Read Uab Meto 1 SAMUEL 18 Bible Online

1 SAMUEL 18 - Uab Meto bible

1 SAMUEL 18

¹Leka Nai Saul ma Nai Daud sin namolok nalali, oke te Nai Saul naiti Nai Daud anfani in ameput ma na'ko nano nane Nai Saul ka nafetin fa Nai Daud hen fani neu in amaf ume. Nai Yonathan Nai Saul anmone anen sin molok nane. In nekan ansiumak neu Nai Daud, in anek nio Nai Daud on anek in aon.

³Es nane te Nai Yonathan ansup nak in anmoe soba alekot nok Nai Daud talantia nabal-bal.

⁴Nai Yonathan nauf in sobalu bet kone ma anfe neu Nai Daud, onane amsa in bale manuat ma suni, in aklaot ma in pasu futu atnanaf.

⁵Ale mepu le Nai Saul anfe neu Nai Daud in nanoba nani nok alekot. Es nane te Nai Saul in ate sin ok-oke sin anlomi Nai Daud. Es nane te Nai Saul naiti in anfani nakaf neu in to meo sin. Ma ale Nai Saul in to meo ma in ate sin ok-oke anlomi in.

⁶Leka Nai Daud anfani nem na'ko mabe'ut namate Nai Goliat atoni Filistin nane, ale to meo mabeti sin anao maakatuin antam eu kot nanan, ma ale bife sin anpoi na'ko alekot anbi Israel ma sin ansenu Kesel Nai Saul. Sin ansi neki sit amlilat, ma nabso' neki a'ket ma bano ma biola.

⁷Bife sin nabso' ma anbone ma sin ansi nak, “Nai Saul namate musu nifun-nifun mes Nai Daud namate hotun-hotun.”

⁸Leka Nai Saul amnen onane, Nai Saul in nato' anae le'uf. Natuin in natenab nak, “Neu Nai Daud sin nak in namate nalali hotun-hotun, mes neu Nai Saul alaha nifun-nifun. Ma of namuni te of sin naiti in anfani kesel!”

⁹Na'ko neno nane in nekan namen neu Nai Daud.

¹⁰Noka fa onane Nai Saul anbi in ume nanan fe in ana' in auni ma nok askeken sman amle'ut na'ko Uisneno antam neu Nai Saul, talantia in anfoe on atoni amaunut. Tabu nane Nai Daud fe in na'bae biola onle neno am neno.

¹¹“Au nuan auni i neu Nai Daud talantia ankaheti Nai Daud neu aklipit!” Nai Saul natenab onan, oke te in nuan auni nane hae nua neu Nai Daud, mes Nai Daud an aion kun.

¹²Nai Saul nahin nak UISNENO naneo ma nahafo Nai Daud mes UISNENO nasaitan in. Es nane te Nai Saul namtausan Nai Daud.

¹³Es nane te Nai Saul natnanib Nai Daud na'ko sonaf, ma naiti in anfani nakaf neu to meo nifun mese. Ma nok nane te Nai Daud in ana' in to meo anbi ale makenat.

¹⁴In nis ma anbe'u anbi ale mepu le in nanaoba, natuin UISNENO anbab in.

¹⁵Leka Nai Saul in nit nak Nai Daud in nis ma anbe'u piut, onane te Nai Saul namtausan in piut.

¹⁶Mes to Israel ma Yehuda sin ok-oke anek nis Nai Daud natuin in anakaf mese le in taos in mo'et alekot anae le'uf kun.

¹⁷Nai Saul natenab he nati' atoni Filistin mese namate Nai Daud anbi makenat in nanan he kais in es neknon namate Nai Daud. Es nane te anbi neno mese Nai Saul nak neu Nai Daud nak, “Au anfetnai anaet bi Merab, of au fe neu ko anfani ho fenai, so al ho mutonom anbi ho be'im ho matanim anbi UISNENO In makenat.”

¹⁸Mes Nai Daud natae nak, “Sekau es ho ate kau le i ma maota sa' ho ate au Ama in nonot anbi Israel, talantia ho ate kau he fani Usi ho moen fe'u ka?”

¹⁹Mes leka tabu antia hen fe bi Merab neu Nai Daud hen fani in fenai, mes anfetnai nane anfe nani neu Nai Adriel atoni na'ko Mehola anfani in fenai.

²⁰Mes bi Mikhal Nai Saul anfetnai bian nane antao in nekan neu Nai Daud. Leka Nai Saul in anen lasi nane te, in anlomi amsa.

²¹Nai Saul natenab nak, “Leko au fe bi Mikhal neu Nai Daud, he nati' anfani kle'ot mese neune ma atoni Filistin nabe'i namate in.” Es nane te Nai Saul nak neu Nai Daud anbi hae nua nak, “Neno i nabe'i hom fani au moen fe'u.”

²²Oke te Nai Saul anlelu in ameput sin he nati' natonan Nai Daud nok hanaf a'seseo, nak on i, “Usif in anek ko ma onane te in ameput sin amsa anek ko; es nane te tabu i tabu alekot neu ko he nati' ho maiti in anfetnai hen fani ho fenai.”

²³Mes leka sin natiaba lasi nane neu Nai Daud, in natae sin nak, “Hi mak lasi makaf-kafa ka neu het fani Usif in moen fe'u? Au atoni amamu'it kau ma ka maota kau fa!”

²⁴Ale ameput sin natiaba Nai Daud in han taes nane neu Nai Saul,

²⁵oke te Nai Saul anlelu sin he natiaba neu Nai Daud, nak on i, “Le Usif anlomi hen fani pua mnasi manu mnasi al atoni Filistin sin beti fukan atoni natun mese, on seunbanit neu Usif in musu sin.” (Lasi i le Nai Saul natenab neu he namate Nai Daud nao nok atoni Filistin.)

²⁶Leka Nai Saul in ameput sin natiaba lasi nane neu Nai Daud, oke te Nai Daud ansimo Kesel Nai Saul in a'an nane. Es nane te, leka tabu le natetab fe ka namsopu fa, in anfen ma anao nok in to meo sin neu atoni Filistin sin pah. In namate atoni Filistin natun mese, oke te Nai Daud in neki sin mau fukan nane, ma nana'at nani neu Nai Saul kan labu' fa mese amsa. Oke te Nai Saul in anfe in anfeto bi Mikhal neu Nai Daud hen fani in fenai.

²⁸Oke te Nai Saul in nahin nak UISNENO naneo ma nahafo Nai Daud ma onane amsa bi Mikhal Nai Saul anfeto nak namnau Nai Daud.

²⁹Onane te Nai Saul namtau nasek-sek'on neu Nai Daud ma in namusu nok Nai Daud anbi in monin ok-oke.

³⁰Ma leka to meo Filistin sin nem hen maken nok sin Nai Daud in nis ma anbe'u Filistin sin anesi na'ko Nai Saul in to meo nakaf bian sin. Onane te Nai Daud in kanan sin antola piut.