Read Uab Meto RUT 2 Bible Online

RUT 2 - Uab Meto bible

RUT 2

¹Bi Naomi anmu'i biaf ma benuf mese na'ko in mone amates Nai Elimelekh in ume nanan. Atoni nane anmu'it ma makana. In kanan Nai Boas.

²Anbi neno mese te bi Rut nak neu bi Naomi nak, “Ain, au toti ko leka hom lomi te au he nao eu lene he upapu' ane kase le oni anmofu na'ko ale nimaf amononut sin. Au naben of anmu'i atoni le of nafetin kau he au amoe lasi nane.” Leko, au anah!” bi Naomi natae onane, “amnao nai!”

³Onane te bi Rut in anao neu lene ma in napapu' ane kase natuin ale amnonut sin. Fun le in nao neu lene nane Nai Boas in lene kun.

⁴Ka lo fa onane te Nai Boas in nem na'ko Betlehem ma in anbasan in amnonut sin. In nak neu sin nak, “So nati' UISNENO In nok ki.” Ma ale in amnonut sin nak, “So nati' UISNENO anfe neu ko tetus Ama.”

⁵Oke te Nai Boas natoti in apaot amnonut nane nak, “Fenai me esle' nane ka?”

⁶Apaot amnonut nane natae nak, “In le nane fenai uf Moab le fe nem nok bi Naomi na'ko pah Moab.

⁷In antoti kau he nati' au ufetin in he natuin amnonut sin kotin he napapu' ane kase le anmofu anbi nain ma le anhake nabala. Na'ko nok-noka in anmepu piut, ma ka nasnas fa, ma in fe nasnas akle'o anbi ume lene nane.”

⁸Oke te Nai Boas nak neu bi Rut nak, “Ait hom nen fe. Ka nabe'i fa he ho amnao mupapu' ane kase anbi atoni bian sin lene. Mupapu' ambi i mok au bife ameput sin. Amkiso neu sin he sin anlefi anbi bale me. Mutuin sin piut ma kais mu'lo mu'ko sin. Ma leka ho meno, maiti oe na'ko ale kusi oe le atoni ameput sin natua nalali sin. Au fe ulali plenat neu sin he kais sin noki ko ai sin naunu ko.”

¹⁰Leka bi Rut in nen onane te in nabes anbi Nai Boas in human in matan ma in nak, “Usi, au ka tam fa ota he simo ale taos mo'et alekot nane na'ko ko Ama. Au le i atoni anao amnemat kau ma ka nabe'i fa he Ama ho amtao mata neu kau!”

¹¹Nai Boas natae nak, “Au nen ulali neu ale sa' le hom tao ma mo'e neu ho ain babaf na'ko neno in mone anmate. Au uhin ulali neu ho musaitan mulali ho mnasi sin ma ho pah ma ho aum ma mutua ambi i mok ale atoni-atoni le ho fe ka muhin fa sin.

¹²So nati' UISNENO anseunbanin ale ho lasi alekot nane. So nati' ho amsimo sa' le UISNENO Israel, anfe neu ko, natuin ho aum mulali he muneo ma muhaoftom meu In!”

¹³Bi Rut natae nak, “Namneo-namneo Ama ho muton ho lasi alekot neu kau, maski au ka umnes fa ok Ama ho ameput sin. Ho alekot nane Ama in namela au nekak.”

¹⁴Ma leka tabu antia he nati' sin anbukae, Nai Boas nak neu bi Rut nak, “Aum he nit atbukae nai. Seni utunu' esle' i.” Ma bi Rut in anbukae nok ale amnonut sin. Nai Boas amsa anfe neune utunu', ma bi Rut anbukae talantia namsen. Leka sin anbukae nalali, fe anmu'i in nesin.

¹⁵Nalali te bi Rut in anao ma napapu' anteni ane kase. Leka in nao nalali te, Nai Boas nak neu in amnonut sin nak, “Leka in naini ane kase le him futu milali sin, maut he in napapu'. Kais hi mimaeba in ai mito'an in. Leko nesi hi ambok akle'o-akle'o na'ko le hi amfutu milali sin nane, ma mimofut sin neu in he nati' in napapu' sin.”

¹⁷Bi Rut in napapu' piut ane kase anbi lene talantia manas anmabe. Leka in neso napoitan ane kase fuakenu na'ko ane kase ta'un nane, oni in nabuaba nan kilo bo'mese.

¹⁸Oke te in anfani neu kot ma neki in apapu' nane ma in naton nani neu in ain babaf neu in apapu nane amfaun. Ma in amsa anfe neu in ain babaf nane bukae le in ka nalali fa anbi tabu in anbukae anbi lene.

¹⁹Onane te bi Naomi nak neune nak, “Ho mupeni ale i ok-oke anbi me? Neno le i ho mepu anbi sekau in lene? So nati' Uisneno anfe tetus neu atoni le anmo'e alekot neu ko nane!” Oke te bi Rut nanu'un neu bi Naomi nak lene bale le in napapu' ane kase nane atoni mese in-ini ma atoni nane in kanan Nai Boas.

²⁰“Anfeto, atoni nane hit biaf sin es le anhaumak nok kit,” bi Naomi in nak onane. “In of mes hen sutai neu kit. So nati' UISNENO anfe tetus neu in. UISNENO nanokab In fef bela piut, leko neu atoni le fe anmoni ma neu atoni le anmate nalali.”

²¹Oke te bi Rut in nak anteni nak, “Ain, atoni nane in nak neu kau amsa nabe'i au upapu' ane kase piut ok ale in ameput sin talantia sin nalali mnonut ane kase ok-oke.”

²²“Koi, anfeto,” bi Naomi natae bi Rut, “namneo naleko nesi ho mepu bua'-bua' mok ale bife ameput nane anbi Nai Boas in lene. Natuin leka ho amnao meu atoni bian sin lene, atoni anbi nane sin mes noki ko ai sin naunu ko!”

²³Es nane te, bi Rut in natuin piut ale bife ameput nane anbi Nai Boas in lene talantia sin nalali mnonut ane kase ok-oke — leko anbi mnonut ane kase ahunut talantia mnonut ane kase amsoput. Ma na'ko tabu nane bi Rut natua nabua nok.