Read Uab Meto 1 SAMUEL 1 Bible Online

1 SAMUEL 1 - Uab Meto bible

1 SAMUEL 1

¹Anmu'i atoni mese, in kanan Nai Elkana, na'ko uf Efraim. In natua anbi kot Rama, anbi pah neten Efraim. Nai Elkana nane Nai Yeroham anmone ma Nai Elihu in upuf. In antam Nai Tohu ume nanan Nai Zuf anmone.

²Nai Elkana anmafe nua, es kanan bi Nai Hana ma este kanan bi Penina. Bi Penina anmu'i anah, mes bi Hana kan mu'i fa anah.

³Ton-ton Nai Elkana in anao na'ko Rama neu Silo he naluli nabes ma natulu fua tulu neu UISNENO Akuasat Afin-finit. Le anfani Ana' fuat knino neu UISNENO anbi Silo es Nai Hofni ma Nai Pinehas, Nai Eli in anmone sin.

⁴Anbi neno leka Nai Elkana natulu fua tulu, bi Penina ma in anhenu ok-oke es-es napeni pa' ma nama' na'ko sisi fua tulu nane.

⁵Mes bi Hana al in napeni pa' ma nama' mese natuin UISNENO kan fe neune fa anah. Maski onane amsa Nai Elkana in nek nis bi Hana.

⁶Bi Penina in panun nane namenab bi Hana nekan ma nasi'u in, natuin UISNENO kan fe neune fa anah.

⁷Lasi nane anbol na'ko ton nao neu ton; leka sin anao neu Ume UISNENO, bi Penina namenab bi Hana nekan piut. Anfoe nan te bi Hana ankae ma kan lomi fa hen bukae natuin nasi'u in.

⁸Oke te Nai Elkana in mone natoti in piut-piut nak, “Hana hom kae neu sa' ka? Ma nansa' ho kam lomi fa hem bukae ma ho nekam antu' piut? Ai au ka maupa neu ko fa ka anesi na'ko li'anmone bo'mese?”

⁹Anbi neno mese leka sin anbukae nalali anbi Ume UISNENO anbi Silo, bi Hana in anfen na'ko mei bukae. Tabu nane Ana' Fuat Knino Nai Eli le in amsa anbi Ume UISNENO, in fe antoko anbi in atoko anhaumak ume eno. Nok nek tu'as anaek bi Hana an onen neu UISNENO ma ankae anme'-me'ul.

¹¹Oke te bi Hana natiaba in han manba'an, nak, “UISNENO Akuasat Afin-finit, amkiso fa Ho ate kau le i! Amkiso fa Ho ate kau au susal. Mumnau fa Ho ate kau ma kais amnikan Ho ate kau! Leka Ho amfe neu Ho ate kau li'anmone mese, Ho ate kau manba'an of au utulu in monin ok-oke neu Ko. Ho ate kau amsa manba'an nak in anakan funun of ka eu ani fa.”

¹²Bi Hana an onen a'lo le'uf, ma Nai Eli in ankiso bife nane fefan.

¹³Bi Hana an onen anbi in nekan nanan, es nane te al in lulun es namut-mutu, mes in hanan kan poi fa. Es nane te Nai Eli natenab nak in anmafu.

¹⁴Es nane te Nai Eli nak neune nak, “Nansa' ho mafu anbi i ka! Kais ho minu tua mina mtasa anteni!”

¹⁵Mes bi Hana natae nak, “Au ka mafu fa, ko Usi, au ka inu ani fa tua mina mtasa! Mes au nekak an ole, ma au fe a'onen he uton ale au nek susal neu UISNENO.

¹⁶Kais mutenab mak au bife lanan kau. Au onen onle i natuin au nek tu'as anae le'uf.”

¹⁷Oke te Nai Eli nak, “Kalu onane hom fani nai nok aomina. So nati' Uisneno Israel ansimo ho onen totis.”

¹⁸Bi Hana natae nak, “So nati' au upeni tetus na'ko au Ama ko.” Nalali te in anao, oke te in anbukae; ma in nekan kan tu' anteni fa.

¹⁹Neno nokfa onane te Nai Elkana ma in ume nanan sin anfen nok-noka, ma leka sin naluli ma nabes nalali neu UISNENO, oke te sin anfani neu Rama. Ma Nai Elkana nabua nok bi Hana, in fenai nane, ma namneo UISNENO ansimo in onen totis.

²⁰Bife nane in naapu ma nahonis li'anmone mese. Ma nakanab in Nai Samuel, natuin in nak, “Au toti ulali in na'ko UISNENO.”

²¹Fun antia in tabu anteni Nai Elkana nok in ume nanan sin anao anfani neu Silo he natulu fua tulu ton neu UISNENO. Ma anesi na'ko nane Nai Elkana in anmaba'an nalali he natulu fua tulu le in anbeti nateta nani.

²²Mes hae mese le i bi Hana in ka nok fa. In nak neu in mone nak, “Leka anah le i atsole talali, Nai Samuel au of eki nao neu Ume UISNENO, ma in of natua nabalah anbi nane anbi in monin ok-oke.”

²³Nai Elkana natae nak, “Leko, ho moe sa' le ho mutenab leko; ho mutua mubalah anbi hit ume talantia tabu hom sole hit anah. Ma so nati' UISNENO anmoe ho fef ba'an anfani lasi le anbol ma natonon.” Es nane te bi Hana in nabalah anbi ume talantia tabu ansole in anah.

²⁴Leka ansole nalali Nai Samuel, in ainaf neki in neu Ume UISNENO anbi Silo. Anbi tabu nane in fe an-ana kun. Bi Hana in neki bijae keso mese amsa in nan ton tenu, aen kase kilo bo'es, ma tua mina mtasa botil mese.

²⁵Sin anlolo bijae nane, oke te sin neki Nai Samuel neu Nai Eli.

²⁶Bi Hana nak neu Nai Eli nak, “Kais musesu kau, Usi. Ama ho fe mumnau kau ka? Au le i bife le afi Ama ho mit kau au hake bi i, ma onen neu UISNENO.

²⁷Au toti ulali anah i na'ko UISNENO. Ma au onen totis nane UISNENO ansimo nalali,

²⁸ma es nane te au utulu li'ana i in monin ok-oke neu UISNENO hen fani UISNENO in-ini kun.” Nalali onane te sin naluli ma nabes neu UISNENO.