Read Uab Meto RUT 4 Bible Online

RUT 4 - Uab Meto bible

RUT 4

¹Nai Boas in anao neu bale buat anbi eno baki lape nane. Leka in antoko anbi nane te atoni le Nai Boas nak in le nane Nai Elimelekh in biafes le anhaumak nis nokan in anao anfini anbi bale nane. Oke te Nai Boas no'en in nak, “Au bia ko, aum nai ma amtoko nai ambi i!” Atoni nane in nem, oke te in antoko.

²Nalali te Nai Boas anhone amnatit bo'mese na'ko kot nane he antoko nabuan amsa ambi nane. Leka sin antoko nalali te,

³Nai Boas nak neu in biaf nane nak, “Bi Naomi in anfani nem nalali na'ko Moab. Ma in he nasosa nain pisa mese, hit biaf Nai Elimelekh amates ini.

⁴Ma au utenab ho mes muhin lasi nane. Ma leka hom lomi hem sos, ho muton nai neu amnasit-amnasit atokos anbi i. Kalu kahaf, ho muton nok aknino, natuin al hit nua kit es atmu'i kuasat neu lasi nane; ahunut es ho, ma nalali te au.” Atoni nane natae nak, “Namneo, of au sos ani.”

⁵Oke te Nai Boas nak, “Leko kalu onane. Mes kalu ho amsos nain nane na'ko bi Naomi, onane amsa ho mes maiti bi Rut, bife Moab, bife banu anmone amates na'ko bi Naomi. Natuin, nain nane mes he nabala anbi atoni amates nane in sufan.”

⁶Oke te atoni nane natae nak, “Kalu onane, au ka ube'i fa. Tabu le i leko nesi au ufetin au kuasat on atoni ahunut le namneo au he sos nain nane. Kan mu'i fa in otan au sos nain nane natuin nain of kau fani fa au sanut mofut sin ini. Leko nesi ho es amsos nain nane.”

⁷Anbi tabu nane leka atoni mese he nasosa ai anmantukal sa'-sa' es na'ko in-ini, ma he namepan lasi nane in amneon onane te atoni asosa nane nafetin in peni haef, oke te anfe neu atoni sasosat nane. Onle nane taos mo'et atoni Israel nahakeb lasi sosa ma sos nain anbi batan nane.

⁸Es nane te, leka atoni nane nak neu Nai Boas nak, “Ho es amsos nain nane,” in nafetin in peni haef oke te in nana'at neu Nai Boas.

⁹Es nane te Nai Boas nak neu mnasi-mnasi ma atoni bian le anbi nane nak, “Neno i hi al-al ki amfani saksi neu au sos ulali na'ko bi Naomi ale sa' le Nai Elimelekh amates nane anmu'i ma ale in anah sin, esle' Nai Kilyon ma Nai Makhlon amates sin anmu'i.

¹⁰Fun anesi na'ko nane au aiti bi Rut, bife Moab, bife banu Nai Makhlon amates nane in fenai he anfani au fenai. Ma nok nane te nain nane of nabala anfani mu'if na'ko ume nanan atoni amates nane. Ma in sufan sin amsa of sin nabala anbi in biaf sin ma anbi in kot. Mimnau nai au bia ki, neno i hi al-al ki amfani saksi neu lasi nane.”

¹¹Ale mnasi ma ale atoni bian le anbi nane sin nak, “Namneo, hai amfani saksi. So nati' UISNENO nabaina ho fenai nane on bia Rakhel ma bi Lea le nahonis li'ana namfau neu Nai Yakub. So nati' ho mupeni alekot anbi atoni-atoni na'ko Efrata ma so nati' ho mupeni kanaf anbi Betlehem.

¹²So nati' li'ana-li'ana le of UISNENO anfe neu ko nao nok bife munif le i of anmo'e ho ume nanan on Nai Peres, anmone na'ko Nai Yehuda ma bi Tamar.”

¹³Fun Nai Boas amsa naiti bi Rut anfani in fenai. UISNENO anfe tetus neu bi Rut talantia in naapu oke te in nahonis li'anmone mese.

¹⁴Ale fenai sin nak neu bi Naomi nak, “Pules ma liatas neu UISNENO! Natuin anbi neno i, In anfe nalali neu ko upuf li'anmone mese he nati' in anpanat ko. So nati' anah nane in kanan mateka anbi Israel!

¹⁵Ho nanef nane in nek namnau nis ko. In anfe nalali neu ko alekot le anesin ale sa' le li'anmone hitu sin anfe neu ko. Neno i In anfe nalali neu ko upuf li'anmone mese amsa, le of anfe monit fe'u neu ko, ma anpanat ma anfaf ko anbi neno ho mumnasi.”

¹⁶Bi Naomi in naiti li'ana nane oke te anpanat in nahenu nok lasi manekat anae le'uf.

¹⁷Ma ale fenai ume atnoes nokan sin nakanab li'ana nane Nai Obed. Ma neu atoni mese-mese sin naton nak, “Bi Naomi in napeni kun li'anmone mese!” Nai Obed le i es namuni te anfani amaf neu Nai Isai, ma Nai Isai nane Nai Daud in amaf.

¹⁸Ma le i Nai Daud in ape'an naubon na'ko Nai Peres, esle': Nai Peres, Nai Hezron, Nai Ram, Nai Aminadab, Nai Nahason, Nai Salmon, Nai Boas, Nai Obed, Nai Isai, Nai Daud.