Read Uab Meto YUDAS 1 Bible Online

YUDAS 1 - Uab Meto bible

YUDAS 1

¹Bae benu le anboin nalali ki ma le anek ki natuin Uisneno hit Ama ma anpanat ki neu Yesus Neno Anan. On ate Yesus Neno Anan, au — Nai Yudas — Nai Yakobus in olif,

²ufnekan he nati' Uisneno anfe tetus, amnaut ma aomina neu ki nok athoes.

³Bae benu manekat! Au lomi namneo-namneo he tui sulat neu ki antom lasi honis le hit alkit tapeni talali. Mes tomas i au upeni manuan he fainek ki eki sulat i he nati' hi mautnom piut neu palsait le Uisneno anfe nalali hae mese tal nabal-bal neu to knino In.

⁴Fun anmu'i atoni le antam nok alsi tolo' anbi hi atnanam. Sin le nane atoni abulalut le nate'un beno antom hit Uisneno In amnaut, he napeni manuan oke te natiaba sin nek sinmakat pah pinan. Sin natotan Yesus Neno Anan, anmu'i kuasat ma hit Usif. Na'ko neno unu naloitan nalali kasat neu sin, onle antui nalali anbi Sulat Knino.

⁵Ale lasi nane hi mihin milali. Mes au lomi he umnauba teni ki, antom Usif tunan anfe honis neu to onme na'ko pah Mesir, mes namuni te nale'un anteni ka apalsait anbi sin.

⁶Mimnau amsa ale ahake neno tunan le antanhai lekat antom na'ko sin kuasat, talan te nao nasaitan bale le sin namaika anbin. Uisneno anfutu ahake neno tunan nane sin neki kolen besi nabal-bal anbi bale mesokan. Sin nabalah piut anbi bale nane tal nafek lasi neu sin bi Neno hatas naek.

⁷Mimnau amsa kot Sodom ma Gomora ma ale kot bian le anfun ma natef sin le anmo'e lasi papmese onle ahake neno tunan sin. Sin anmo'e lasi kake, ma bulalu, talan te sin napeni kasat neki ai maputu nabal-bal hen fani amnaut neu atoni ok-oke.

⁸Onane amsa ale atoni nane nasmanan ma nunmain talan te sin mo'en sanat neu sin aon. Sin nabaun Uisneno In kuasat, oke te sin na'akan ale amonit apinat abit neno tunan.

⁹Nai Mikhael, le anfani nakaf neu ale ahake neno tunan, in kan mo'ef onane, leka in matoe nok nitu anbi matoes antom sekau le of napeni Nai Musa in aon nitu, Nai Mikhael ka nabe'i fa hen lefi santuaf in lasi neki a'at akle'at. Nai Mikhael al na'uab nak, “Usif tunan of nakain ko neki matani!”

¹⁰Mes atoni nane sin na'uab nakle'at ale sa' le sin ka nahinef. Sin onle mu'it le ka maneka, le nahin lasi nane neki sin nekan pah pinan. Mes natuin ale lasi nane neki sin neu amle'ut.

¹¹Amle'ut neu sin! Sin natuin nalali lanan le Nai Kain nao natuin. Fun he napenin baen ai noni, sin natam sin aon neu nonof aseket onle Nai Bileam. Ma sin amsa naskuku natuin sin mo'en lasi matoes onle Nai Korah.

¹²Leka hi mo'e fesat, ale atoni nane sin es anfani lahi neu ki. Sin bukae nok palu', fun sin kan maen fa ma al sin namnau sin aon. Sin onle nope le anin anfu neki, mes ka nasanut fa ulan. Sin amsa onle hau le ka nafuaf maski anbi in etin; ale hau le anbok nalali sini aba'an ma anmate nunfin.

¹³Sin onle tasi le anpesen ma nafule, onane amsa sin mo'et nane nafule ma namaeb sin. Sin onle afkun le na'oni ma Uisneno naloitan nalali bale mesokan neu sin talan te nabal-bal.

¹⁴Nai Henokh, atoni bat hitu na'ko Nai Adam, afi anbeno nalali neu ale atoni i. Nai Henokh nak, “Kiso, Usif tunan of ankoenon nem nok In ahake neno tunan nifun-nifun,

¹⁵ma anlef lasi neu ale mo'et amle'ut na'ko ale atoni le ka nahin In. Ma In of anlef lasi amsa neu ale a'at akle'at le ale atoni asanat antek nani neu Uisneno.”

¹⁶Ale atoni nane sin es namunu ma an anbai piut. Sin monin natuin sin sinmakat asanat. Sin pules sin aon, ma anlomi atoni he nati' sin napenin osaf.

¹⁷Mes neu hi, bae benu manekat! Mimnau nai ale lasi le afi hit Usif. Yesus Neno Anan In haef knino sin an etun nalali neu ki.

¹⁸Fun sin an etun nalali neu ki nak, “Anbi neno hatas amsoput, of anmu'i atoni le naslaet ki, le sin moni natuin sin mo'et sinmakat amle'ut.”

¹⁹Sin le nane atoni le anpolo ma anbeti lasi nek mese na'ko to, natuin sinmakat ma nek tenab pah pinan. Sin le nane atoni le kan mu'in fa Smanan Knino.

²⁰Mes hi, bae benu manekat, so him panat nai hi nek ateb knino hi nek ateb nane knino le'uf. Oke te amonen toti nai meki kuasat Smanan Uisneno,

²¹ma hi moni piut ambi Uisneno In mafon amanekat ma ampao hit Usif, Yesus Neno Anan In nek mamun le of anfe ki honis nabal-bal.

²²Milile lasi manekat neu sin le sin nekan na'oni.

²³Amhel mipoitan sin na'ko ai he mihoni sin. Mes milile lasi manekat neu atoni bian amsa nok nek amtaus. Mes hi mainisin sin tainusat le nalahi nani neki sin sinmakat asanat.

²⁴Uisneno, le anmu'i kuasat hen panat ki he nati' kais him bel ma mitsel, mes In nok ki neu In human apinat nok malinat ma ka kobe fa.

²⁵Uisneno mestilo, hit Afetin, natuin Yesus Neno Anan hit Usif, In kun Uisneno Apinat, anaet amatani ma akuasat na'ko un-unu talan te muni i ma talan te nabal-bal! Amin.