Read Uab Meto 1 SAMUEL 13 Bible Online

1 SAMUEL 13 - Uab Meto bible

1 SAMUEL 13

¹Anbi neno mese, leka Nai Saul ansae nalali kesel,

²in anbeti atoni Israel 3.000; na'ko atoni nifun tenu nane atoni 2.000 nok Nai Saul anbi Mikhmas ma anbi pah neten Betel, ma 1.000 anteni sin nok in anmone Nai Yonathan sin anao neu Gibea anbi pah uf Benyamin. Ma to bian le anesin sin anfani neu sin ume mese-mese.

³Oke te Nai Yonathan namate to meo naek Filistin le anbi Gibea, ma uf Filistin amnen lasi nane. Oke te Nai Saul anlelu hen fu knit neu pah ok-oke he no'en atoni Ibrani he nati' an anao he sin anmakenan.

⁴Fun natonan to Israel ok-oke nak Nai Saul namate nalali to meo naek Filistin ma atoni Filistin sin nato'an anae le'uf neu atoni Israel. Es nane te to natuin han amno'en nane ma sin nabuabok nok Nai Saul anbi Gilgal.

⁵Fun atoni Filistin sin amsa nabubok hen maken nok atoni Israel; sin anmu'i aklet makenat 30.000, asae bikase 6.000, ma to meo amfaun on asnaen anbi tasi ninen. Sin nahakeb sin um-ume anbi Mikhmas neno saen Bet-Awen.

⁶Nalali te sin antam ma anken Israel nok matani, talantia atoni Israel sin namtau anmate. Atoni Israel bian sin naen ma natolo' anbi nuat ma bola' anbi putun ma fatu putun atnanken, ai anbi bola' oe mata ma anbi bola' nain nanan,

⁷ma bian anteni le anlak Noel Yordan ma antam neu pah Gad ma Gilead. Nai Saul in fe anbi Gilgal, ma to le natuin in anlilitai natuin sin namtau.

⁸Nai Saul in anpao Nai Samuel neno hitu, anmatom nok han manba'an Nai Samuel neu Nai Saul, mes Nai Samuel in fe ka nem antia fa Gilgal amsa, ma anbi nane te to bian sin naen nasaitan Nai Saul.

⁹Es nane te in nak neu sin nak, “Meki nem neu i fua tulu mnotu ma fua tulu halan nane.” Oke te in neki non natulu fua tulu mnotu nane.

¹⁰Mes fe in notu nalali onane te, Nai Samuel in nem antia. Nai Saul ansenu in hen fe lasi tola neu in,

¹¹mes Nai Samuel natoti Nai Saul nak, “Usi ho moe mulali sa' ka?” Nai Saul natae nak, “Au kiso it to sin naen nasaitan kau, ma Ama ho ka aum amtia fa anbi neno le Ama hom lek mani. Oke anteni te, atoni Filistin sin nabua nalali anbi Mikhmas.

¹²Oke te au utenab, kais-kaisa to meo Filistin ka lo fa anteni te sin antam nem ma anken kau anbi Gilgal i, mes au ka toti fa UISNENO In nek amanekat. Es nane te au aiti atfeka he utulu fua tulu nane.”

¹³Leka Nai Samuel anen lasi nane te in nak neu Nai Saul nak, “Lasi le Usi ho moe le nane lo lasi mono nae le'uf kun. Leka onle Usi ho mutuin UISNENO In aplenat neu ko, UISNENO of naki'ab Usi ma Usi ho sufam hem fani kesel neu Israel talantia nabal-bal.

¹⁴Mes anbi tabu le i Usi ho plenat of kan hake na'ki fa piut. Natuin Usi ho ka mutuin fa UISNENO In aplenat, es nane te UISNENO In anbeti nalali atoni bian anteni le In anlomi he naiti in hen fani kesel neu In to.”

¹⁵Nalali te Nai Samuel nasaitan Gilgal ma in anao anfini neu Gibea anbi pah Benyamin. Nai Saul anso'i in to meo sin, sin amfauken oni atoni 600.

¹⁶Nai Saul ma Nai Yonathan in anmone ma in atuinas sin natua anbi um-ume anbi Geba anbi uf Nai Benyamin in pah; ma atoni Filistin natua anbi um-ume anbi Mikhmas.

¹⁷Anbi neno nane amsa atoni asikat pukan tenu na'ko Filistin sin anfen na'ko um-ume Filistin anao he sin nasikan; pukan mese anao an ali Ofra anbi pah Syual,

¹⁸ma pukan mese anao an ali Bet-Horon, ma pukan mese anteni anao an ali nakat le anbaina neu Anonof Zeboim ma mnela snaen.

¹⁹Anbi Israel ok-oke kan mu'i fa apakae besi natuin atoni Filistin ka nafetin fa atoni Ibrani hen moe suni ma auni.

²⁰Es nane te atoni Israel sin mes anao neu atoni Filistin leka sin hen fon sin besi foi afu, sin a'ote, sin fani ma sin besi lefi ane;

²¹in upan nane esle' solo mese neu hen fon fani ma naleko beso bijae, ma solo nua neu hen fon besi foi afu ai a'ote.

²²Es nane te, anbi neno makenat anbi Mikhmas nan, katit fa es na'ko to Israel le hen mu'i suni ai auni, so al Nai Saul ma Nai Yonathan in anmone.

²³Atoni Filistin sin nahakeb bale paot mese hen panat tubu aon bian anbi Mikhmas.