Read Uab Meto 1 SAMUEL 19 Bible Online

1 SAMUEL 19 - Uab Meto bible

1 SAMUEL 19

¹Nai Saul nak neu in anmone Nai Yonathan ma ale in ameput sin nak in he namate Nai Daud. Mes Nai Yonathan in anek nis kun Nai Daud,

²es nane te in nak neu Nai Daud nak, “Au Ama nami he namate ko; es nane te nati' hom pantom! Noka fa nati' ho mutolo' anbi bale tolo' mese, ma ho mumaika anbi nane.

³Au of anao eu mnela nok au Ama ma amhake amhaumak bale le ho mutolo' anbine nane. Oke te au of umolok nok au Ama neu au Ama in tenab neu ko, ma lasi sa' le hai mimolok nane of au uton ani neu ko.”

⁴Oke te Nai Yonathan in naton ale lasi alekot antom Nai Daud neu Nai Saul nak, “Ama, kais Ama ho mule'un ho ate Nai Daud. Natuin in kan moe fa sanat sa'-sa' neu ko Ama; so mak in in anmoe lasi alekot anae le'uf neu ko Ama.

⁵In antao nalali in monin ok-oke leka in namate Nai Goliat, ma UISNENO anfe nalali lasi mnisat anaek neu Israel anao nok Nai Daud. Ama ho es meki nom mit kum lasi nane. Mes, nansa' muni i Ama ho he mule'un atoni le ka nasanab fa ma ho he mumate Nai Daud ka nok fa lasi sanat sa' es amsa?”

⁶Ma Nai Saul in nekan anfani nate'un natuin Nai Yonathan in uab, ma in ansup neki UISNENO In kanan nak in of ka namate fa Nai Daud.

⁷Ma oke onane te Nai Yonathan no'en Nai Daud, ma natonan Nai Daud ale molok lelon nane. Nalali te in neki Nai Daud neu Nai Saul, ma Nai Daud antuthae Nai Saul on afi neno ahunut.

⁸Namuni te makenat anbol anteni nok atoni Filistin. Nai Daud anfen ma anao ma anken atoni Filistin talantia in nis ma anbe'u sin ok-oke, ma sin naen ok-oke.

⁹Anbi neno mese Nai Saul fe antoko anbi in ume nok auni anbi in niman ma nok askeken sman le'uf le UISNENO ansonu nane antam neu Nai Saul. Anbi tabu nane Nai Daud fe anheo in biola.

¹⁰Oke te Nai Saul nami lanan he nua ankaheti Nai Daud nok aklipit. Mes Nai Daud in aion kun, talantia in auni nane napau neu klipit. Ma Nai Daud in naen nafetin kun in aon.

¹¹Anbi fai nane amsa Nai Saul ansonu haef neu Nai Daud in ume he natnu' Nai Daud he namate nani anbi nok-noka fa. Mes bi Mikhal in fenai natonan Nai Daud nak, “Leka ho ka maen fa anbi fai i, of nok-noka fa namate to teb-teb.”

¹²Oke te bi Mikhal nasanut Nai Daud na'ko eno kiso, ma Nai Daud in naen nafetnon kun.

¹³Oke te bi Mikhal naiti nan le'u mahuma anbi sin ume toko ma antao anbi Nai Daud in bale tupa. Nalali te anbi le'u mahuma nane in anakan in antao akanunu na'ko bibi nafu, ma an'amu nani le'u mahuma nane neki beti.

¹⁴Leka ale haef na'ko Nai Saul sin nem hen heke Nai Daud, bi Mikhal nak, “Nai Daud namen.”

¹⁵Mes Nai Saul anlelu sin anao anteni eu bale nane hen kiso Nai Daud neki sin matken. Ma Nai Saul anfe plenat nak, “Meki in nem neu i, nok in bale tupa, he nati' au umate in.”

¹⁶Oke te haefen nane sin antam neu Nai Daud bale tupa ma sin napeni le'u mahuma es nabelkon anbi Nai Daud in bale tupa nok akanunu bibi nafu anbi in hala tupa anakan.

¹⁷Oke te Nai Saul nak neu bi Mikhal nak, “Nansa' ho mumoe kau on i! Hom bab au musu talantia in naen nafetin kun in aon!” Mes bi Mikhal natae nak, “In ansali he namate kau leka au ka bab fa in he naen nafetin in aon.”

¹⁸Leka Nai Daud nafetnon nalali, in anao neu Nai Samuel anbi Rama, oke te in natonan Nai Samuel ale sa' le Nai Saul anmoe nane. Nalali te Nai Daud ma Nai Samuel sin nua sin anao eu Nayot ma sin natua anbi nane.

¹⁹Mes sin natonan Nai Saul nak Nai Daud in natua es Nayot anhaumak Rama.

²⁰Es nane te Nai Saul ansonu hanaf hen heke Nai Daud. Mes sin napeni Mafefa knino pukan mese le sin nabso' ma sin nabeno bua'-bua', Nai Samuel es antopu sin. Ma Smanaf Uisneno anbol anbi haefen nane talantia sin amsa nabso' ma nabeno nok amsa.

²¹Leka lasi nane sin naton neu Nai Saul, oke te in ansonu haef bian anteni ma sin amsa nabso' ma nabeno nok. Onane te Nai Saul ansonu anteni haef anbi hae tenu ma onane amsa lasi nane anbol anbi sin.

²²Es nane te Nai Saul in neki non kun anao eu Rama. Leka in nem antia oe mata naek anbi Sekhu, in natoti neu Nai Samuel ma Nai Daud sin esken me, ma abiten nane naton nak sin esken Nayot.

²³Es nane te sin anao neu Nayot, mes Smanaf Uisneno anbol nem eu sin amsa, talantia in amsa nabso' ma nabeno natuin lanan anao neu Nayot.

²⁴Leka Nai Saul nem antia Nayot, in nauf nani in bale pake sin ma nabso' ma nabeno anbi Nai Samuel matan, oke te in anbel neu afu nok monas nan fai mese ma neno mese in a'lon. (I lasi na'ubon uab mapolin nak, “Ai Nai Saul amsa anfani kun Mafefa knino?”)