Read Uab Meto HAKIM-HAKIM 5 Bible Online

HAKIM-HAKIM 5 - Uab Meto bible

HAKIM-HAKIM 5

¹Anbi neno nane bi Debora ma Nai Barak Nai Abinoam anmone sin ansi. Sit nane in hanan nak on i:

²Miliatas nai UISNENO, natuin ale abe'it ma matani Israel sin anbubun ma namesen sin nekenu neu he sin anmabe'u, ma to nok nek alomit sin anao ma sin anmaken.

³Amnen hoi! ale kesel ma naimnuke, au si sit neu Uisneno, UISNENO Israel.

⁴Leka Ho amfen mu'ko Seir, koi UISNENO, ma pah Edom Ho musaitan, pah pinan antainun, neno kuni peni amsa natfai, ma ale nope naopan oenu.

⁵Tubu ma nu'af na'beko anbi akuasat Sinai in matan, anbi Uisneno, UISNENO Israel In human In matan.

⁶Anbi batan Nai Samgar, Nai Anat anmone, ma anbi batan bi Yael amsa, katit fa atoni amfaun anbi pah, katit fa anaot anbi lanan anaek.

⁷Kot-kot Israel katit fa atuas anbine, sa'-sa' namne talantia ho aum, Debora; ho aum on ainaf amanekat.

⁸Leka Israel naluli ma nabes neu uisneno teta, makenat anpe' anbi sin pah; anbi nonot anmu'i abe'it ma matani atoni 40.000, katit fa es amsa he naiti bale manuat.

⁹Neu to meo nakaf Israel le sin natnat sin aon nok nek alomit, au utiaba au lasi tola le anpoi na'ko au nekak nanan. Miliatas nai UISNENO!

¹⁰Hoi hi le amsae bikase luke mnanu muti, hi le amtoko anbi nahe ma nafu tunan, ma hi al-al ki le amnao hae, am etun ma miton nai nu'un lasi mnisat i!

¹¹Anhaumak oe mata honis atnen sit amlilat, hanan nanu'un lasi mnisat UISNENO piut-piut, lasi mnisat Israel, UISNENO In to. Es nane te sin anao anmakatuin an ali kot in eno naek.

¹²Amfen Nai Debora, ma maiti nai sit. Amfen Nai Barak, ma ampo' ale atoni le amheke man sin anbi makenat!

¹³Meo pa'e le fe namaika sin nem neu sin atomatas, sin nem, ma naloitan nabalab hen mabe'u neu In.

¹⁴Sin anao na'ko Efraim neu nonof, sin natuin to meo Nai Benyamin le anao makatuin anbi sin matken. Na'ko Makhir ale meo pa'e sin nem, ma na'ko Zebulon ale meo nakaf anaet sin anfen.

¹⁵Ale atomatas Isakhar sin nem bua' nok bi Debora, namneo, Nai Isakhar nem, ma Nai Barak in nok amsa; sin natuin in ansanu nonof. Mes uf Ruben ka nahakeb fa sin nek tenab natuin anbi sin kan mu'i fa nekaf mese.

¹⁶Nansa' sin natua nabala anbi sin bibi kase sin sonan atnanan? Ai neu he nen atukus he no'en in mu'it sin? Namneo uf Ruben kan mu'i fa nekaf mese natuin anbi sin kan mu'i fa nek a'bua.

¹⁷Leka uf Zebulon ma uf Naftali sin anmabe'u nok matani anbi mnela makenat, uf Dan antoko kun anbi bnao, ma uf Gad natua nabala anbi neno saen Yordan, ma uf Asyer antoko kun nok tainine ma kan lomi fa he na'lo ma naskotu na'ko sin bale tasi ninen.

¹⁹Anbi Taanakh, anhaumak noe anbi Megido, ale kesel sin anmakenan, ale kesel Kanaan sin anmabe'un, mes noni muti kan mu'i fa le sin he neki on makenat osan.

²⁰Afkun-afkun sin amsa anmabe'u nok sin anlaban Nai Sisera, na'ko sin bale naoinson anbi neno tnanan.

²¹Noe Kison ansae ma naen neki musu. Nao mat, nao mat nai nok matani, hoi au smanak!

²²Onane te bikase ku'en sin naslutu natuin asaeten sin anmali'un nok matani.

²³“Amsukat Meros nai, ma in tuafen,” Ahake UISNENO nak onane “natuin sin ka nem fa hen fe lasi babat ma tuntakus on meo pa'e le anmabe'u neu UISNENO.”

²⁴Athoen neno neu bi Yael, Nai Heber in fenai atoni Keni; na'ko ale um-ume tuafen, in es napeni nesin athoen neno.

²⁵Nai Sisera antoti oe, mes in anfe neune susu, in naloitan ma nabalab susu anbi pika mako le anmatom neu ale kesel sin.

²⁶Suan ma tutu' anbi in niman bi Yael neso Nai Sisera talantia in anakan anpe' ma naskuku.

²⁷Anbi bi Yael in haen benan Nai Sisera anbel ma antup kan mu'i fa snasaf anmate nesonon anbi nain natef nok in amaten.

²⁸Na'ko eno kiso sin Nai Sisera in ainaf in ankiso ma na'et ma na'uab nak, “Nansa' in aklet makenat, ka nem antia fa, nansa' kat nen fa in bikase ku'en in aslutun ka?”

²⁹Ahinet anesit anbi anbife ameput anbi sonaf nanan in anfe han taes le anpoikun na'ko in nekan nanan nak:

³⁰“Sin fe anbati bale le sin nasik nan anbi makenat nanan, neu solalus mese-mese, bife ao temef mese ai nua. Ma neu nai Sisera, sobalu le osan matain le'uf, ma neu ain le'u, lip bate koto hum amfaun.”

³¹So nati' Ho musu-musu sin, koi UISNENO, sin anmate on Nai Sisera, mes ale Ho soba sin naleko on manas ansae namtetu! Oke onane te, pah nane antainine ton bo'ha in a'lon.