Read Uab Meto HAKIM-HAKIM 21 Bible Online

HAKIM-HAKIM 21 - Uab Meto bible

HAKIM-HAKIM 21

¹Anbi tabu atoni Israel sin nabua anbi Mizpa, sin manba'an nalali neu UISNENO nak katit fa es amsa na'ko sin le of nafetin sin anfeto hen fani atoni Benyamin sin fenai.

²Nalali te sin anao neu Betel ma sin antoko anbine nok nek susal talantia anfai anbi Uisneno In human In matan. Sin ankae ma ansakoi nak,

³“Koi UISNENO, Israel sin Uisneno, nansa' talantia lasi i mes anbol ka? Uf Benyamin uf mese na'ko hai nonot ala kle'ot sin namneku!”

⁴Noka fa, fe nok-nok ana, to Israel nahakeb baki u'tulu mese anbi nane, oke te natulu neu UISNENO fua u'tulu mnotu ma fua u'tulu halan.

⁵Nalali te sin antae naleko-leko anbi uf-uf nonot Israel ai anmu'i le afi ka nok fa anao nabua neu UISNENO anbi Mizpa. (Anbi tabu nane sin ansup nalali nak atoni le ka nanokab fa han anmo'en he nao neu Mizpa mes namate nani.)

⁶To Israel sin nek namnau sin biafen uf Benyamin, es nane te sin nak, “Neno i Israel in uf mese mes namneku.

⁷Hit mes het mo'e sa' ka he nati' atoni Benyamin le fe nabalah i nabe'i sin napeni fenai, natuin hit atsup talali neu UISNENO neu of hit kat fe fa hit anfeto sin hen fani atoni Benyamin sin fenai?”

⁸Es nane te sin antae lek-leko ai anmu'i uf mese ka anbi uf-uf Israel le ka nok nabua fa anbi Mizpa. Oke te sin napeni nak atoni-atoni Yabes anbi Gilead, katit fa es amsa le he nao neu Mizpa.

⁹Natuin, leka sin antae sul kanaf, namneo kanaf mese na'ko atoni Yabes ka napeni nani fa anbi sul kanaf nane.

¹⁰Es nane te, atoni-atoni le sin nabua anbi Betel nane sin ansonu to meo 12.000 neu sin he namate atoni Yabes ok-oke, nok ale bife ma li'ana sin.

¹¹Naplenat sin he namate ale atoni, ma ale bife le ka ao teme fa.

¹²Es nane te ale atoni-atoni le sin natua anbi Yabes nane, sin napeni li'feto ao temef 400. Sin neki ale li'feto nane neu um-ume anbi Silo anbi Kanaan.

¹³Nalali te to Israel ok-oke ansonu haef neu atoni-atoni Benyamin le sin natua anbi tubu fatu Rimon he naton neu sin lasi halan.

¹⁴Es nane te atoni-atoni Benyamin sin anfani nem, oke te to Israel sin anfe neu sin li'feto-li'feto na'ko Yabes le ka namate fa sin nane. Mes li'feto-li'feto nane sin amfauken kan tia fa neu atoni-atoni Benyamin nane.

¹⁵Mes to Israel sin nek mamun neu atoni Benyamin, natuin UISNENO In neso-anlanak lasi nek bua uf-uf nonot Israel.

¹⁶Es nane te mnasi-mnasi le sin nabua anbi Betel nane sin nak, “Anbi uf Benyamin kan mu'i teni fa bife. Mes, neu het mo'e onme; hit ka nabe'i fa he tafetin hit anfeto sin hen mamone nok sin, natuin hit atsup talali neu sekau na'ko kit le nafetin in anfeto hen mamone nok atoni Benyamin! Es nane te, mes hit het mo'e sa' ka neu sin le fe nabalah i he nati' sin nabe'i anmu'i fenai amsa? He nati' Israel kais naneku sin uf mese na'ko sin uf bo'es am nua. Hit mes he tami lanan he nati' uf Benyamin nabe'i anmu'i sanut mofut anbi neno amnemat ma sin pah nane anfani sin pah bale bela nabalah.”

¹⁹“On i,” sin nak onane, “anmu'i lanan alekot mese, esle' na'naeba neno naek ton-ton neu UISNENO anbi Silo.” (Anbi aon bian a'ne'u Silo i tapeni kot Betel, ma anbi in aon neno tesan tapeni lan opa Betel neu Sikhem, ma anbi in aon bian bian a'li tapeni kot Lebona.)

²⁰Onane te mnasi-mnasi le sin nabua anbi Betel nane sin nak neu atoni-atoni Benyamin nane nak, “Him nao nai ma mitolo' anbi bale-bale tua min kase anbi Silo,

²¹ma ampao nai anbi bale nane. Leka ta'naeba neno naek ton-ton neu UISNENO ma kalu li'feto-li'feto Silo anpoi he nabso' hi mes ampoi mi'ko lene-lene tua min kase nane. Oke te hi mese-mese mes amheke li'feto mese na'ko sin le nane ma maen meki neu pah Benyamin he nati' anfani hi fenai.

²²Leka in amaf ai in naof nem hen matoe ai anmaban nok ki nati' hi miton neune mak, ‘Haim toti, so nati' hi mifetin sin neu kai. Hai ka misik fa sin anbi makenat in nanan. Ma natuin hi kam fe kai fa sin neu kai, es nane te hi kam tanhai fa lasi manba'an, ma nok nane te hi ka misanab fa.’ ”

²³Es nane te atoni-atoni Benyamin naen sin anmo'e sa' le mnasi-mnasi Israel nak neu sin. Sin mese-mese nane neki li'feto mese na'ko li'feto-li'feto le sin nabso' anbi Silo. Oke te sin anfani neu sin pah ma nafena nafani ale sin kot-kot sin ma sin natua nabalah anbi nane.

²⁴Anbi tabu atoni Israel anao na'ko nane. Es-es natuin sin nonot, sin anao na'ko nane neu sin bale.

²⁵Anbi tabu nane fe kan mu'i fa kesel anbi Israel. Es-es antao ma anmo'e kun sa' le in natenab nak leko.