Read Uab Meto HAKIM-HAKIM 2 Bible Online

HAKIM-HAKIM 2 - Uab Meto bible

HAKIM-HAKIM 2

¹UISNENO In ahake anao na'ko Gilgal neu Bokhim ma nak neu atoni Israel nak, “Au upoitan ulali ki na'ko Mesir, ma Au eki ki neu pah le Au ba'an ulali neu hi amfenu. Au uton ulali amsa, ‘Au of ka ufek fa fef bela anbi Kau ok ki.

²Es nane te ka nabe'i fa hi mo'e lasi mafutus sa' es nok pah i sin tuaken. Ale sin baki fuat hi mes ampukai mani.’ Mes hi ka mo'e fa sa' le Au uplenat ulali nane. Mes hi mo'e milali sa' le ka nabe'i fa he hi mo'e!

³Es nane te, amnen nai! Au of ka li'u fa atoni-atoni pah i leka hi amaken mok sin. Sin of anfani hi musu sin, ma hi of amtam anbi sin akleot in nanan, talantia hi mok miluli mibes neu sin uisneno teta sin.”

⁴Leka Ahake neno tunan nane naton nalali neu sin lasi nane, to Israel ok-oke ankae nok hana naek.

⁵Es nane te bale nane nakanab nak Bokhim. Oke te anbi bale nane atoni Israel sin natulu fua u'tulu neu UISNENO.

⁶Leka Nai Yosua nafetin nalali to Israel anao, sin amsa anfen ma anao he natua pah le anfani nalali pah bale bela mese-mese neu sin.

⁷Leka Nai Yosua fe anmoni, atoni Israel sin namtausan UISNENO. Ma leka Nai Yosua anmate nalali amsa sin namtausan UISNENO nabala leka ale atopus ma ana'at sin le nane atoni-atoni le nit neki sin matken neu ale lasi sanmakat le UISNENO antao ma anmo'e neu atoni Israel.

⁸Nai Yosua Nai Nun — anmone UISNENO In ate nane — in anmate anbi tabu in ton natun mese ma bo'mese.

⁹Ma sin ansub in anbi in pah bale bela kun, anbi Timnat-Serah anbi neten Efraim antom bian a'li Tubu Gaas.

¹⁰Namuni te ale batan nane ok-oke anmate amsa. Ma batan amunit ka nahin fa UISNENO, natuin sin ka naeku nok fa sa' le UISNENO anmo'e nalali neu nonot Israel.

¹¹Namuni te atoni Israel nasanab neu UISNENO. Sin ka naluli nabes fa neu UISNENO, sin amfenu Uisneno, le neki sin anpoi nalali na'ko Mesir. Sin naluli nabes neu Baal ma Asytoret ma uisneno teta bian le ale uf le anfun natef sin naluli nabes neune. Es nane te UISNENO nato'an sin ma nana'at sin neu asikat talantia anlaban sin ma nasik sin sa'-sa'. Sin kan hake nabe'i fa anbi sin musu sin matan le anfun natef sin.

¹⁵Fun hae-hae leka sin anao hen makenan, UISNENO anlaban sin, onle In namnauba nalali sin. Ma sin naeku nok mafena anae le'uf.

¹⁶UISNENO anfe neu sin atomatas piut-piut neu he nafetin sin na'ko asikat le nasik sin.

¹⁷Mes sin ka nen fa ale atomatas nane. Sin naluli nabes neu uisneno teta bian, ma sin ka na'ki fa neu UISNENO. Sin ka natuin fa monit na'ko sin amfenu le natuin In plenat-plenat UISNENO.

¹⁸Leka UISNENO anfe atomatas mese neu Israel, UISNENO anbab atomatas nane piut. Ma leka atomatas nane fe anmoni, UISNENO nafetin sin piut na'ko sin musu-musu sin. In nek ma namnau sin leka In nen sin han anbait natuin anhamu'i sin ma anhalelat sin.

¹⁹Mes leka atomatas nane anmate, to nane antao ma anmo'e sanat anae le'uf anteni nesin batan ahunut. Sin an aetnon neu uisneno teta ma naluli nabes neu ale uisneno teta nane. Sin anfani koti neu sin taos mo'et amle'ut ma kan lomi fa he nate'un sin taos sin mo'et.

²⁰Es nane te UISNENO nato' anae le'uf neu to Israel, ma nakua a'an nak, “Au fe ulali plenat neu nonot i sin amfenu he nati' sin ana' nahel lasi manba'an anbi Kau ok sin. Mes nonot i sin nafek nalali lasi manba'an mafutus nane; sin antanhai Au plenat sin.

²¹Es nane te Au ka lomi fa he li'u uf mese amsa le fe natua anbi pah i anbi neno Nai Yosua anmate.

²²Au of apake uf-uf nane he Au su' nonot Israel, he nati' Au uhin nonot Israel anlomi he natuin ale Au plenat sin onle sin amfenu, ai kahaf.”

²³Es nane te UISNENO kan fe fa lasi mnisat neu Nai Yosua neu uf-uf nane. Mes UISNENO nafetin sin natua anbi pah nane, ma kan li'u fa sin nok laba.