Read Uab Meto HAKIM-HAKIM 8 Bible Online

HAKIM-HAKIM 8 - Uab Meto bible

HAKIM-HAKIM 8

¹Atoni Efraim sin nak neu Nai Gideon nak, “Nansa' ho ka mo'en kai fa leka ho amfen ma amnao he maken mok atoni Midian? Nansa' ho amtao ma amoe kai onane?” Onle nane sin anmatoe ma anmaban Nai Gideon.

²Mes Nai Gideon natae sin nak, “Sa' le au mo'e nane in ka maota fa leka tanesa nok sa' le hi mo'e milali. Maski sa' le hi mo'e nane in an-ana kun mes in osan nane anesi na'ko ale sa' le au to meo pukan sin anmo'e nane.

³Hi es mipeni kuasat ma matani na'ko Uisneno talantia hi mimate Nai Oreb ma Nai Zeeb usif nua na'ko atoni Midian nane! Leka tanesa nok lasi nane, au nabe'i he mo'e sa' neu ki ka?” Leka Nai Gideon in namolok nalali onane, sin ka nato' anteni fa.

⁴Anbi tabu nane Nai Gideon in nok in to meo natun tenu sin nem antia Noe Yordan aon bian. Sin anhae anmate mes sin fe anli'u piut ale musu.

⁵Oke te sin nem antia Sukot. Anbi bale nane Nai Gideon in nak neu tuafen kot nane nak, “Ambab kau fe amfe kai fa bukae akle'o neu au to meo sin. Sin anhae anmate mes hai fe amli'u Nai Zebah ma Nai Salmuna, kesel Midian sin le nane.”

⁶Mes atomatas-atomatas anbi Sukot nane natae nak, “Ah, hi fe kam heke amteni fa Nai Zebah ma Nai Salmuna, mes hi amtoti kim bukae! Hai hem fe bukae neu ho to meo sin neu sa' ka?”

⁷Oke te Nai Gideon in nak, “Leko! Leka kalu UISNENO anfe lasi mnisat neu kau au is ma be'u Nai Zebah ma Nai Salmuna, hi of au tepo ki eki katila ma kasunat na'ko mnela snaen!”

⁸Nalali te Nai Gideon in anao anfini oke te in antia Pnuel. Anbi bale nane amsa in antoti bukae neu in to meo sin. Mes atoni Pnuel natae sin papmese onle atoni Sukot natae sin.

⁹Es nane te Nai Gideon nak neu sin nak, “Au of a'fani aum nok aomina. Ma anbi tabu nane au of utseleb ani el fatu kot i!”

¹⁰Anbi tabu nane Nai Zebah ma Nai Salmuna fe sin anbi Karkor nok ale in to meo sin. Na'ko ale to meo atoni-atoni mnela snaen, al oni atoni 15.000 es fe nabalah; in to meo 120.000 anmate nalalien.

¹¹Nai Gideon in anao natuin nakat mnela snaen anbi aon bian neno saen Nobah ma Yogbeha oke te in anlaban musu nok askeken.

¹²Nai Zebah ma Nai Salmuna, kesel Midian nua en nane sin naen, mes Nai Gideon anli'u sin ma anheke sin, talantia sin to meo pukan namtau ok-oke.

¹³Nalali te leka sin anfani nem na'ko makenat, Nai Gideon in anao nok lanan aisaet Heres.

¹⁴Anbi bale nane sin anheke nan atoni munif mese na'ko Sukot, oke te in natoti atoni nane neu kanaf-kanaf ale atomatas anbi Sukot. Oke te atoni nane in antui kanaf-kanaf nane ma anfe sin neu Nai Gideon ok-oke atoni 77.

¹⁵Oke onane te Nai Gideon in anao ma natef nok atomatas-atomatas anbi kot nane oke te in nak neu sin nak, “Namneo hi fe mimnau nak afi him tite neu hem bab kau, natuin au fe ka heke fa Nai Zebah ma Nai Salmuna, onane ka? Ma hi kam lomi fa hem fe kau bukae neu au to meo sin; le anbi tabu nane sin fe anhae anmate. Amkiso nai, i Nai Zebah ma Nai Salmuna.”

¹⁶Oke onane te Nai Gideon in naiti katila ma kasunat na'ko mnela snaen, oke te in nanoina ale atomatas-atomatas kot Sukot nane.

¹⁷Anbi Pnuel amsa in natseleb el fatu ma namate ale atoni ok-oke anbi kot nane.

¹⁸Oke onane te Nai Gideon in natoti Nai Zebah ma Nai Salmuna nak, “Atoni-atoni le hi mimate sin anbi Tabor nane sin humken onme ka?” Nai Zebah ma Nai Salmuna sin natae nak, “Sin al-al sin humken on ho humam, onle annaimnuke.”

¹⁹“Nane au olif — sin au aina in anmone sin,” Nai Gideon natae onane. “Kalu onle hi ka mimate fa sin namneo-namneo nok supat au of ka umate ki fa amsa.”

²⁰Oke te Nai Gideon nak neu Nai Yeter, in anmone anaet nak, “Mumate sin nai!” Mes Nai Yeter in fe munif. Es nane te, in namtau in kan hosu fa in suni he namate sin.

²¹Nai Zebah ma Nai Salmuna nak neu Nai Gideon nak, “Neu, kalu ho atoin mone ko, ho mumate kai meki ho nimam kun!” Onane te Nai Gideon in namate sin oke te in naiti ale noni funan ma pake noas le naboni'on anbi bikase paha snaen sin neon.

²²Nalali te nonot Israel nak neu Nai Gideon nak, “Ho mufetin mulali kai na'ko kuasat atoni Midian. Es nane te so ho muplenat kai — ho ma ho sufam sin.”

²³Nai Gideon in natae sin nak, “Kahaf. Au of ka uplenat ki fa; au anah amsa kahaf. UISNENO In es naplenat ki.”

²⁴Mes namuni te Nai Gideon namolok anteni nak, “Al lasi totis mese na'ko kau; ale falo le hi misik man sin na'ko musu, so hi mina'at sin ok-oke neu kau.” (Atoni Midian sin amsa anpake ale falo mnatu; papmese onle atoni-atoni bian le natua anbi mnela snaen.)

²⁵“Leko,” sin natae onane, “nok hai nekam amalinat hai of amfe sin neu ko.” Oke te sin nauf ma na'ben pilu mese, oke te atoni mese-mese sin nem ma nabela anbi nane ale falo le sin nasik nan na'ko musu.

²⁶Ale falo mnatu le sin nana'at neu Nai Gideon anbi tabu nane in mafenan ala kle'ot kilo bo'nua, kan so'i fa pake noas, a'heke mnatu, pilu amtasa le kesel Midian sin anpake, ma heke mnatu le anbi bikase paha snaen sin neon.

²⁷Na'ko noni mnatu nane, Nai Gideon anmo'e le'u mahuma mese, oke te antao anbi in kuan, anbi Ofra. Ma atoni Israel ok-oke sin anao anbi bale nane ma sin naluli nabes neu le'u mahuma nane, talantia sin ka naluli nabes anteni fa neu Uisneno. Ma lasi nane anfani on akleot neu Nai Gideon ma in ume nanan sin.

²⁸Atoni Midian sin ka natetu fa sin anakan anteni; atoni Israel sin nis ma anbe'u nalali sin. Ma pah nane antainine nan ton bo'ha in a'lon leka fe Nai Gideon anmoni.

²⁹Leka makenat nane, namsopu Nai Gideon in anfani neu in kuan ma natua anbi nane.

³⁰Nai Gideon anmu'i anmone bo'hitu, natuin in fenai namfau.

³¹In anmu'i fenai kliko anbi Sikhem; ma na'ko in fenai kliko nane in napeni anmone mese le in nakanab in Nai Abimelekh.

³²Nai Gideon Nai Yoas anmone nane in namnasi lek-leko oke te in anmate. Ansub in anbi in amaf Nai Yoas in naukel. Naukel nane anbi Ofra, nane kot ume nanan Nai Abiezer.

³³Ma leka Nai Gideon anmate nalali, atoni Israel ka na'ki anteni fa neu Uisneno. Sin naluli nabes neu uisneno teta Baal ma sin anmo'e Baal-Berit anfani sin uisneno teta.

³⁴Sin ka naluli nabes fa neu Uisneno, sin UISNENO, le nafetin nalali sin na'ko ale kuasat musu le anfun natef sin.

³⁵Ma sin amsa kan mo'e fa manekat neu Nai Gideon in ume nanan sin natuin ale alekot le Nai Gideon anmo'e neu Israel.