neu kau fa hae mese anteni be'it ma matani, koi Uisneno, he nati' nok lasi i au senu banin atoni Filistin le anlo'i napoitan au matak fuaken.”

²⁹Nalali te Nai Simson in ana' ni nua en anbi ume atnanan le ansatui ume nane. Oke te in niman a'li ana' neu ni mese ma in niman a'ne'u neu ni bian,

³⁰oke te in anbai nak, “Mautu he au mate ubua ok ale atoni Filistin i!” Ma nok in be'in in matanin ok-oke in antite ale ni nane talantia natsel ma nameku nan anakaf nim na'ko Filistin nane nok ale atoni bian ok-oke le sin anbi nane. Nai Simson in anmate amsa. Mes, anbi neno nane in namate atoni namfau nesi na'ko neno fe in anmoni.

³¹Nalali te ale in olif tataf sin ma in amaf ume nanan sin nem ma anloi in aon nitun nane. Sin neki in aon nitun nane anfani, ma ansub in anbi naukel Nai Manoah, in amaf ini. Naukel nane anbi Zora ma Esytaol atnankenu. Nai Simson in naplenat Israel on aleh lasi ton bo'nua in a'lon.