Read Uab Meto 1 SAMUEL 17 Bible Online

1 SAMUEL 17 - Uab Meto bible

1 SAMUEL 17

¹Anbi neno mese atoni Filistin sin neki sin to meo ma sin nem hen maken ma anmanua. Sin naloitan sin to meo anbi kot Sokho, anbi pah Yehuda ma nahakeb sin um-ume anbi Sokho ma Azeka atnanken, anhaumak Efes-Damim.

²Nai Saul ma atoni-atoni Israel sin nabua amsa ma nahakeb sin um-ume anbi Anonof Ela; sin naloitnok anmabaina nok atoni-atoni Filistin.

³To meo atoni Filistin sin anhake anbi tubu bnapaf aon bian ma Israel sin anbi tubu bnapaf aon bian anteni, ma anbi atnanken anmu'i nonof mese.

⁴Atoni meo naek mese le anmabanat matani in kanan Nai Goliat, na'ko kot Gat, anpoi na'ko um-ume Filistin hen laban atoni Israel. In amnanun oni meter tenu,

⁵ma in anpake sobe niti molo ma sobalu makenat niti molo le mafenan oni kilo bo'nim am hitu.

⁶In haen sin mapake neki niti molo matosi, ma auni niti molo anbi in hanun.

⁷In auni haun a'naen onle senu le anpake anbi tenu, ma in auni panan besi mafena oni kilo hitu. Atoni meo mese anao nahunun in, neki in ben aninit.

⁸Nai Goliat in anhake ma ankoa neu to meo Israel nak, “Hi he moe sa' anbi nane ka? Ai hi he maken ka? Au atoni Filistin kau, hoi ate-ate Nai Saul! Him beti atoni mese anbi ki le abe'it ma matani ma ansanu nem hen laban kau.

⁹Ma leka hai nua kai mines'om anbi makenat nane, ma in namate kau, haim lomi hem fani hi ate, mes leka au es is ma be'u ma umate in, hi mes amfani hai ate.

¹⁰Aim nai esle' i amsa, au laban to meo Israel; ambati es nai he in anlaban kau!”

¹¹Leka Nai Saul ma in to meo sin anen uab laban nane, sin naskek ma namtau anae le'uf.

¹²Nai Daud Nai Isai anmone atoni Efrata, na'ko Betlehem anbi Yehuda. Nai Isai anmu'i anmone fanu, anbi neno Nai Saul in ana' aplenat, Nai Isai namnasi anae le'ufen.

¹³Nai Isai anmone anaet tenu sin natuin Nai Saul anbi makenat. Anmone anaet kanan Nai Eliab, le natuin in Nai Abinadab, ma tenu es Nai Syama.

¹⁴Ma Nai Daud nane anah a'hetu susu. Anbi neno in tataf anaet tenu nane sin natuin Nai Saul anbi makenat,

¹⁵Nai Daud anfoenan te nasaitan Nai Saul ma anfani neu Betlehem he natuku in amaf in bibi kase sin.

¹⁶Anbi neno bo'ha in a'lon, he nok-noka ma neno anmabe, Nai Goliat anfonat nem anhaumak to meo atoni Israel ma antumatan sin.

¹⁷Anbi neno mese Nai Isai nak neu Nai Daud nak, “Maiti manan ho tata sin pen seka kilo bo'mese ma utunu' bo'mese, ma meki neu ho tata sin anbi um-ume to meo sin balken.

¹⁸Ma meki susu lite pisa bo'mese i neu to meo nakaf. Ma mutoti neu ho tata sin moniken onme, ma meki ataka mese neu kau nak ho mueku mok sin ma sin anbi aomina.

¹⁹Sin eseun Anonof Ela nok Kesel Nai Saul, ma ale atoni Israel sin fe anmakenan anlaban atoni Filistin.”

²⁰Ma noka fa, fe nok-nok ana', Nai Daud anfen oke te in naloitan. In nana'at in bibi kase sin neu apaot mese, nalali te in naiti in baut sin oke te in anao, natuin sa' le in amaf anba'an. In nem antia um-ume anbi tabu atoni Israel anfen ma anao neu bale makenat ma sin antek a'baf hen makenan.

²¹To meo Filistin ma to meo Israel anhake matumatan ma anpao nahel neu hen makenan.

²²Oke te Nai Daud nana'at in baut sin neu apaot bale manuat nane, ma in naen neu bale makenat he naeku nok in tataf sin.

²³Mes leka in fe namolok nok sin, Nai Goliat anpoi nem neu mat ma ankoa atoni Israel hen makenan, onle neno-neno in anmoe. Ma Nai Daud amsa anen in uab nane.

²⁴Leka atoni Israel sin nit Nai Goliat, sin naen natuin sin namtau anmate.

²⁵Ma sin mauaben es nok es nak, “Amkiso in! Amnen nai in han malaket! Nai Saul hit kesel anmanta'en nalali nak sekau es namate Nai Goliat, of anfe neune baen anae le'uf. Kesel amsa of anfe in anfetnai neune he nati' anfani in fenai. Ma atoni nane in ume nanan sin of nafetin sin na'ko baen noni poni.”

²⁶Oke te Nai Daud nak, “Atoni Filistin mesokan nane lo mataen le'uf in hen laban to meo Uisneno amonit!” Nalali te in natoti to meo mese nak, “Kesel of anfe sa' neu atoni le nabe'i namate atoni Filistin nane ma le naneku han si'ut ma akan na'ko Israel?”

²⁷Oke te to naton neune sa' le kesel anba'an nalali.

²⁸Nai Eliab Nai Daud tataf anaet in amnen Nai Daud namolok nok ale to meo anbi nane. In nato'an Nai Daud ma nak, “Nansa' ho aum anbi i? Hom lelu sekau hen panat ho bibi kase sin anbi mnela hufui? Au uhin, ho mo'eom on abe'it; ho aum anbi i hem kiso makenat ma manuat ka?”

²⁹Nai Daud natae nak, “Au usanab sa' ka? Au alah utoti!”

³⁰Oke te in anao ma natoti lasi nane neu ale to meo bian; ma in napeni han taes papmese amsa.

³¹Mes atoni bian le sin amnen Nai Daud in molok nane sin natiaba neu Nai Saul, es nane te no'en Nai Daud he nao natae Nai Saul.

³²Nai Daud nak neu Nai Saul nak, “Usi, ka nabe'i fa hit tamtausan atoni Filistin nane! Ho ate kau au lomi he laban in.”

³³“Kaisa,” Nai Saul natae onane, “Ho hem laban in onme? Ho fe munif ko, mes in antam nain makenat na'ko fe in munif.”

³⁴Mes Nai Daud nak, “Usi, ho ate kau es utuku au ama in bibi kase sin. Leka asu fui ai asu le'u nem ma nasik bibi kase,

³⁵mu'it abulalut nane ho ate au li'u ma tepo, oke te bibi kase nane ho ate au ufetin ani. Ma leka asu fui ai asu le'u anlaban ho ate kau, onane te ho ate au na' in to'an ai in neon, oke ate au tepo talantia anmate.

³⁶Ho ate kau au umate ulali he asu fui ai he asu le'u, ma atoni Filistin mesokan nane amsa of onle mu'it-mu'it nane, natuin in na'akan ma nasi'ut to meo na'ko Uisneno amonit.

³⁷UISNENO nafetin nalali ho ate kau na'ko asu fui ma asu le'u, In amsa of nafetin ho ate kau na'ko atoni Filistin nane.” Oke te Nai Saul nak neune nak, “Leko, so nati' UISNENO anbab ko.”

³⁸Nai Saul anfe neu Nai Daud in bale pake makenat, esle' sobalu besi mese ma Nai Daud anpake nani. Oke te Nai Saul antao sobe niti molo neu Nai Daud in anakan.

³⁹Ma amsoput Nai Daud anfutun Nai Saul in suni neu in sobalu besi nane oke te in hen oinson, mes kan oinson fa leko, natuin Nai Daud kan pake nit fa bale makenat. “Ho ate kau ka nao fa leko nok ale bale pake i,” in nak neu Nai Saul. “Ho ate kau au ka pake it fa onle i.” Oke te ale bale pake makenat nane in nauf nani sin ok-oke.

⁴⁰Nalali te in naiti in tias atuku mu'it, ma in anbeti nan fatu bubu sim na'ko noe, oke te natam sin neu in alu' nanan. Ma nok a'finu anbi in niman, Nai Daud in anao ma naeku nok Nai Goliat.

⁴¹Ma ka lo fa namuni na'ko nane te Nai Goliat anfonat nem, anhaumak Nai Daud ma neki bena aninit nane nahunun bi in matan.

⁴²Mes leka in nit Nai Daud ma nail nan in, Nai Goliat anmani ma nakle'at natuin Nai Daud fe munif ma mas leko kun.

⁴³Nai Goliat nak neu Nai Daud nak, “Ho meki tias nane neu he sa' ka? Ai ho mak au asu kau ka?” Oke te Nai Goliat ansukat Nai Daud neki ale in uisneno teta sin.

⁴⁴Anesi anteni te in anlake Nai Daud nak, “Neu nai, amnao mat aum meu kau nai! of au fe ho aom neu ale kolo ma neu ale mu'it he nati' sin neku nani.”

⁴⁵Mes Nai Daud natae nak, “Ho aum ma amlaban kau meki suni, auni ma suak, mes au aum ma laban ko eki UISNENO Akuasat Afin-finit In kanan, Uisneno to meo Israel le ho mukle'at sin le nane.

⁴⁶Neno i amsa UISNENO of nana'at ko neu kau; au of is ma be'u ko ma of au ote ufek ho nakam. Ho aom ma ale ho to meo sin aoken of au fe ani sin neu ale kolo ma ale mu'it he nati' sin neku nani. Ma pah pinan ok-oke of nahin nak hai to Israel hai mu'i Uisneno le hai miluli ma mibes,

⁴⁷ma ale atoni le anbi i of sin nit nak UISNENO In nafetin In to ka neki fa suni ma auni. In es natetab makenat i ma In of nana'at ki neu hai nimam.”

⁴⁸Nai Goliat anao mat anhaumak Nai Daud, oke te nok manoe le'uf Nai Daud in naen mat neu atoni Filistin neu hen laban Nai Goliat.

⁴⁹Nai Daud natam in niman neu in alu' nanan ma in naiti fatu mese na'kone ma antao neu in a'finu ma anfinu Nai Goliat. Fatu nane antom natet Nai Goliat ilan monen, talantia in anakan anpe', ma in anbel in human antom neu nain.

⁵⁰Ma Nai Daud in naen labah neu Nai Goliat, oke te anhake anhaumak in; Nai Daud naiti Nai Goliat suni ma anfaki na'ko tapan, oke te an ote nafek atoni Filistin nane in anakan. Onle nane Nai Daud in nis ma anbe'u ma namate Nai Goliat, alaha neki a'finu ma fatu! Leka atoni Filistin sin nit nak sin meo pa'e anmate, oke te sin naen kun.

⁵¹

⁵²Atoni Israel ma Yehuda sin antek a'baf ma anli'u atoni Filistin antia Gat ma antia eno naek Ekron. Atoni Filistin le napap sin anhoe anbi lanan anao neu Saaraim nane.

⁵³Nalali te Israel anfani nem na'ko anli'u atoni Filistin, oke te sin nasik atoni Filistin sin um-ume nesan.

⁵⁴Ma Nai Daud naiti Nai Goliat anakan, ma in neki neu Yerusalem, mes bale makenat Nai Goliat nabela sin anbi in um-ume.

⁵⁵Leka Nai Saul in nit Nai Daud anao ma anlaban Nai Goliat in natoti Nai Abner in meo naek nane nak, “Abner, sekau anmone es li'ana nane?” Nai Abner natae nak, “Ho ate kau ka uhin fa, Usi.”

⁵⁶Oke te Nai Saul nakua a'an nak, “Amnao nai ma mutoti lasi nane nai.”

⁵⁷Es nane te leka fe Nai Daud anfani nem neu um-ume le fe in namate nalali Nai Goliat Nai Abner ansenu in ma neki in anao neu Nai Saul. Nai Daud fe anfiti Nai Goliat anakan.

⁵⁸Oke te Nai Saul natoti neune nak, “Hoi li'anmunif! Sekau in anmone es ko ka?” Nai Daud natae nak, “Ho ate kau, Nai Isai anmone atoni na'ko Betlehem.”