Read Uab Meto HAKIM-HAKIM 4 Bible Online

HAKIM-HAKIM 4 - Uab Meto bible

HAKIM-HAKIM 4

¹Leka Nai Ehud anmate nalali, nonot Israel nasanab anteni neu UISNENO.

²Es nane te UISNENO nafetin sin talantia Nai Yabin, kesel Kanaan le antoko anbi kot Hazor in nis ma anbe'u sin. In to meo nakaf nane kanan Nai Sisera le natua anbi Haroset-Hagoyim.

³Nai Yabin in anmu'i aklet makenat 900 na'ko besi. Ton bo'nua in an aten atoni Israel nok matani. Nalali te sin anbai antoti neu UISNENO.

⁴Anbi batan nane le ana' ma antopu Israel esle' mafefa knino fenai mese in kanan bi Debora, Nai Lapidot in fenai.

⁵Bi Debora anfoenan te in antoko anbi boen kase mafon, anbi Rama ma Betel sin atnanan, anbi neten Efraim. Anbi bale nane atoni Israel sin nem ma antoti fainekat na'ko in.

⁶Anbi neno mese in anlelu atoni ma no'en Nai Barak, Nai Abinoam anmone, na'ko kot Kedes anbi pah Naftali. Oke te in nak neu Nai Barak nak, “I plenat UISNENO, Uisneno Israel, neu ko: ‘Amnibun atoni 10.000 na'ko uf Naftali ma uf Zebulon, ma meki sin neu Tubu Tabor.

⁷Au of amo'e Nai Sisera, to meo nakaf Nai Yabin, sin nem hen laban ki anbi Noe Kison nok in to meo makenat sin ma ale in aklet makenat neu hen ken ki. Mes au of a'fe lasi mnisat neu ko anbi makenat nane.’ ”

⁸Mes Nai Barak nak neu bi Debora nak, “Kalu ho mok, au lomi he nao. Mes kalu kahaf, au amsa ka lomi fa he nao.”

⁹Bi Debora natae nak, “Leko, au of ok! Mes mumnau, mes of ho ka mupeni fa kanaf. Natuin UISNENO nana'at nani Nai Sisera nanete natuin bife mese in niman.” Oke te bi Debora anfen ma anao nok Nai Barak neu Kedes.

¹⁰Ma Nai Barak anlelu no'en nabuab uf Zebulon ma uf Naftali anao neu Kedes. Le natuin Nai Barak ma bi Debora anbi tabu nane oni atoni 10.000.

¹¹Anbi tabu nane Nai Heber, atoni mese na'ko Keni, in anbeti naikan in aon na'ko in nonot. (Uf Keni nane Nai Hobab sufan, Nai Musa in baef.) Nai Heber in anao ma nahakeb nalali in um-ume sin anhaumak hau no' naek sin anbi Zaanaim, ka na'lo fa na'ko Kedes.

¹²Leka Nai Sisera in nen nak Nai Barak in anao nalali neu Tubu Tabor,

¹³in anibun nabuab in aklet makenat natun sio le na'ko besi nane, nok ale in to meo ok-oke oke te in neki sin na'ko Haroset-Hagoyim neu Noe Kison.

¹⁴Oke te bi Debora nak neu Nai Barak nak, “Amfen nai, amnao mat nai! UISNENO In es ana' ma antopu ko. Neno i In nana'at nalali Nai Sisera neu ko he nati' ho mis ma ambe'u in.” Ma Nai Barak ansanu na'ko Tubu Tabor nok in to meo nifun bo'mese,

¹⁵oke te sin anlaban Nai Sisera. Ma UISNENO ankunkalan Nai Sisera ma ale in aklet makenat sin, talantia Nai Sisera ansanu na'ko in aklet makenat, oke te in naen anao neki haen.

¹⁶Nai Barak anli'u ale aklet makenat ma to meo musu nane antia Haroset-Hagoyim oke te in namate Nai Sisera in to meo amakenat sin ok-oke; katit fa es amsa le nafetin sin hen moni.

¹⁷Anbi tabu le nane Nai Sisera in naen nalali neu bi Yael in um-ume, Nai Heber fenai, atoni Keni nane. Natuin, Kesel Nai Yabin na'ko Hazor anmahalan nok Nai Heber ume nanan nane.

¹⁸Leka Nai Sisera in nem, bi Yael ansimo in ma nak, “Amkoenom aum Usi, amtam nai meu au um-ume; kais mumtau.” Ma Nai Sisera antam neu um-ume nane oke te bi Yael ankub in neki beti eno he nati' in na'tolo'.

¹⁹Nai Sisera nak neu bi Yael nak, “Amfe kau fa oe akle'o he au inu; natuin au meno.” Ma bi Yael ansefi nius pasu, bale nabela susu anbine, oke te nainut Nai Sisera, nalali te ankub in anteni nok beti eno nane.

²⁰Oke te Nai Sisera nak neu bi Yael nak, “Amnao nai ma amhake ambi um-ume eno. Leka es nem ma natoti ko nak ai anmu'i atoni anbi i, muton mak katit fa es.”

²¹Nai Sisera anhae nae le'uf talantia in ansesa ma anleuk oke te in antup anfini. Bi Yael in naiti nan um-ume in a'tutu mese ma a'suan mese, oke te nok a'ten-tena in anhaumak Nai Sisera. Nalali te in antutu suan nane antam neu in sunbokan anbol antia nain. Onle nane bi Yael namate Nai Sisera.

²²Leka Nai Barak in nem ma nami Nai Sisera, bi Yael ansenu in ma nak neune nak, “Aum nai, au of uton neu ko atoni le ho mami nane.” Nai Barak antam bua nok bi Yael, oke te in nit Nai Sisera anmate nalalien anbi nain nok um-ume in a'suan anbi in sunbakon.

²³Neno nane Uisneno anfe lasi mnisat neu atoni Israel sin nis ma anbe'u Nai Yabin, kesel Kanaan.

²⁴Atoni Israel sin nameku kesel nane piut-piut talantia namuni te in namle'u.