Read Uab Meto 1 SAMUEL 10 Bible Online

1 SAMUEL 10 - Uab Meto bible

1 SAMUEL 10

¹Nalali te Nai Samuel in naiti mina bub fua mina anbi boti fatu, oke te in an'op min fomeni nane neu Nai Saul a'nakan, ma anek Nai Saul ma nak neune nak, “UISNENO naki'ab nalali ko hom fani kesel neu Israel In to. Ho of muplenat In to ma muhafo sin na'ko sin musu-musu sin. Lasi ataka mese neu ko nak UISNENO In anbeti nalali ko hem fani kesel neu In to esle':

²Leka neno i ho amnao musaitan kau, ho of mueku mok atoni nua anhaumak bi Rahel in naukel anbi Zelzah anbi pah Benyamin. Sin mes nak neu ko on i: Ale ho bikase luke mnanu sin le ho mami sin le nane napeni nalali sin. Ho Ama in nekan ka na'unu anteni fa neu ale mu'it-mu'it nane, mes in natoti piut-piut neu in hen moe onme ka he nati' napeni nafani ko.”

³Nai Samuel in nak anteni nak, “Na'ko nane ho amnao piut neu hau uf bale luli besa anbi Tabor. Anbi nane ho of mueku mok atoni tenu le fe an ali Betel he natulu fua tulu neu Uisneno. Ma anbi sin es neki bibi ana' tenu, ma es te neki utunu' pisa tenu ma es te anteni neki tua mina mtasa botil mese.

⁴Sin of na'bes neu ko ma anfe neu ko utunu' pisa nua le mes hom simo mani sin.

⁵Nalali te ho mes amnao meu tubu Uisneno anbi Gibea, bale um-ume atoni Filistin. Anbi eno hen tam neu kot, ho of mueku mok Mafefa knino pukan mese le ansanu nem na'ko tubu fua tulu. Sin nabso' ma ankoa', sin nabae heo', bano, bobi ma biola.

⁶Anbi tabu nane Smanan UISNENO of naplenat ko ma ho of musbo' mutuin sin ma amkoa' mutuin sin, oke te anfe neu ko monit fe'u talantia hom anfani atoni fe'u mese.

⁷Leka ale nane anbol, ho moe nai sa' le ho mutenab leko, natuin Uisneno In nok ko.

⁸Oke onane te ho mes amnao meu Gilgal ma ampao anbi nane neno hitu. Mes au eti he utulu fua tulu mnotu ma fua tulu halan, ma uton neu ko sa' le mes ho he moe.”

⁹Fun leka Nai Saul nasaitan Nai Samuel, Nai Saul ansimo monit fe'u na'ko Uisneno. Ma ale sa' le Nai Samuel naton nani neune amsa anbol anbi neno nane.

¹⁰Leka Nai Saul nok in ameput sin nem antia Gibea, sin naeku nok Mafefa knino pukan mese. Anbi tabu nane Smanan Uisneno nahenu Nai Saul ma in natuin abso'ot sin ma han koa ale Mafefa knino nane.

¹¹Atoni-atoni le afi nahin in na'ko ahunut, sin nit in taos nane, oke te sin anmantotin es nok es nak, “Sa' anbol neu Nai Kish anmone nane ka? Ait Nai Saul amsa anfani Mafefa knino ka?”

¹²Oke te atoni mese le anbi nane in natoti nak, “Onme ka nok ale Mafefa knino bian nane — sin amaf es sekau ka?” Nane lasi in un uab molok mapolin i, “Ait Nai Saul amsa anfani Mafefa knino ka?”

¹³Leka Nai Saul nabso' nalali ma ankoa nalali, in anao neu baki tulu anbi tubu tunan.

¹⁴Nai Saul babaf ankiso nit in nok ma in ameput, oke te in natoti sin nak, “Hi mi'ko me ka?” Nai Saul natae nak, “Hai mami bikase luke mnanu amnekut nane, ma leka hai ka mipeni fa sin, oke te hai amnao ma mieku mok Nai Samuel.”

¹⁵In babaf natoti sin nak, “Ma in nak sa' neu ki ka?”

¹⁶Ma Nai Saul natae nak, “In naton neu kai nak mu'it-mu'it nane napeni nalali sin.” Mes Nai Saul in ka naton fa neu Nai Samuel naiti nalali in anfani kesel.

¹⁷Oke te Nai Samuel no'en to Israel he nati' sin nabua anbi Mizpa,

¹⁸ma in nak neu sin nak, “I a'an UISNENO, atoni Israel sin Uisneno, nak, ‘Au es upoitan ulali ki na'ko Mesir ma ufetin ki na'ko plenat atoni Mesir ma ale uf bian le anhamu'i ki.

¹⁹Au ufetin ulali ki na'ko ale susal ma nukat, mes muni i him tite milali Kau, hi Uisneno, natuin hi amtoti he nati' Au fe neu ki kesel mese. Neu, leko, amnibun mibuabom nai anbi Au humak Au UISNENO, natuin uf ma natuin hi amfen sin kankenu.’ ”

²⁰Oke Nai Samuel anlelu uf-uf Israel anfonat anao mat ma uf Benyamin es anbeti antom sin.

²¹Leka anlelu uf Benyamin in ume nanan sin anfonat anao mat, onane te Nai Matri ume nanan es mabeti. Ma namuni te ale atoni anbi Nai Matri ume nanan anfonat anao mat, onane te Nai Saul Nai Kish anmone es mabeti. Oke te sin nami Nai Saul mes in kan bine fa.

²²Es nane te atoni-atoni nane sin natoti UISNENO nak, “Koi UISNENO, namneo ka atoni nane in es i ka?” UISNENO natae nak, “Nai Saul natol'on es ale bale sin kotin.”

²³Oke te sin anao neu bale nane nok labah ma anhone Nai Saul na'ko nane, ma sin neki neu to amfaut sin atnanan. Ma Nai Saul anhake anbi sin atnanken ma in amnanun anesi na'ko to ok-oke; atoni bian al antia in hanun.

²⁴Nalali te Nai Samuel nak neu to nak, “I atoni le UISNENO anbeti, katit fa es anbi kit ok-oke on in.” To ok-oke naba' nak, “So hit kesel anmoni!”

²⁵Nalali te Nai Samuel natonan to neu kesel in kuasat ma in lekat, oke te antui nani anbi sulat le napan nani anbi bale knino. Oke te Nai Samuel anlelu to ok-oke anfani neu sin ume mese-mese.

²⁶Nai Saul amsa anfani neu ume anbi Gibea, ma atoni meo pa'e le UISNENO nabe'ab sin nekan sin natuin in.

²⁷Mes atoni amaufinut fauk sin nak, “Leka me atoni i he maota neu kit ka?” Sin kan sian fa in ma ka neki fa tulu nekaf neu in. Mes in anmoe'son on in ka nahin fa.