Read Uab Meto 3YOHANES 1 Bible Online

3YOHANES 1 - Uab Meto bible

3YOHANES 1

¹Au bae Nai Gayus le au nek ani! Au, penatua, le namneo-namneo a'nek ko,

²au onen toti he nati' hom aomin ma ale sa' lek-leko nok ko, papmese onle ho smanan lek-leko amsa.

³Au malina nae le'uf leka bae knino sin fauk neman ma ansaksi ho nek aki'at neu beno Uisneno le amneot, fun ho moni piut nok nek muti mutuin beno nane lomin.

⁴Katit fa sa' esle' anhalin au nekak, nesi na'ko le au nen nak au anhenu nok nek muti, natuin beno na'ko Uisneno.

⁵Bae manekat, tebes ho mu'ki ambi mepu le ho mo'e mani neu ho bae manekat sin; fun ale atoni Slani le fe ho ka muhin fa sin amsa, hom tuthae sin.

⁶Sin eut nalali neu Tolas Knino anbi i antom ho lasi manekat. So hom tulun sin he nati' sin nasopu sin lanan. So ho mo'e lasi nane meki mo'et le anhalin Uisneno nekan,

⁷fun ho bae sin a'nao hen tuthae Neno Anan. Sin mepun mes kan simon fa sa' na'ko ale atoni le kan palsai fa neu Neno Anan.

⁸Es nane, hit atoni Slani mes atulun hit bae benu le anmo'e onane, he nati' hit mepu tok sin he tanaoba beno le amneot na'ko Uisneno.

⁹Au tui ulali sulat tuk-tuka neu Tolas Knino, mes Nai Diotrefes le anlomi hen fani atopus anbi Tolas Knino, kan lomif he natuin kau.

¹⁰Kalu au et, of au u'uab antom sa' le in anmo'e nalali, es le antom ale lasi amle'ut ma lasi poiba le in namolok nalali antom kai. Mes ale lasi nane fe kan tiaf neu in. Leka bae knino atoni Slani nane neman, in kan lomif hen simo sin. Mes in nakain ale atoni le anlomi hen simo bae knino nane sin, ma in lelu ale atoni nane sin hen poi na'ko Tolas Knino.

¹¹Bae benu manekat, kais mituin mo'et amle'ut so mituin neu mo'et alekot. Atoni le anmo'e alekot, in na'ubon na'ko Uisneno. Mes atoni le anmo'e amle'ut, in fe ka na'eku fa nok Uisneno.

¹²Ale atoni anpules Nai Demetrius. Ma ale Amneot amsa anpules in. Hai amsa ampules in, ma ho muhin nak hai pules nane namneo.

¹³Anmu'i lasi namfau le au he eut neu ko, mes au utenab leko nesi kais natuin sulat.

¹⁴Au ufnekan ka lob antenif of au ue'ku ok ko, ma of hit tamolok mat-mat.

¹⁵Ao mina ma aoleko neu ko! Ho bae knino sin anbi i ansonu tabe neu ko. Mutiaba au tabe neu au bae knino sin mes-mese.