Read Uab Meto HAKIM-HAKIM 6 Bible Online

HAKIM-HAKIM 6 - Uab Meto bible

HAKIM-HAKIM 6

¹Nonot Israel anmo'e anteni sanat neu UISNENO, talantia In nafetin uf Midian naplenat sin ton hitu in a'lon.

²Atoni Israel namtausan atoni Midian anae le'uf, talantia sin natolo' anbi ale nuat ma anbi bale-bale bian le antainine anbi bale neten.

³Onane amsa leka atoni Israel anmepu lene ma ansen, atoni Midian sin nem bua-bua nok atoni Amalek nok atoni bian na'ko mnela snaen ma sin anlaban atoni Israel.

⁴Sin nahakeb sin um-ume anbi Israel sin pah ma nale'un ale luat anbi nane antia bale anfun natef Gaza antom bian a'ne'u. Onane amsa nonot Israel sin mu'it bibi kase, bijae ma bikase luke mnanu sin naen neki sin. Katit fa sa' es amsa le sin namaika talantia nonot Israel kan mu'i fa mnahat akle'o amsa.

⁵Atoni-atoni nane sin nem pukan-pukan neki sin mu'it ma sin um-ume le anae le'uf. Sin ma sin bikase paha snaen amfau le'uf kat so'i tabe'i fa. Sin nem ma nale'un pah nane,

⁶ma nonot Israel kan mo'e fa sa'-sa' neu sin.

⁷Namuni te nonot Israel sin anbai antoti UISNENO hen bab sin he sin anlaban atoni Midian.

⁸UISNENO ansonu Mafefa knino mese neu sin. Mafefa knino nane nak, “UISNENO Israel, nakua a'an nak on i: ‘Au ufetin ulali ki na'ko lasi aten anbi Mesir.

⁹Au ufetin ulali ki na'ko atoni Mesir ma na'ko atoni-atoni pah i le anken ki. Au li'u ulali sin na'ko pah i leka hi amlaban sin, oke te Au fe sin pah neu ki.

¹⁰Au uton ulali neu ki ak Au le i hi UISNENO, ma ka nabe'i fa hi miluli ma mibes neu uisneno teta uf Amori le sin pah hi mitua mani anbi tabu le i. Mes hi ka mituin fa Au plenat sin.’ ”

¹¹Anbi neno mese ahake UISNENO nem neu kot Ofra, oke te antoko anbi hau no' naeken un, Nai Yoas ini, atoni mese na'ko Nai Abiezer ume nanan. In anmone Nai Gideon, fe in neso ane kase anbi bale mnaesa tua mina mtasa. In anmepu nok a'tol-tolo' he nati' atoni Midian kais nit in.

¹²Ahake UISNENO nane nalil'on neune ma nak, “Hoi, atoni munif abe'it ma matani ko! UISNENO nok ko!”

¹³Nai Gideon natae nak, “Koi, au Usi! Bait namneo UISNENO nok kai, nansa' ale lasi i nameku kai? Ale lasi sanmakat le afi UISNENO Ho amtao ma anmo'e esme ka le hai amfen sin nanu'un kai neu onme Ho mupoitan sin na'ko Mesir? Muni i UISNENO Ho musaitan mulali kai ma Ho mufetin kai ma atoni-atoni Midian sin naplenat kai.”

¹⁴Nalali te UISNENO anfe In aplenat neu Nai Gideon nak, “Nok ho be'im ho matanim oke amnao nai ma mufetin atoni Israel na'ko kuasat ma plenat atoni Midian. Au es a'sonu ko.”

¹⁵Nai Gideon natae nak, “Nansa' he au, koi UISNENO? Onme ka au he ufetin nonot Israel na'ko kuasat ma plenat atoni Midian. Anbi uf Manasye, au nonot es an ole anae le'uf. Ma anbi au ume nanan amsa au es ka maota kau fa anae le'uf.”

¹⁶“Namneo ho mes mis!” UISNENO nakua a'an, “natuin Au es of atuntaku ko. Atoni-atoni Midian of ho mule'un sin nok labah, onle ho matumatan mok atoni mese.”

¹⁷Nai Gideon natae nak, “Leka namneo-namneo UISNENO Ho amlomi kau, bait Hom fe neu kau ataka nak namneo UISNENO Ho es amfe plenat nane neu kau.

¹⁸Au toti ko UISNENO amlomi te ampao kau fe anbi i talantia au ubalab bukae neu au UISNENO ko.” “Leko,” UISNENO natae onane, “Au of apao ho talantia ho amfani aum.”

¹⁹Nai Gideon in anao ma naloitan bibi tipu mese anlolo ma nahan, ma in naiti ut kilo bo'mese, nalali te antunu utunu' le ka nok fa lalu haef. Oke te sisi nane in antao anbi poni mese, ma sisi in oef nane anbi na'i mese, oke te neki sin ok-oke ma nabalab neu ahake UISNENO le fe anpao anbi hau no' naeken un nane.

²⁰Ahake UISNENO nane nak, “Mubela sisi ma utunu' nane anbi fatu i fafon oke te am op sisi oef nane neu sisi ma utunu' nane.” Nai Gideon in anmo'e sa' le ahake neno tunan nane naplenat nani neune.

²¹Nalali te ahake UISNENO nane nenu in niman oke te neki hau panan le fe in ana' anbi in niman in an ono sisi ma utunu' nane. Fatu nane anpin oke te sisi ma utunu' nane anputu nani ok-oke. Nalali te ahake neno tunan nane in namneku kun.

²²Nai Gideon in nahin nak le amnemat le nem nalali neu in le nane ahake UISNENO kun. Es nane te nok amtaus Nai Gideon nak, “Amle'ut neu kau, koi UISNENO Anesit Afinit! Natuin au it ulali Ho ahake humaf nok humaf!”

²³Mes UISNENO nakua a'an neune nak, “Amtainine nai! Kais mumtau. Ho of ka mate fa.”

²⁴Oke te Nai Gideon nahakeb baki u'tulu mese anbi bale nane ma in nakanab nak, “UISNENO In uf halan nekaf kun”. Baki u'tulu nane fa esan anbi Ofra, kot atoni Abiezer.

²⁵Anbi fai nane UISNENO anfe plenat neu Nai Gideon nak, “Maiti ho ama in bijae keso, bijae alekot abainesit le in uan ton hitu. Ampukai mani baki fuat le ho ama nahakeb neu Baal, oke te amse' ni hau tola uisneno teta Fenai Asyera le anbi baki faut nane aon bian.

²⁶Oke te ho muhakeb baki u'tulu mese le ho mo'e nok alekot. Nalali te bijae keso nane ok-oke mes ho motu mani ok-oke on fua u'tulu neu UISNENO. Ampake ni tola uisneno teta Fenai Asyera le hom sa' mulali nane on hau hopit.”

²⁷Es nane te Nai Gideon in anbeti nan atoni bo'mese na'ko in ate sin oke te sin anao he nanaoba sa' le UISNENO naplenat nalali neune. Mes natuin in namtau anae le'uf neu in ume nanan sin ma neu atoni-atoni anbi in kuan nanan nane, in ka nabe'i fa hen mo'e lasi nane nok manas. Es nane te in anmo'e nani nok fai.

²⁸Leka tuafen anbi kot nane sin anfen anbi nok-noka, sin nit baki fuat neu Baal ma ni tola uisneno teta Fenai Asyera nane natsel nalalien. Sin nit amsa anbi bale nane nahakeb nalali baki u'tulu mese ma notu nalali amsa bijae keso mese on fua u'tulu.

²⁹Onane te sin anmantotin es nok es nak, “Sekau es anmo'e lasi nane ka?” Ma leka sin nami nalek-leko, sin napeni nak Nai Gideon, Nai Yoas anmone, in es anmo'e lasi nane.

³⁰Oke te sin nak neu Nai Yoas nak, “Ho anmone es anpukai baki fuat Baal ma anse' ni tola uisneno teta Fenai Asyera le anbi baki fuat nane aon bian. Es nane te, meki ho anmone nane anpoi nem neu i nai. In mes anmate!”

³¹Mes Nai Yoas natae neu in musu-musu sin nak, “Ait hi hem bab Baal ma him lomi hem pesi in? Sekau le anpesi Baal, of namate in anbi neno i! Leka Baal in nis ma anbe'u Uisneno, maut he in neknon anpesi kun in aon, natuin le anpukai nane in baki fuat kun.”

³²Natuin Nai Yoas nak, “Maut he Baal in neknon kun anlaban Nai Gideon, natuin in anpukai nalali in baki fuat,” es nane te na'ko neno nane sin nakanab Nai Gideon nak “Yerubaal”.

³³Anbi tabu nane ale atoni Midian, Amalek ma uf-uf bian anbi mnela snaen neno saen sin nabua nalali. Sin anlak Noe Yordan, ma nahakeb sin um-ume anbi Nonof Yizreel.

³⁴Mes Smanan Knino natua Nai Gideon in nekan, talantia in anfu to'is he no'en atoni-atoni Nai Abiezer in nonot sin he nati' sin nem nabua nok in.

³⁵Nai Gideon amsa ansonu haef neu uf Asyer, Zebulon, Naftali ma uf Manasye — leko le anbi neno saen ma le anbi neno tesan Noe Yordan, hen toti sin nabua nok in. Oke te sin al-al sin nem ma anbab Nai Gideon.

³⁶Oke te Nai Gideon nak neu Uisneno nak, “Koi UISNENO, Ho muton mulali mak Hom lomi hem pake kau he mufetin nonot Israel.

³⁷Leka namneo onane, onane te anbi nain i fafon, bale haim teli ane kase au ubela ulali pilu bibi kase nafun anbine. Leka noka fa onane al anmu'i akum anbi pilu bibi kase nafun nane, mes nain nane kahaf, nane anfani ataka nak Ho of ampake kau he mufetin nonot Israel.”

³⁸Ma lasi anbol onane: Leka noka fa Nai Gideon in anfen ma in aneok pilu bibi kase nafun nane in napeni oe akum a'mako mese.

³⁹Oke te in nak neu Uisneno nak, “Koi UISNENO, so nati' kais Ho muto'an Ho ate kau leka au umolok hae mese anteni. Amkolan kau he au su' it hae mese anteni eki pilu bibi kase nafun i. Mes hae esle' i al piku bibi kase nafun i es anmeto nabalah, mes nain anfun natef akum anbol anbine.”

⁴⁰Ma Uisneno anmo'e sa' le Nai Gideon antoti anbi fai nane, talantia noka fa pilu bibi kase nafun nane anmeto nabalah, mes nain anfun natef antom akum.