Read Uab Meto RUT 3 Bible Online

RUT 3 - Uab Meto bible

RUT 3

¹Fun tabu fauk-fauk namuni te, bi Naomi nak neu bi Rut nak, “Au mes he uhelnok he nati' ho amtoko ume toko ma mupeni ua alekot.

²Ait ho mepu mok ale bife ameput anbi Nai Boas, in lene ka? Nah, Nai Boas nane hit biafen es in. Es nane te, amnen nai! Mabe i of in anao hen teli ane kase anbi in lene.

³Muniu nai esle' i, ampake nai fomeni ma ampake ho bale pake amasat le leok le'uf. Oke te amnao nai meu bale le Nai Boas fe anmepu ma anteli ane kase anbine. Mes ampanat, kais-kaisa in nahine nak ho ambi bale nane. Ampao anbi nane talantia in anbukae ma ninu nalali.

⁴Amkiso mulek-leko nai in he nao hen tup anbi me. Kalu in antupen, ho amnao nai meu bale nane ma maiti in beti ai in mau tainusat, oke te amtup nai amhaumak in haen. Onane te in of naton neu ko sa' le mes ho he mo'e.”

⁵“Leko, Ain,” bi Rut natae onane, “of au tao utuin ale sa' le Aina ho muton neu kau.”

⁶Oke te bi Rut in anao neu bale teli ane kase. Anbi nane in anmo'e ale sa' le in ain babaf naton neune.

⁷Leka Nai Boas in anbukae ma ninu nalali, in anaben alekot ma in nekan amsa anmalin. Oke te in anao ma antup, anhaumak ane kase atupu aon bian. Fun nok aten-tena bi Rut in nem ma naiti Nai Boas in tainusat, nalali te in antup anhaumak Nai Boas in haen.

⁸Leka fai nanesab nok askeken Nai Boas anfen ma he nabaina in aon. In naskek natuin nit bife mese antup anhaumak in haen.

⁹In natoti nak, “Ho sekau ko?” Bi Rut natae nak, “Au bi Rut kau, Ama! Ama hai biafes anbi hai ume nanan le anhaumak le mes amsutai neu au monik. Ama hom lomi te maiti kau he fani Ama ho fenai.”

¹⁰“So nati' UISNENO anfe neu ko tetus, au anah ko,” Nai Boas natae onane. “Tanesa nok sa' le ho mo'e mulali neu ho ain babaf, onane te sa' le ho mo'e tabu le i nalile lasi manekat anae le'uf anteni. Ho nabe'i mami mone he atoni munif anbi atoni anmu'it sin ai atoni amamu'it amsa, mes ho ka mo'e fa lasi nane.

¹¹Es nane te, kais ho mumtau, Rut. Ale sa' le hom toti nane of ua unaoba ani; natuin ale atoni anbi kot i sin nahin nalali nak ho bife mese le nek ahinet ko.

¹²Ma namneo, au mes he sutai neu ho monim, natuin au hi biafes le anhaumak nok ki. Mes anmu'i atoni bian anteni le mes hen sutai neu ho monim. Ma in le nane hi biafes le anhaumak nis nok ki na'ko kau.

¹³Mabe i ho mumaika fe ambi i. Ma noka fa au of utoti in, ai in hen lomi ka he nanaoba in lasi sutais nane neu ko ai kahaf. Leka in anlomi, nane leko; mes leka in kan lomi fa, onane te au manta'en natuin Uisneno amonit, of au unaoba lasi sutais nane. Amtup nai ambi i talatia noka fa.”

¹⁴Onane te bi Rut antup anbi nane anhaumak Nai Boas in haen talantia noka fa. Ma noka fa fe nok-nok ana', bi Rut anfen nalali he nati' es kais nit in. Natuin Nai Boas in kan lomi fa neu bi Rut in nem anbi lene nane.

¹⁵Ma Nai Boas nak neu bi Rut nak, “Mumaika ho pilu muti amu nakaf ma mubela anbi i.” Ma bi Rut namaika in pilu muti amu nakaf ma nabela anbi nane. Nalali te Nai Boas an'op ane kase neu pilu muti amu nakaf nane in nanan oni kilo bo'nua. Oke te nasaeb neu bi Rut in hanun. Oke onane te Nai Boas in anao neu kot.

¹⁶Ma leka bi Rut in nem antia ume, in ain babaf natoti in nak, “Lasi anbol onme ka, anfeto?” Ma bi Rut in nanu'un ale lasi sa' le Nai Boas anmo'e neune.

¹⁷“Ma” bi Rut nak anteni neune nak, “anesi na'ko nane te in es anfe ale ane kase le i neu kau, natuin in nak ka nabe'i fa he au fani aum eu Aina nok nim luman.”

¹⁸Oke te bi Naomi nak, “Ampao nai fe, anfeto, talantia ho mit lasi nane in amsopun. Nai Boas in of ka nasnas fa leka in fe ka nanokab fa lasi i anbi neno i amsa.”