Read Uab Meto 1 SAMUEL 15 Bible Online

1 SAMUEL 15 - Uab Meto bible

1 SAMUEL 15

¹Anbi neno mese Nai Samuel nak neu Nai Saul nak, “UISNENO es anlelu kau aiti ko hem anfani kesel neu Israel In to. Es nane te, so nati' Usi hom nen UISNENO Akuasat Afin-finit In a'an.

²In of ankas atoni Amalek, natuin sin amfen anlaban atoni Israel leka atoni Israel anpoi na'ko Mesir.

³Es nane te amnao nai ma amlaban atoni Amalek ma mule'un muskuku ale sa' le sin anmu'i. Kaisa mihena sa'-sa' amsa; mimate ale atoni, bife, li'ana, ma li'ana susu; onane amsa bijae, bibi kase, bikase paha snaen ma bikase luke mnanu.”

⁴Oke te Nai Saul in nabalab in to meo sin ma anso'i sin anbi Telaim; to meo na'ko Israel atoni 200.000 ma na'ko Yehuda atoni 10.000.

⁵Nalali onane te Nai Saul nok in to meo ma sin anao neu kot Amalek, ma anmoe a'lau anbi nonof noe ametos.

⁶Nai Saul amsa ansonu han amnaut neu atoni Keni nak, “Amnao misaitan atoni Amalek, he nati' kais au umate ki ok-oke mok sin natuin afi neno ahunut hi mnasi sin naton nalali lasi alekot ma anmafutu nok atoni Israel leka atoni Israel sin nem na'ko Mesir.” Onane te atoni Keni sin anao nasaitan bale nane.

⁷Oke te Nai Saul anmaken nok atoni Amalek, ma in nis ma anbe'u sin na'ko Hawila antia Syur anbi Mesir neno saen.

⁸Ale to ok-oke ma to meo Amalek Nai Saul namate sin. Mes in anheke Nai Agag kesel Amalek ma Nai Saul nok in to meo sin ka namate in onane amsa bibi kase ma bijae apokat, ma sa'-sa' le maupa; al mu'it le ka maota ma ka maupa fa esle' nale'un sin.

¹⁰Oke te UISNENO nakua a'an neu Nai Samuel nak,

¹¹“Au nekak antu' natuin Au aiti ulali Nai Saul ma anfani kesel, natuin in ankoti Kau, ma ka nanaoba fa Au plenat sin.” Nai Samuel nekan na'unu, ma in ansakoi piut neu UISNENO anbi fai mese in a'lon.

¹²Noka fa, fe nok-nok ana' Nai Samuel anfen ma anao he naeku nok Nai Saul. Ma sin natonan Nai Samuel nak Nai Saul in anao nalali neu kot Karmel he nahakeb fatu mnaut neu in aon kun anbi nane, oke te anao anfini neu Gilgal.

¹³Leka Nai Samuel naeku nok Nai Saul, Nai Saul nak neu Nai Samuel nak, “So nati' UISNENO anfe tetus neu ko Ama! Au unaoba ulali UISNENO In aplenat.”

¹⁴Mes Nai Samuel natae Nai Saul nak, “Kalu onane, nansa' au amnen bijae anhomae ma bibi kase anmeo'me?”

¹⁵Nai Saul natae nak, “Mu'it-mu'it nane le sin nasik nani na'ko atoni Amalek. Bibi kase ma bijae leok le'uf to naiti nalali he natulu on fua tulu neu UISNENO ho Uisneno. Mes bian hai mile'un mani ok-oke.”

¹⁶Leka Nai Samuel anen lasi nane te in nak, “Maut fe, au he uton neu ko sa' le fini fai Uisneno naton nalali neu kau.” Nai Saul nak, “Mukua a'am.”

¹⁷Nai Samuel nak, “Ai Usi ho kam fani mulali fa anakaf neu uf-uf Israel, maski Usi ho mak ho ka maota ko fa ka? UISNENO anbeti nalali ko Usi ma ho amfani kesel neu Israel,

¹⁸oke te UISNENO anlelu ko he mule'un atoni Amalek amaufinut nane. UISNENO anlelu ko he maken ma manua amlaban sin ma muneku sin ok-oke.

¹⁹Nansa' ho ka mutuin fa UISNENO In aplenat? Nansa' hi al-al ki oke maiti bale sikan ma nok nane te ho moe UISNENO nekan antu'?”

²⁰Nai Saul natae nak, “Au utuin ulali UISNENO In aplenat, ma au nao maken ma manua matom nok UISNENO In aplenat neu kau; Nai Agag kesel Amalek au heke eki ma ale atoni Amalek au umate ulali sin.

²¹Mes au to meo sin ka namate fa mu'it ok-oke; sin anbeti bibi kase ma bijae le leok le'uf na'ko sa' le sin nasik nane he natulu nani anbi Gilgal on fua tulu neu Uisneno ho Uisneno.”

²²Mes Nai Samuel nak, “UISNENO In anlomi nesi neu lasi me, het nen In a'an ai fua tulu tnatas? Atnen UISNENO naleko nesi na'ko fua tulu tnatas. Tatuin UISNENO naleko nesi na'ko bibi kase in balun.

²³Tanakfatu neu UISNENO papmese onle sanat tanaoba lasi mnane, ma nek a'moko papmese nok sanat luli besa neu uisneno teta. Natuin hom laban mulali UISNENO In aplenat, onane te UISNENO amsa kan lomi anteni ko fa ma antite ko on kesel.”

²⁴Leka Nai Saul in nen lasi nane te in nak neu Nai Samuel nak, “Namneo au usanab ulalien. Au tanhai UISNENO In aplenat ma au ka utuin fa Ama ho fainekat. Au umtausan au to meo sin oke te au nen sin han totis.

²⁵Mes au totis ko Ama, amsako fa au sanat sin ma amfani mok kau neu Gilgal, he nati' au ululi ma ubes neu UISNENO.”

²⁶Mes Nai Samuel natae nak, “Au ka lomi fa he fani ok Usi. Hom laban mulali UISNENO In aplenat, ma tabu i In kan simo anteni Usi fa on Kesel Israel.”

²⁷Oke te Nai Samuel nali'on he nao, mes Nai Saul natau in ma ana' Nai Samuel in sobalu bet kone talantia sobalu bet kone nane natpisu.

²⁸Oke te Nai Samuel nak neu Nai Saul nak, “Anbi neno i UISNENO anpisu lasi plenat Israel na'ko Usi, ma anfe neu atoni bian le naleko nesi Usi.

²⁹Fun Apinat Uisneno Israel ka namoe fa ma ka nabaina fa In tenab In ne'ob, natuin In ka atoni pah pinan fa.”

³⁰Nai Saul natae nak, “Au usanab ulalien. Mes ambab kau Ama, amfani mok kau he nati' nabe'i au ululi ma ubes neu UISNENO Ama ho Uisneno. Ma nok nane te Ama ho mutola kau anbi ale au nakaf sin ma anbi Israel sin matan ok-oke.”

³¹Ma Nai Samuel anfani nok in neu Gilgal, ma Nai Saul naluli ma nabes neu UISNENO.

³²Nalali te Nai Samuel nak, “Meki Kesel Nai Agag nem neu i.” Nai Agag anao neu Nai Samuel, nok apanet ma afnekan natuin in natenab nak, “Lasi maten anfini nalalien.”

³³Oke te Nai Samuel nak neu Nai Agag nak, “On ho suni anmoe bife namfau naneku sin anhenu, onane amsa ho aina of naneku in anmone.” Oke te Nai Samuel in ote naknutu Nai Agag anbi baki tulu Gilgal matan.

³⁴Oke te Nai Samuel in anao kun neu Rama, ma Kesel Nai Saul anfani neu in ume anbi Gibea.

³⁵Ma Nai Samuel in ka nit anteni fa Nai Saul, talantia in anmate. Mes Nai Samuel in nekan antu' natuin UISNENO nekan na'unu neu In naiti nalali Nai Saul anfani Kesel Israel.