Read Uab Meto 1 SAMUEL 11 Bible Online

1 SAMUEL 11 - Uab Meto bible

1 SAMUEL 11

¹Namuni te Nai Nahas, kesel Amon, in neki in to meo oke te sin aniusnan kot Yabesh anbi pah Gilead. Kot Yabesh tuaken sin neki uab neu Nai Nahas on i, “So ho moe lasi manba'an mok kai, onane te of hai miusi ko.”

²Mes Nai Nahas natae sin nak, “Au lomi he moe lasi manba'an ok ki nok au totis i esle', ‘Of au lo'i upoitan hi matam a'ne'u mese-mese on si'ut ma kle'at mese neu Israel ok-oke!”

³Nalali te mnasi-mnasi kot Yabesh natae nak, “Hai amtoti mufetin kai neno hitu he nati' hai amsonu haef neu pah Israel ok-oke. Leka katit fa le hen bab kai, onane te of hai miusi meu ko.”

⁴Onle nane ale haef sin le nane antia Gibea, bale Nai Saul natua anbine. Leka sin naton lasi nane, to ankae natuin sin namtau.

⁵Anbi tabu nane Nai Saul in fe anfani nem na'ko in lene neki in bijae sin. In natoti nak, “Anmu'i lasi sa' ka? Nansa' ale atoni ok-oke sin ankae?” Oke te sin naton neune lasi le haefen na'ko Yabesh sin neki nane.

⁶Leka Nai Saul in amnen lasi nane te, Smanaf Uisneno nahenu Nai Saul in nekan.

⁷Nok to'as anae le'uf in naiti bijae nua ma anlolo sin oke te anheli pisa-pisa. Nalali te in ansonu sisi nane neu pah Israel ok-oke nok aplenat on i, “Sekau le ka nok fa Nai Saul ma Nai Samuel anbi makenat i, ale in bijae sin of anlolo ma anheli pisa-pisa onle i amsa!” To Israel namtau neu sa' le oni UISNENO of anmoe nani, es nane te atoni ok-oke, katit fa es he namaika, sin naloitan anao mat hen sin anmaken bua-bua.

⁸Sin nabua ma anso'i sin anbi Bezek: Napeni atoni 300.000 na'ko Israel ma atoni 30.000 na'ko Yehuda.

⁹Nalali te sin natonan haef na'ko Yabesh nak on i: “Mitonan Yabesh tuaken, mak noka fa manas fe kan namtetu fa, sin of napeni babat.” Leka Yabesh tuaken sin ansimo han taes nane, sin nekan anmalin anae le'uf.

¹⁰Ma sin nak neu Nai Nahas nak, “Noka fa hai of mina'tom meu ko, ma nabe'i ho moe kai natuin kun ho nek lomit.”

¹¹Noka fa, fe nok-noka ana, Nai Saul anbati in to meo anfani pukan tenu. Ma leka anmeusab sin antaman um-ume atoni Amon ma anken sin. Fe manas ka namtetu fa, Nai Saul in to meo sin nis ma anbe'u nalali musu. Atoni-atoni Amon le sin naen nafetnok, sin naen nasan'ok katit fa atoni nua le sin naen nabua.

¹²Nalali te to Israel natoti Nai Samuel nak, “Afi atoni-atoni le sin nak Nai Saul kan tam fa ota hen fani kesel sin eseun me ka? So nati' Ama muna'at sin neu kai, he nati' hai mimate sin.”

¹³Mes Nai Saul nak, “Ka nabe'i fa he hi mimate atoni mese amsa anbi neno i, natuin anbi neno i UISNENO nafetin naleli Israel.”

¹⁴Oke te Nai Samuel nak neu sin nak, “Aim nai hit al-al kit atnao nai teu Gilgal ma ta'kiab Nai Saul on hit kesel.”

¹⁵Ma sin al-al sin anao ok-oke neu Gilgal, ma anbi bale luli besa nane sin naki'ab Nai Saul on kesel. Sin natulu fua tulu halan, ma Nai Saul nok to Israel ok-oke sin naliatas lasi nane.