Read Uab Meto 1 SAMUEL 2 Bible Online

1 SAMUEL 2 - Uab Meto bible

1 SAMUEL 2

¹Oke te bi Hana in an onen toti nak, “UISNENO anmoe au nekak namlil ma naba'; In taos In mo'et anmoe au nekak namlil ma namoke. Nok amlilat ma amoket au usi'u au musu, natuin namneo-namneo UISNENO anbab nalali kau.

²Katit fa es he knino ma knao on UISNENO! Al In kun es nabe'i naneo ma nahafo kau.

³Misnasab nai hi nek anaeb le luman ma son-sona! Misopu hi uab ma hi molok nai le nahenu nok be'o ma moko! Natuin UISNENO nane Uisneno ahinet Anesit Afinit; le nafek ale atoni sin taos ma sin mo'et.

⁴Atoni meo pa'e sin aklaot nat'ipu nalali, mes atoni a'olet alimaet anmatani piut.

⁵Atoni le afi ahunut anpet ma namsen natuin mnahat ma mninut nathoe, muni i anfani ameput le maseba al he neu napeni mnahat ma mninut. Ma atoni le afi ahunut anmeo ma namnah, muni i namlil ma namoke, natuin mnahat ma mninut nathoe. Fenai akiut, muni i namlil ma namoke, natuin in nahoni nalali li'ana hitu! Mes ainaf le anmu'i anah namfau, in anhenu nasaitan in, nafetin in talantia in amonin anmasil ma anmaknene.

⁶UISNENO es namate, mes In es namonib. In es nasanut amates neu nopu amates. Ma In amsa es anfiti nasaeb na'ko nane.

⁷UISNENO es nanukab, ma In amsa es namu'ib. Anmu'i atoni le In nabaun, ma In amsa es nasaeb atoni.

⁸Atoni anukat In naiti anfani amu'it, In nafetin atoni asusal ma amamu'it. In anmoe sin anfani biaf benuf atoni makana, ma anfe neu sin a'toko plenat apinat. Pah pinan nane in sukin nane UISNENO ini kun, ma In nahakeb pah pinan anbi In fafon.

⁹Atoni aki'at in antainie piut anbi UISNENO In neon In mafon. Mes atoni amle'ut in namle'u ma noe nain anbi mesokan amaten. Kais tapane ma tafnek neu hit be'ik hit matanik, be'it ma matani atoni pah pinan ka neki fa lasi mnisat.

¹⁰UISNENO In musu-musu sin naskuku ma noe nain, natuin sin namtau; In anfe a'lotos neno tunan nem neu sin. UISNENO of nafek lasi neu pah pinan ok-oke, ma anfe kuasat apinat neu kesel le In anbeti nani.”

¹¹Oke te Nai Elkana nok in ume nanan sin anfani neu Rama, mes Nai Samuel, in anmone nane, nabalah anbi Silo ma antuthae UISNENO anbi panat ma paot Ana' Fuat Knino Nai Eli.

¹²Nai Eli in anmone sin antao ma anmoe lasi amle'ut anae le'uf. Sin nua sin kan sian fa UISNENO,

¹³ma on Ana' fuat knino sin anmoe natuin sin lomin kun neu to Israel. Leka onle atoni mese natulu fua tulu, onane te atuntakus ana' fuat in nem neki a'kato' le anmu'i nisif tenu. Leka fe nahan sisi nane,

¹⁴in anposun a'kato nane neu tasu bale nahan sisi nane, oke te sa' le napoitan neki a'kato' nane anfani Ana' fuat knino ini. Ale atoni Israel le sin nem neu Silo he natulu fua tulu anmoe sin onane.

¹⁵Ma anfoe nan te atuntakus nane in nem leka fe ka napoitan fa sisi balun neu he notu, oke te in nak neu atoni le he natulu fua tulu nane nak, “Amfe sisi mate nane neu Ana' fuat knino he nati' anse'i nani neune; in kan lomi fa hen simo sisi hana.”

¹⁶Ma leka atoni nane natae nak, “Leko nesi hit tanokab fe lekat lulut, ma hit totu baluf nane nahun fe; nalali te nabe'i ho maiti natuin ho lomim kun,” mes atuntakus nane nak, “Kahaf, hom fe nai esle' i, kalu kahaf, of au aiti nok aseke.”

¹⁷Onle nane Nai Eli in anmone nua sin nasanab anae le'uf anbi UISNENO In human In matan. Natuin sin ka na otabfa fua tulu neu UISNENO.

¹⁸Anbi tabu nane, Nai Samuel le in fe li'ana kun in antuthae UISNENO piut. In anpake sobalu le anbeti nateta nani na'ko pilu muti, on sobalu luli besa Ana' fuat knino.

¹⁹Fun ton-ton in ainaf anmoe sobalu bet-kone ana' ma anfe neu Nai Samuel leka bife nane in nok in mone sin anao neu Silo he natulu fua tulu ton.

²⁰Onane te Nai Eli anfe tetus neu Nai Elkana ma in fenai, ma in nak neu Nai Elkana nak, “So nati' UISNENO anfe anteni anah-anah neu ko na'ko ho fenai le i, hen seka li'ana le hi mitnat milali neu UISNENO.” Oke te sin anfani neu Rama.

²¹Uisneno anfe tetus neu bi Hana, talantia in nahoni anteni anmone tenu ma anfeto nua. Nai Samuel amsa in anfonat ma nanae fun in antuthae Uisneno piut.

²²Nai Eli in namnasi anae le'uf. In nen lasi le natlak neune piut-piut antom in anhenu, sin taos sin mo'et le sin anmoe neu to Israel. In nahin amsa nak in anhenu antup nok ale bife le antuthae anbi Ume Buat UISNENO enon.

²³Es nane te in nak neu in anhenu nak, “Au simo ulali uab molok na'ko to ok-oke neu hi taos hi mo'et amle'ut. Nansa' him tao ma moe lasi nane?

²⁴Kais hi moe amteni onane, au anah ki. Sa' le UISNENO In to namolok antom hi monim namneo-namneo nane lasi amle'ut kun!

²⁵Leka es nasanab neu es, Uisneno nabe'i anpesi in; mes leka es nasanab neu UISNENO, sekau nabe'i anbab in ka?” Mes sin ka natuin fa sin amaf Nai Eli in fainekat, natuin UISNENO In nafek nalali neu he namate sin.

²⁶Mes Nai Samuel, li'ana nane, in anfonat ma nanae ma UISNENO anlomi in ma ale to amfaun amsa anlomi in kun.

²⁷Anbi neno mese Mafefa knino mese nem neu Nai Eli ma natiaba a'an knino na'ko UISNENO neune nak, “Leko ho amaf Nai Harun ma in ume nanan sin anfani ate neu Kesel Mesir, Au ulile ma uton ulali Au aok neu Nai Harun.

²⁸Na'ko ale uf Israel ok-oke Au beti ulali in ume nanan hen fani Au Ana' fuat knino, he nati' antuthae anbi baki tulu, notu atu fomeni, ma anpake sobalu Efod leka namolok nok Kau. Ma neu sin ma sin sufan sin Au fe ulali kuasat neu sin he nati' sin naiti pa' mese na'ko fua tulu le notu anbi baki tulu.

²⁹Es nane te, nansa' ho fe amkom ma ampalu leka ho mit ale fua tulu le anmatom nok Au plenat, le Au to natulu neu Kau? Nansa' Eli, ho munaeb munesin ho anah-anah sin nesi na'ko ho munaeb Kau, ma ho mufetin sin he napokab sin aoken neki pa' le leok le'uf na'ko ale fua tulu na'ko Au to neu Kau?

³⁰Au, UISNENO Israel sin Uisneno, na'ko afi ahunut Au ubela ulali Au fef bela nak ho ume nanan ma ho ama uma nanan sin of antuthae Kau on Ana' fuat knino neu Kau piut. Mes Au ka lomi teni fa lasi nane anbi tabu le i! Natuin le nanaeb Kau, of Au unaeb in mes le nasi'u Kau, of Au usi'u in.

³¹Amnen nai, of in neno nem anbol Au of umate ale munif anbi ho ume nanan ma ho ama ume nanan, sin talantia katit fa atoni mese amsa anbi ho ume nanan of he napeni ua mnanu.

³²Of ho nekam antu' ma hom naben nek menas leka ho mit tetus le of Au fe ani neu atoni-atoni bian anbi Israel, mes anbi ho ume nanan of namfau le anmate munif.

³³Mes, es na'ko ho ume nanan of Au ufetin in hen moni ma antuthae Kau on Ana' fuat knino. Mes in matan of anfolo ma in anmoni nok nek ole. Ale ho ume nanan bian of anmate ok-oke.

³⁴Ma nane anfani on ataka nak ale lasi le Au uton ulali nane of anbol, ma ho anah nua sin nane, Nai Hofni ma Nai Pinehas of sin anmate anbi neno mese.

³⁵Nalali te of Au beti Ana' fuat knino aki'at mese neu Kau ma anmoe ale sa' le Au uplenat ani neune. Ma neu in of Au fe neune sufa ma ka'uf le of anmepu piut on Ana' fuat knino anbi kesel sin human sin matan le Au beti ani sin.

³⁶Ale ho sufam le fe anmoni, of anao neu Ana' fuat knino nane ma antoti noni ma mnahat. In of antoti nak: Mufetin kau fa he au tuntaku ale Ana' fuat knino sin, he nati' au upeni he uah maski utunu' pisa mese amsa ka sa' fa.”