Read Uab Meto 1 SAMUEL 21 Bible Online

1 SAMUEL 21 - Uab Meto bible

1 SAMUEL 21

¹Ma Nai Daud in anao neu Ana' Fuat Knino Nai Ahimelekh anbi Nob. Nai Ahimelekh in anpoi ma ansenu Nai Daud nok lilitais ma natoti neune nak, “Nansa' ho mesnom-mesnom ho aum meu i?”

²Nai Daud natae nak, “Kesel anfe nalali kau plenat mese ma nakain kau he kais uton lasi nane neu sekau am sekau amsa. Es nane te au to meo sin au lelu sin anpao anbi bale teta mese.

³Kais muto'an kau, au he toti, Ama ho mu'i bukae sa' ka? Amfe kau fa utunu' pisa nim ai bukae sa' le anbi i.”

⁴Oke te Ana' fuat knino nane nak, “Au ka mu'i utunu' am utunu', al utunu' fua tulu esan; nabe'i hi maiti, al ho to meo sin kan tup nok fa bifel anbi fe'-fe' le i.”

⁵Nai Daud natae nak, “Namneo sin kan tao ma anmoe fa. Natuin leka hai minaoba plenat, au to meo sin anpanat he nati' sin aoken aknino natuin lasi knino, fun nane al plenat ana' plenat, sa' anteni plenat i plenat ateta mese kun!”

⁶Oke te Ana' fuat knino nane anfe utunu' fua tulu nane neu Nai Daud, natuin le in anmu'i al utunu' fua tulu neu Uisneno, ma le sin naiti nalali na'ko baki tulu hen seka neki utunu' fe'u. (

⁷Fun anbi neno nane, Nai Doëg, atoni Edom, nakaf atuku mu'it na'ko Nai Saul in anbi nane he nanokab sutais mese na'ko lasi knino.)

⁸Nalali te Nai Daud natoti Nai Ahimelekh nak, “Ai Ama ho mubela auni ai suni le nabe'i au he pake? Kesel in aplenat nane nok askeken talantia au a'fen ma anao nok manapat ma ka mu'i fa sona anteni he eki suni ai bale manuat bian.”

⁹Oke te Nai Ahimelekh natae nak, “Au ubela Nai Goliat in suni, atoni Filistin le afi ho mumate anbi Anonof Ela nane, suni nane es Efod kotin, ma'amu anbi pilu nanan. Leka hom lomi, ho maiti meki, natuin alaha nane bale manuat anbi i.” Oke te Nai Daud nak, “Suni nane suni alekot in leok le'uf kun anbi pah ok-oke, amfe kau suni nane neu kau!”

¹⁰Anbi neno nane amsa Nai Daud in naen kun na'ko Nai Saul, oke te in naen antia Nai Akhis kesel kot Gat.

¹¹Kesel Nai Akhis in ameput sin natonan Kesel Nai Akhis nak, “Ai le i ka Nai Daud fa ka, kesel anbi in pah ka? Ma ai ka neu fa in ka afi ale bife anbi tabu nane sin nabso' ma sin ansi on i, ‘Nai Saul namate musu nifun-nifun, mes Nai Daud namate musu hotun-hotun?’ ”

¹²Uab molok nane nale'un Nai Daud in tenab, ma in anfani namtau anae le'uf neu Kesel Nai Akhis.

¹³Es nane te, Nai Daud in moeson anbi pah amfaun on amaunut. Leka sin hen heke in, in anmoeson onle namaunu; in ankao eno kot ma in namautu in hape ansai neu in konon.

¹⁴Oke te Nai Akhis nak neu in ameput sin nak, “Ai hi ka mit fa neu atoni nane namaunu? Nansa' hi meki in nem neu i?

¹⁵Ai fe anlabu atoni alilabut anbi au kuan, talantia hi meki amteni atoni amaunut mese neu au ume?”