Read Uab Meto 1 SAMUEL 20 Bible Online

1 SAMUEL 20 - Uab Meto bible

1 SAMUEL 20

¹Oke te Nai Daud naen na'ko Nayot anhaumak Rama ma in anao neu Nai Yonathan, oke te natoti Nai Yonathan nak, “Au usanab sa' ka? Lasi amle'ut sa' ka esle' au moe ulali ma au sanat sa' ka neu ho Ama talantia in he namate kau?”

²Nai Yonathan natae nak, “Kais ho mumolok onane! Nok UISNENO In kanan, of ka namate ko fa. Au Ama in naton neu kau piut ale in lasi tenab nane, he lasi naek ka, ai he lasi ana. Es nane te in ka naninib fa in tenab nane neu kau. Es nane te sa' le ho mumolok nane ka namneo fa!”

³Mes Nai Daud natae nak, “Ho Ama nahin lek-leko neu hom nek kau. Es nane te in ka nabe'i fa he naton lasi nane neu ko he nati' kais ho nekam antu'. Maski onane amsa, anbi UISNENO amonit In kanan, namneo-namneo au monik onle teko anbi bijae sunan tunan!”

⁴Oke te Nai Yonathan nak, “Sa' am sa' le hom toti of au moe ani neu ko.”

⁵Nai Daud natae nak, “On i, noka fa nane Fesat Funan Fe'u. ma mes au he bukae utnoe ok kesel. Ma leka hom lomi au of anao ma utolo' anbi mnela antia neno tenu maben.

⁶Leka ho Ama natoti nansa' au ka ok fa anbi fesat nane, ho mutonan kesel, mak au toti ulali ko he au nao labah eu Betlehem, natuin anbi nane anmu'i luli besa fua tulu ton neu au ume nanan ok-oke.

⁷Ma leka kesel nakua a'an nak, ‘Leko,’ nane nak au of upeni aomina, mes leka in nato', ho muhin nane nak in nafek nalali he nale'un kau.

⁸Au toti hom bab kau natuin hit mafutu talali lasi manba'an anbi UISNENO In human In matan. Mes leka au usanab, ho mumate kau, mes kais ho muna'at kau neu ho Ama.”

⁹Nai Yonathan natae nak, “Kais ho mumtau! Leka au uhin namneo neu au Ama natetab nalali he nale'un ko, namneo au of uton ani lasi nane neu ko.”

¹⁰Oke te Nai Daud natoti nak, “Sekau of es he naton neu kau leka onle ho Ama natae ko nok han to'as?

¹¹Nai Yonathan natae nak, “Aum nai he hit atnao teu mnela.” Oke te sin nua sin anao neu mnela.

¹²Oke te Nai Yonathan nak neu Nai Daud nak, “So nati' UISNENO, atoni Israel sin Uisneno anfani asaksit neu kit! Noka ai ansine oni tabu onle i, au of ami he uhin au Ama in nekan. Leka in nek leko neu ko, au of a'sonu hanaf neu ko.

¹³Mes leka in ansali he nale'un ko, au of uton neu ko amsa he nati', ho mufetin ho aom. So nati' UISNENO namate kau leka au ka moe fa lasi nane neu ko. Ma so nati' UISNENO anbab ko on afi In anbab ho Ama amsa!

¹⁴Ma leka au fe a'moni, nati' ho mumnau hit lasi manba'an anbi UISNENO In human In matan ma mu'ki nai meu kau; mes leka au ka ok ko fa anteni,

¹⁵mulile ho manekam neu au ume nanan sin talantia nabal-bal. Ma leka UISNENO nale'un ale ho musu oke,

¹⁶kais hit nua kit hit lasi manba'an nane natfek. Mes leka hit lasi manba'an nane natfek, UISNENO In es of ankas ko.”

¹⁷I lasi hae nua le Nai Yonathan anlelu Nai Daud anmanba'an neu he nati' anek in, natuin in nek Nai Daud on in nek in aon kun.

¹⁸Nalali te Nai Yonathan nak neu Nai Daud nak, “Noka fa Fesat Funan Fe'u. Namneo sin of nahin neu ho ka mok fa, natuin ho kam toko fa anbi ho bale mei bukae;

¹⁹sa' anteni ansine! Es nane te, amnao nai meu bale le afi ho mutolo' anbine, ma hom pao nai anbi fatu atupu koitken aon bian nane.

²⁰Of anmeu te au uklaon as'anef nono tenu an'ali fatu nane, onle u'ke bale salit.

²¹Oke te of au lelu au ate he naiti ale as'anef nane, ma leka au ak neune ak, ‘Hoi as'anef nane anhaumak nis anteni anbi i; naiti nai,’ nane in otan nak aomina neu ko ma nabe'i ho ampoi. Au sup natuin UISNENO amonit nak ho of kam bi fa amle'ut sa' es amsa.

²²Mes leka au ak neu au ate nane ak, ‘Hoi, as'anef nane na'lo nesi anteni anbi nane,’ nane in otan nak UISNENO anlelu ko hem nao; es nane te hom nao nai.

²³So nati' UISNENO anpanat ma anpao kit atna' tamepan hit nua kit hit lasi manba'an.”

²⁴Oke te Nai Daud natolo' anbi mnela. Anbi Fesat Funan Fe'u, Kesel Nai Saul in nem neu tolas.

²⁵Onle antak nani Kesel Nai Saul antunon anhaumak aklipit; ma Nai Yonathan antoko anmabaina nok in Amaf uisksesel Nai Saul, Nai Abner anbi Kesel Nai Saul aon bian, mes bale toko Nai Daud in luman kun.

²⁶Mes Nai Saul in ka namolok fa lasi nane anbi neno nane, natuin in natenab nak, “Oni in natef nok lasi sa'-sa' es, talantia in ka naknino fa natuin lasi knino.”

²⁷Mes anbi neno noka fa, neno nua anbi Funan Fe'u nane, bale toko Nai Daud fe luman amsa, oke te Nai Saul natoti Nai Yonathan nak, “Nansa' na'ko afi neno ma neno i amsa Nai Daud in ka nok fa anbi tolas i?”

²⁸Oke te Nai Yonathan natae nak, “In naton nalali neu kau nak in he nao neu Betlehem.

²⁹In nak, ‘Mufetin kau fa he au nao, natuin au ume nanan sin anmoe tolas fua tulu anbi Betlehem, ma au tataf es antoti kau he nati' au anao. Es nane te, leka ho mufetin kau, mautu he au anao he au utef ok au tataf sin.’ Es nane te in ka nok fa anbi tolas i, Ama.”

³⁰Leka Nai Saul in nen lasi nane te in nato'an Nai Yonathan anae le'uf ma nak neune nak, “Li'ana amle'ut! Au fe uhin neu hom pesi Nai Daud ma moe lasi mae neu ho aom ma neu ho aina!

³¹Ai ho ka muhin fa ka nak leka Nai Daud fe anmoni ho of kam sae fa kesel anbi pah le i? Amlelu atoni he nao nai esle' le i he nami in ma neki in nem neu i, natuin in mes hen mate!”

³²Onane te Nai Yonathan natae nak, “Nansa' talantia in mes hen mate? In anmoe sanat sa' ka?”

³³Leka Nai Saul in nen onane te in nuan in auni neu Nai Yonathan he namate in. Onane te Nai Yonathan in nahin nak in Amaf namneo-namneo ansali he namate Nai Daud.

³⁴Es nane te Nai Yonathan anfen nok to'as maputu anae le'uf in nasaitan mei tolas ma in kan bukae fa sa'-sa' anbi neno hae nua Fesat Funan Fe'u nane. In nekan nanu'on natenab Nai Daud natuin in Amaf Nai Saul nasi'u ma nakle'at in.

³⁵Noka fa onane te Nai Yonathan in anao neu mnela he natef nok Nai Daud onle sin nua sin namolok nalali. In nok in ate anmone mese,

³⁶oke te in nak neune nak, “Neu, hom nao nai ma maini au as'anef sin le of au uklaon sin.” Leka ate nane in fe naen, Nai Yonathan in naklaon as'anef mese anfinin li'ana nane.

³⁷Ma leka li'ana nane in nem antia bale as'anef nane anmofu, Nai Yonathan ankoa nak, “Hoi, as'anef nane na'lo nesin teni na'ko nane!

³⁸Labah akle'o, kais mumkak!” Li'ana nane in naini as'anef nane ma anfani nem neu in usif.

³⁹In ka nahin fa namneo-namneo a'at na'ko Nai Yonathan nane, al Nai Yonathan nok Nai Daud sin nua sin es nahin lasi nane.

⁴⁰Oke te Nai Yonathan anfe in bale klaoten nane neu li'ana nane ma anlelu in anfani neu kot.

⁴¹Leka li'ana nane in anao kun, Nai Daud anpoi na'ko fatu tupu' kotin, oke te in nabes hae tenu neu Nai Yonathan. Leko he Nai Daud ma Nai Yonathan, sin nua sin ankae leka sin nua sin anmahon ma anmanekan. Nai Daud in nanu'on anae le'uf anesi na'ko Nai Yonathan.

⁴²Nalali te Nai Yonathan nak neu Nai Daud nak, “Amnao nai nok aomina. So nati' Uisneno anbab ma antuntaku ko. UISNENO of anpanat hit lasi manba'an talantia hit ma hit ume nanan sin of sin ana' nahelan hit nua kit hit lasi manba'an anbi Uisneno In human In matan.” Oke onane te Nai Daud in anao kun ma Nai Yonathan amsa anfani kun neu kot.