Read Uab Meto HAKIM-HAKIM 19 Bible Online

HAKIM-HAKIM 19 - Uab Meto bible

HAKIM-HAKIM 19

¹Anbi tabu Israel fe kan mu'i fa kesel anmu'i atoni Lewi mese natua anbi pah neten Efraim. In anmafe nok bife mese na'ko Betlehem Yehuda anfani in fenai kliko.

²Mes namuni te bife nane nato'an in, talantia in naen anfani kun neu in amaf ume anbi Betlehem. Leka bife nane namaika funan ha in alon,

³atoni Lewi nane anao natuin in ma anfuli bife nane hen fani nem neu in. In anao nok in ate mese ma bikase luke mnanu nua. Leka nem antia bale nane, bife nane neki in neu in amaf. Leka bife nane in amaf nit atoni nane, in ansimo atoni nane nok amlilat,

⁴ma naseke in he nati' kais neki nafani. Es nane te, in namaika neno tenu ma in nah ma ninu ma antup anbi nane nok in fenai kliko nane.

⁵Anbi neno ha te, sin anfen nok-nok ana oke te naloitan neu sin hen fen he nao. Mes bife nane in amaf nak neu atoni Lewi nane nak, “Ambukae fe he nati' ho matani. Nalali te hi amnao nai.”

⁶Onane te atoni Lewi nane in antoko oke te in nah ma ninu nabua nok bife nane in amaf. Mes leka in anfen he nao, bife nane in amaf anfuli in anteni he nati' kais in anao. “Mumlil ma mum'oke fe,” in nak onane, “ma amtup nai anbi i.” Es nane te atoni Lewi nane antup anteni fai mese.

⁸Anbi neno nim te, fe nok-nok ana', leka in hen fen he nao, bife nane in amaf nak neune anteni nak, “Neu nai, ambukae nai fe; oke fe te amnao nai.” Es nane te sin nua sin anbukae nabua ma nania'ok talantia manas antes.

⁹Namuni te, leka atoni Lewi nane nok in fenai kliko ma in ate sin anfen he nao, bife nane in amaf namolok nak, “Manas hen tesan, ma ka lo fa anteni anmes'oken. Leko nesi amtup nai anbi i ma amalin nai. Noka fa hi amfen nok-noka ma amfani nai.”

¹⁰Mes atoni Lewi nane in kan lomi fa hen tup anteni anbi nane. In nok in fenai kliko nane sin anfen ma anao, nok in ate ma in bikase luke mnanu nua en nane la na'peni nalali sin. Leka manas hen tes, sin nem anhaumak Yebus (nane Yerusalem). Oke te ate nane in nak neu in Usi nak, “Usi, aum he hit atam ma atup bi atoni Yebus sin kot i.”

¹²Mes in Usi natae nak, “Kahaf! Hit of ka tasnas fa atbi bale le tuaken ka atoni Israel fa. Aim he hit atnao piut akle'o anteni ma of hit atup anbi Gibea ai Rama.”

¹⁴Es nane te sin anao piut ma sin ka nasnas fa anbi Yebus. Fun manas antes leka sin nem antia Gibea anbi pah uf Benyamin.

¹⁵Sin antam anbi nane hen tup, oke te sin antam neu kot ma sin anao ma antoko anbi bale menuan anbi kot nane. Mes katit fa es amsa le hen hone sin neu in ume hen tup.

¹⁶Leka sin fe antoko anbi bale menuan anbi kot nane, atoni mnasi mese le fe anfani nem na'ko in mepu anbi in lene. Atoni nane namneo in na'ko neten Efraim mes in natua anbi Gibea. (Ma bale Gibea in tuaken bian nane atoni Benyamin.)

¹⁷Leka atoni mnasi nane in nit atoni Lewi nane antoko anbi bale menuan anbi kot nane, in natoti atoni nane nak, “Ho mu'ko me, ma ho hem nao meu me ka?”

¹⁸Atoni Lewi nane natae nak, “Hai fe aim na'ko Betlehem bi pah Yehuda, ma hai hem nao amfani meu hai ume anbi neten Efraim. Au aum na'ko bale nane. Katit fa es amsa anbi kot i tuaken hen simo kai anbi in ume he hai amtup.

¹⁹Hai kam toti fa sa'-sa' bian, hai mnahat nanokbon. Au eki ane ta'u ma mnahat neu hai bikase luke mnanu ain; hai meki utunu' ma tua mina mtasa neu kau ma au fenai ma au ate.”

²⁰Oke te atoni mnasi nane nak, “Kais mumtau, of au bab ko. Kais hom tup anbi bale menuan anbi kot i.”

²¹Nalali te in neki sin neu in ume oke te anfe haot neu sin bikase luke mnanu sin. Ma leka sin anboe nalali sin haeken, oke te sin anbukae.

²²Leka sin fe namlil, onane te nok askeken atoni-atoni amle'ut na'ko kot nane sin an aum nan ume nane. Sin antutu ume nane in eno ma nak neu atoni mnasi nane nak, “Muna'at neu kai atoni le fe ho meki in neu ho ume. Hai amlomi hem pake in!”

²³Atoni mnasi nane anpoi ma nak neu sin nak, “Kaisa, au bia ki! Au toti neu ki, kais hi mo'e lasi amle'ut ma le kan tam fa ota nane natuin in le nane atoni le nem neu kau.

²⁴Of au fe neu ki au fe kliko ma au anfeto neu ki. Nabe'i hi minokab hi lomim mok in. Mes, kais hi mo'e lasi amle'ut sa'-sa' neu atoni le nem neu kau le i!”

²⁵Mes natuin atoni-atoni amle'ut nane sin nahel piut, onane te atoni Lewi nane antite napoitan in fenai kliko nane neu sin. Oke te sin antup nokan anbi fai teme mese ka nasnas fa talantia anmeu anfani.

²⁶Anbi noka fa manas fe hen sae sin nafetin bife nane ma in anfani, mes in anbel anbi atoni mnasi nane in ume enon, bale in mone antup anbine. Leka manas ansae bife nane nabalah anbi nane.

²⁷Anbi noka nane, leka in mone anfen ma anfai eno he nao, in napeni in fenai kliko nane antup anbi afu anbi ume nane enon, nok in niman ana' anbi eno.

²⁸“Amfen nai,” in nak neune onane, “aum he hit atnao nai.” Mes bife nane in ka natae fa natuin in anmate nalalien. Oke te, in naiti bife nane ma nasaeba in ta'un neu in bikase luke mnanu, nalali te in anao anfani neu in ume.

²⁹Leka in antia in ume, in antam ma naiti besi nalali te in anheli in fenai kliko nane in ta'un anfani pisa bo'mese am nua. Nalali te, in ansonu pisa-pisa nane neu uf Israel bo'es am nua, es-es te pisa mese.

³⁰Atoni ok-oke le sin nit lasi nane sin nak, “Fe katit fa lasi onle i le hen bol, na'ko to Israel anpoi na'ko Mesir talantia neno i. Ka nabe'i fa he ka tao fa nekak neu lasi i. Hit mes he tauab ma tamolok ma taiti taos mo'et neu lasi i!”