Read Uab Meto HAKIM-HAKIM 17 Bible Online

HAKIM-HAKIM 17 - Uab Meto bible

HAKIM-HAKIM 17

¹Anmu'i atoni mese kanan Nai Mikha. In natua anbi neten Efraim.

²Atoni neno mese in nak neu in ainaf nak, “Ain, leka ho noni muti nifun mese ma natun mese namneku, au nen ainaf hom sukat abakat nane. Noni nane, es i ain! Au es ubak noni nane.” In ainaf natae nak, “So nati' UISNENO nasanut In tetus neu ko, koi au anmone!”

³Nai Mikha anfe nafani noni muti nane neu in ainaf, oke te in ainaf nak neune nak, “He nati' ho, koi au anah, ho mufetnom na'ko sukat le au utiaba ulali nane, au u'tulu noni muti i neu UISNENO he nati' anmo'e hau le'u mahuma le matesi neki noni muti. Es nane te, au fe ufani noni nane neu ko.”

⁴Ma leka Nai Mikha anfe nafani noni muti nane neu in ainaf, in ainaf naiti nan noni muti natun nua na'ko noni muti nane, ma in anfe sin neu apakaet noni muti nane. Oke te in anlenu apakaet noni muti nane anmo'e le'u mahuma mese na'ko hau le an amu nani neki noni muti matesi. Nalali te le'u mahuma nane antao nani anbi Nai Mikha in ume.

⁵Nai Mikha amsa in anmu'i kun ume le'u bale luli besa. In anmo'e le'u mahuma fauk-fauk ma in anmo'e Efod oke te in naiti in anmone mese anfani Ana' fuat knino.

⁶Anbi tabu nane to Israel sin kan mu'i fa kesel; es-es anmo'e kun sa' le in natenab nak nane leko.

⁷Anbi batan nane amsa anmu'i atoni munif mese na'ko uf Lewi. Afi ahunut in natua anbi Betlehem anbi pah Yehuda.

⁸Mes in nasaitan kot nane ma in anao ma in nami bale bian he in natua anbine. Anbi lanan in anao nane in nem antia Nai Mikha in ume anbi bale neten pah Efraim.

⁹Nai Mikha natoti in nak, “Ho mu'ko me ka?” Atoni nane natae nak, “Au atoni Lewi kau au aum na'ko Betlehem anbi pah Yehuda. Au fe ami bale he utua.”

¹⁰Nai Mikha nak, “Mutua mok kau anbi i, he nati' hom fani hai afainekat ma hai Ana' fuat knino. Of ton-ton au fe neu ko noni muti bo'mese, bale pake ma mnahat amsa.”

¹¹Ma atoni munif uf Lewi nane in anlomi, oke te Nai Mikha naiti in anfani in Ana' fuat knino. In natua anbi Nai Mikha ume ma Nai Mikha anmo'e in on in anmone kun.

¹³Ma Nai Mikha nak neune nak, “Anbi tabu i au uhin nak UISNENO of anmo'e alekot neu kau natuin anmu'i atoni Lewi mese le anfani Ana' fuat knino nalali neu kau.”