Read Uab Meto 1 SAMUEL 16 Bible Online

1 SAMUEL 16 - Uab Meto bible

1 SAMUEL 16

¹Namune te UISNENO nakua a'an neu Nai Samuel nak, “Talantia leka anteni ho nekam nanu'on neu Nai Saul? Ai kan tite nalali fa in on Kesel Israel? Es nane te, maiti mina bub fua mina ma amnao nai meu Betlehem, meu atoni mese in kanan Nai Isai, natuin na'ko in anhen Au beti ulali mese hen fani kesel.”

²Mes Nai Samuel natoti nak, “Au mes he moe lasi nane onme ka? Leka Nai Saul in nen lasi nane, in of namate kau!” UISNENO natae nak, “Meki bijae tipu mese, ma mutonan to mak hom nao meu nane ma mutulu fua tulu neu UISNENO.

³Oke te hom hone Nai Isai neu luli besa fua tulu nane, ma of Au uton neu ko sa' le mes ho he moe mani. Atoni le Au lek ani neu ko mes ho muki'ab mani anfani kesel.”

⁴Ma Nai Samuel anmoe onle UISNENO nak neune. Leka in nem antia Betlehem, ale mnasi kot sin nem ma ansenu in nok amtaus ma sin natoti nak, “Ama ho aum ma amnono kai meki tetus ka?”

⁵Nai Samuel natae nak, “Tebes, namneo. Au aum he utulu fua tulu neu UISNENO. Miknino hi aomenu he nati' nabe'i mituin luli besa fua tulu nane.” Nai Isai ma in anhenu anlelu sin naknino sin aoken mese-mese, ma in anhone sin neu luli besa nane.

⁶Leka sin nem nabua ma Nai Samuel in nit Nai Eliab Nai Isai anmone, in natenab nak, “Tebes le i es of UISNENO anbeti.”

⁷Mes UISNENO nakua a'an neu Nai Samuel nak, “Kaisa hom kiso in human namas ma hae mnanu; ka in fa le Au he lomi. Au ka kiso fa onle mansian ankiso. Fun mansian ankiso humaf, mes Au kiso nekaf.”

⁸Nalali te Nai Isai no'en in anmone Nai Abinadab, oke te anlelu in anao neu Nai Samuel. Mes Nai Samuel nak, “UISNENO kan beti fa in amsa.”

⁹Oke te Nai Isai anlelu Nai Syama anao mat, mes Nai Samuel nak, “UISNENO kan beti fa in amsa.”

¹⁰Onane Nai Isai anlelu in anmone hitu sin anao mat neu Nai Samuel, mes Nai Samuel nak, “UISNENO kan beti fa sin.”

¹¹Oke te Nai Samuel nak neu Nai Isai nak, “Ho anmone sin ok-oke ala sin esle' i ka?” Nai Isai natae nak, “Fe anmu'i anmone mese anteni, le a'hetu susu, mes in natuku bibi kase.” Nai Samuel nak, “Amlelu he no'en in, natuin of hit kat bukae fa fe leka in fe ka nem fa.”

¹²Oke te Nai Isai no'en li'ana nane. Namneo in atoni munif mese le namas, le kan mu'i fa menas, ma in matne knino le'uf. Oke te UISNENO nakua a'an neu Nai Samuel nak, “In esle' i; muki'ab in nai!”

¹³Nai Samuel naiti mina bub fua mina nane nok labah ma naki'ab Nai Daud nok luli besa op min fomeni anbi in tataf sin matken. Anbi tabu nane amsa Smanan UISNENO antam neu Nai Daud. Na'ko neno nane ma neno bian anteni Smanan UISNENO nok in piut-piut. Nalali te Nai Samuel anfani neu Rama.

¹⁴Smanan UISNENO nasaitan nalali Nai Saul, ma UISNENO ansonu sman le'uf mese ma naunu Nai Saul piut-piut.

¹⁵Es nane te Nai Saul in ate sin nak neu in nak, “Hai mihin nak sman le'uf le UISNENO ansonu nem naunu ko piut-piut.

¹⁶Kalu Usi hom lomi, hai he mami atoni mese le na'bae nahin biola. Leka sman amle'ut nane naunu Usi ho, atoni nane na'bae biola, ma Usi of ho amnaben amtainine amfani.”

¹⁷Oke te Nai Saul naplenat sin nak, “Mami atoni mese nai le na'bae nahin heo ma biola ma meki in nem neu i.”

¹⁸Leka sin anen onane te in ate mese natae nak, “Nai Isai atoni Betlehem nane in anmu'i li'anmone mese le na'bae nahin biola ma heo. In atoni ka amtaus fa ma to meo alekot mese. Anesi na'ko nane te in atoni abe'it ma matani ma in namolok amsa te nahin, ma UISNENO anbab in piut-piut.

¹⁹Onane te Nai Saul ansonu haef neu Nai Isai neki a'at i nak, “Amlelu ho anmone Nai Daud, le anpao ho bibi kase sin nane he in nem neu kau.”

²⁰Oke te Nai Isai anheke bikase luke mnanu mese, ma nasaeb bibi tipu mese, utunu', ma nius pasu mese le nahenu nok tua mina mtasa. Ale nane ok-oke in anfe nani sin neu Nai Daud he nati' natnat nani sin neu Nai Saul.

²¹Onle nane Nai Daud nem neu Nai Saul ma anfani in atuthaes. Nai Saul in nek nis Nai Daud ma naiti in ma anfani in amneki bale manuat.

²²Nalali te Nai Saul ansonu hanaf neu Nai Isai nak, “Au lomi Nai Daud. Mufetin in he namaika nabalah anbi i ma antuthae kau.”

²³Na'ko neno nane, leka sman le'uf nane nem neu Nai Saul Nai Daud naiti in biola ma na'bae in biola nane. Oke te Nai Saul in anaben naleko ma antainine, natuin sman le'uf nane nasaitan in.