Read Uab Meto RUT 1 Bible Online

RUT 1 - Uab Meto bible

RUT 1

¹Anbi batan ahunut Israel fe kan mu'i fa kesel, lasi amnahas anbol anbi pah Kanaan. Anbi tabu nane anmu'i atoni mese in kanan Nai Elimelekh. In na'ko Efrata, ma in natua anbi Betlehem anbi pah Yehuda. Natuin lasi amnahas nane, in nok in fenai bi Naomi, ma in anmone nua sin: Nai Makhlon ma Nai Kilyon, sin anao neu pah Moab.

³Oke te sin natua anbi nane. Leka sin fe anbi nane, Nai Elimelekh in anmate. Onane te al in fenai nok in anmone nua sin.

⁴In anmone nua sin nane anmafe nok bife Moab, es kanan bi Orpa ma es anteni kanan bi Rut. Ton bo'mese

⁵namuni te bi Naomi in anmone nua sin anmate amsa, talantia bi Naomi naneku he in mone ma in anmone nua sin amsa.

⁶Tabu fauk-fauk namuni te bi Naomi in nen nak UISNENO anfe nalali tetus neu to Israel nok sekit ma mnonut le naleko. Es nane te bi Naomi nok in nanef nua sin naloitan he nasaitan pah Moab.

⁷Sin al-al sin anfen ma anfani neu Yehuda. Anbi lanan atnanan

⁸bi Naomi nak neu in nanef nua sin nane nak, “So nati' hi nua ki amfani nai neu hi aina sin ume. So nati' UISNENO anmo'e alekot neu ki on hi amsa amoe alekot neu kau ma neu sin le anmate nalali nane.

⁹So nati' UISNENO anfe neu hi nui bnapa bian he nati' hi mihakeb ume toko anteni.” Ma leka in na'uab nalali onane te, bi Naomi naseon sin ma in anek sin. Mes bi Orpa ma bi Rut sin ankae nahel-helon,

¹⁰ma sin nak neu bi Naomi nak, “Kahaf, Ain! Hai mok ko Ain amnao meu Aina ho pah.”

¹¹“Kaisa au anah ki!” bi Naomi natae onane, “so leko nesi hi amfani. Hi hem fani mok kau neu sa' ka? Au ka nabe'i af he uhonis ateni li'anmone he anfani hi mone?

¹²Amfani nai, au anah ki, natuin au umnasi nae le'ufen he mamone teni. Ma onle fe anmu'i panet ma afnekan amsa neu kau he mamone anbi fai i amsa ma au upeni anmone,

¹³ait hi amlomi hem pao antia sin nanae? Nansa' natuin lasi nane hi kam lomi fa he mamone mok atoni bian? Kahaf, au anah ki, kaisa hi amoe onane! Au naben nek susal neu sa' le mes him sutai natuin kasat UISNENO neu kau.”

¹⁴Bi Rut ma bi Orpa sin ankae nahel-helon anteni oke te bi Orpa in naseon ma in nek in ain babaf oke te in anfani kun. Mes bi Rut in kan lomi fa he naseon in ain babaf nane.

¹⁵Onane te bi Naomi nak neu in nak, “Rut, amkiso nai! Ho tataf in anfanien neu in pah ma in uisneno. Ho amsa amnao nai, au anah, mutuin in nai ma amfani nai!”

¹⁶Mes bi Rut in natae nak, “Ain, kais hom lenu kau he fani ma usaitan ko Ain! Au lomi he nao ok ko Ain. Fun ho amnao meu me te, anbi nane amsa au nao ok ko. Aina ho mutua anbi me, anbi nane amsa au lomi he utua. Aina ho nonot nane au nonot. Uisneno le Aina ho mululi ma mubes neune, au of ululi ma ubes neune amsa.

¹⁷Aina ho anmate anbi me amsa, anbi nane amsa au lomi he mate ma ansub kau. So nati' UISNENO ankas kau mafen le'uf, leka au usaitan na'ko Ain, so al lasi maten es anbati kit!”

¹⁸Bi Naomi in ankiso nak bi Rut in nahel neu he nao nokan, es nane te, in ka namolok fa sa'-sa' anteni.

¹⁹Ma sin nua sin anao piut ma sin nem antia anbi Betlehem. Leka sin nem antia anbi nane te, kot nane tuakenu ok-oke sin naskek. Ale bife anbi nane sin nak, “Namneo ka bi Naomi esle' nane ka?”

²⁰Mes bi Naomi natae nak, “Kais mo'en kau mak Naomi,” bi Rut in namolok nak onane, “so mo'en kau mak Mara, natuin Uisneno Akuasat Afin-finit nafetin nalali kau he moni nahenu nok menu.

²¹Anbi tabu au fen ma au anao u'ko i au mu'i ale sa'-sa', mes tabu i UISNENO neki kau au fani aum nok nim luman. Es nane te kais him tek kau mak Naomi anteni, natuin UISNENO Akuasat Afin-finit ankas nalali kau neki susal mafena anae le'uf!”

²²Onle nane lasi nu'un neu bi Naomi anfani na'ko Moab nok bi Rut in nanef atoni Moab nane. Sin nem antia anbi Betlehem anbi tabu fe hen lefi ane kase.