Read Uab Meto HAKIM-HAKIM 20 Bible Online

HAKIM-HAKIM 20 - Uab Meto bible

HAKIM-HAKIM 20

¹Oke te to Israel na'ko Dan sin nem na'ko bian a'li antia Bersyeba bian a'ne'u, ma Gilead anbi neno saen, he nanokab han amno'en nane. Sin nabua ma nekaf mese anbi Mizpa anbi UISNENO In human In matan.

²To meo ok-oke atoni 400.000 na'ko to meo anao haet. Ale anakaf na'ko uf mese-mese nonot Israel sin al-al sin nokan amsa anbi nane.

³Onane te atoni uf Benyamin sin nen nalali nak ale atoni Israel bian sin nabua nalali anbi Mizpa. Oke te atoni-atoni Israel nane sin natoti atoni Lewi le namate in fenai kliko nane nak, “Bait ho muton neu kai lasi amle'ut nane in anbol onme ka!” Atoni Lewi nane in natae nak, “Au ok au fenai kliko hai amtam anbi Gibea anbi pah Benyamin ma hai amtup anbi nane.

⁴

⁵Nalali te atoni Gibea sin nem ma nami kau anbi fai nane. Sin aniusnan ume bale au tup a'bine he namate kau, mes namuni te sin antup nok au fenai kliko ma nale'un in talantia in anmate.

⁶Onane te au aiti in ta'un ma au heli pisa-pisa, nalali te au sonu ani neu uf bo'es am nua anbi hit nonot es-es te pisa mese. Au mo'e lasi nane natuin atoni-atoni Gibea nane sin anmo'e nalali lasi amle'ut mese le neki lasi mae anbi nonot Israel.

⁷Hi al-al ki mibua anbi i hi atoni Israel ki. Es nane te au toti hi al-al ki amtai lasi i nai!”

⁸Nok hanaf mese atoni-atoni le nabua anbi bale nane sin anfen ma nak, “Hit al-al kit katit fa es le hen fani neu in um-ume ai in ume.

⁹Lasi le i esle' of hit atmo'e: Hit athel sulat neu he atbeti atoni-atoni le mes sin hen laban Gibea.

¹⁰Of na'ko ale atoni mone Israel hit bati bo' na'ko sin le he naloitan mnahat neu sin le sin hen makenan. Ma bian sin anao hen laban Gibea he nati' ankas sin natuin sin mo'et amle'ut anbi nonot Israel.”

¹¹Onle nane nonot Israel sin nekaf mese ma anlaban Gibea.

¹²Oke onane te nonot Israel ansonu atoni anfun natef uf Benyamin ma natiaba sin lasi i: “Amle'ut sa' le anbol anbi ki ka?

¹³Mina'at kai atoni-atoni amle'ut na'ko Gibea he nati' hai mimate sin ma nok nane te hai mineku mani lasi amle'ut nane na'ko Israel in sonan in atnanan.” Mes atoni Benyamin sin ka nen fa uab molok na'ko atoni-atoni Israel bian nane.

¹⁴Mes anesi na'ko nane te atoni-atoni na'ko ale kot anbi pah Benyamin sin nem neu Gibea he sin anmaken nok atoni-atoni Israel bian nane.

¹⁵Neno nane sin anibun ma nabuab na'ko sin kot-kot to meo amfaun 26.000. Ma atoni Gibea amsa sin anibun ma nabuab nalali atoni mabeti 700. Sin al sin atoni a'li le mahine leka anpoli neki finu fatu, kan san nit fa fatu mese.

¹⁶

¹⁷Anbi atoni Israel bian nane amsa sin nabua nalali maso'ik ok-oke atoni amfaun 400.000 to meo le mabeti anbi makenat.

¹⁸To meo Israel nane sin anao neu bale luli besa anbi Betel, ma sin natoti Uisneno nak, “Koi UISNENO, uf me ka es na'ko kai es mes hen poi nahunu hen maken nok atoni Benyamin?” UISNENO natae nak, “Uf Yehuda.”

¹⁹Ma noka fa onane te sin anfen ma anao ma nahakeb sin um-ume anhaumak kot Gibea.

²⁰Sin nahakeb sin to meo anmaketin mabaina nok kot Gibea, oke te sin nape' ma anken kot nane.

²¹Fun to meo uf Benyamin sin anpoi ma anlaban sin amsa ma sin namate to meo Israel atoni 22.000 anbi neno nane amsa.

²²Natuin uf Benyamin nis ma anbe'u nonot Israel, onane te nonot Israel sin anao neu bale luli besa oke te sin ankae anbi UISNENO anbi bale nane talantia anfai. Sin natoti nak, “Koi UISNENO, mes hai hem nao amteni ka hem laban ma amken hai biaf sin atoni-atoni Benyamin nane ka?” UISNENO natae nak, “Leko, hi amnao nai.” Es nane te to meo Israel sin anhataniok anteni, talantia sin nabalab nafani sin to meo nane on neno ahunut.

²³

²⁴Nane hae nua sin anao anlaban to meo uf Benyamin.

²⁵Ma hae nua nane amsa atoni-atoni Benyamin anpoi ma anlaban sin amsa. Hae es le i sin namate to meo makenat Israel atoni 18.000.

²⁶Onane te to Israel sin anao anteni neu Betel ma sin ankae neu UISNENO. Anbi nane sin nanahon talantia anfai ma natulu fua u'tulu halan ma fua u'tulu mnotu neu UISNENO.

²⁷Anbi neno nane Peti Fef Bela Uisneno anbi Betel, ma Nai Pinehas Nai Eleazar anmone, Nai Harun upuf, in anmepu on Ana' fuat knino. Ma Israel sin natoti UISNENO nak, “Koi UISNENO, mes hai hem nao amteni ka he maken mok hai biafen atoni-atoni Benyamin nane, ai mes hai he misnasab makenat i ka?” UISNENO natae nak, “Amlaban sin nai! Anbi neno noka fa of Au fe lasi mnisat neu ki.”

²⁸

²⁹Leka UISNENO natae sin onane te atoni-atoni Israel natokob sin to meo makenat anbi bale-bale tolo' anfun natef Gibea.

³⁰Oke te anbi neno tenu sin antam ma anken to meo uf Benyamin ma sin anhake naketin mabaina nok Gibea onle sin anmo'e nalali anbi neno-neno ahunut.

³¹Atoni-atoni uf Benyamin sin anpoi ma anken sin amsa, ma anfuli sin hen poi na'ko kot. Sin anmo'e onle nane on afi ahunut, sin namate atoni-atoni Israel anbi bale menuan anbi kot kotin anbi lanan an ali Betel ma anbi lanan an ali Gibea. Sin namate atoni Israel bo'tenu.

³²Es nane te atoni Benyamin sin natenab nak sin nis ma anbe'u nalali atoni-atoni Israel nane anteni on neno ahunut. Mes to meo Israel sin natenab nalali he nati' sin anhelon anpoi he nati' anfuli to meo Benyamin nane neu lan opa, na'lo na'ko kot.

³³Leka to meo pa'e Israel sin anhelon anpoi, ma anhake naketbon anteni anbi Baal-Tamar, sin atoni-atoni le anhake naketbon anhaumak Gibea, nok askeken sin anpoi na'ko sin bale-bale tolo' anbi bale kot kotin.

³⁴Sin le nane atoni-atoni mabeti na'ko Israel ok-oke atoni 10.000. Makenat ma manuat mafena anae le'uf anbol leka atoni 10.000 nane sin antam ma anken Gibea. Atoni-atoni Benyamin namneo-namneo sin ka nahin fa nak ka lo fa anteni of sin nis ma anbe'u sin.

³⁵UISNENO anfe lasi mnisat neu Israel sin nis ma anbe'u atoni Benyamin, talantia neno nane atoni Israel namate to meo Benyamin atoni 25.100.

³⁶Oke nok nane te atoni Benyamin sin nahin nak nis ma anbe'u nalali sin. To meo pa'e Israel nok asafanu sin naen na'ko atoni-atoni Benyamin natuin sin nafnekan neu sin to meo le natokob sin anbi bale-bale tolo' anhaumak Gibea.

³⁷Atoni-atoni le sin natolo' nane nok labah sin antam ma anken Gibea; sin nasan'ok neu me-me anbi kot ma namate ale atoni anbi nane.

³⁸Mes nahunu na'ko nane sin nekaf mese nak leka anmu'i ai masu anaek le ansae na'ko kot atnanan,

³⁹onane te to meo pa'e le sin anhelon anpoi nane mes nati' sin naklel'on ma antam anfani hen ken musu. Anbi tabu nane atoni-atoni Benyamin sin namate nalali to meo Israel bo'tenu ma sin natenab nak sin nis ma anbe'u nalali atoni-atoni Israel anteni on makenat nane unu.

⁴⁰Mes nok askeken ai masu ansae na'ko kot Gibea atnanan. Onane te atoni-atoni Benyamin sin naskek leka sin naklel'on ma nit sin kot anputu ok-oke.

⁴¹Ma anbi tabu nane amsa to meo pa'e Israel naklel'on ma ma anken, talantia to meo Benyamin nane sin nekan namneku ma sin nahin nak mes sin nis ma anbe'u sin.

⁴²Es nane te, sin naen na'ko atoni-atoni Israel an ali mnela snaen, mes sin ka nafetnok fa. Fun natnana sin anbi to meo pa'e Israel ma to meo le tabu nane sin nem na'ko kot. Nis ma anbe'u atoni Benyamin anae le'uf anbi neno nane.

⁴³Atoni-atoni Israel aniusnan sin ma anli'u sin piut-piut ka nasnas fa talantia bale mese anbi Gibea aon bian neno saen.

⁴⁴Leka fe anli'u sin, sin namate to meo pa'e Benyamin atoni 18.000.

⁴⁵Ma to meo bian na'ko uf Benyamin sin naklel'on oke te sin naen neu mnela snaen an ali tubu-tubu fatu anbi Rimon. Atoni nifun nim namate sin anbi lanan. Ma bian anteni anli'u sin piut ka nasnas fa talantia Gideom. Na'ko atoni-atoni nane namate sin 2.000.

⁴⁶Es nane te, to meo na'ko uf Benyamin le namate sin anbi neno nane atoni 25.000 ok-oke — nane to meo abe'it ok-oke.

⁴⁷Mes na'ko sin le naen neu mnela snaen an ali tubu-tubu fatu anbi Rimon atoni 600 es anmoni. Funan ha sin natua anbi Rimon.

⁴⁸Namuni te atoni Israel sin anfani anteni oke te antam ma anken ma namate atoni-atoni Benyamin le fe nabalah — atoni, bife, li'ana ma mu'it amsa. Ma ale kot anbi bale nane sin notu nani.