Read Uab Meto 1 SAMUEL 22 Bible Online

1 SAMUEL 22 - Uab Meto bible

1 SAMUEL 22

¹Nalali te Nai Daud nasaitan kot Gat ma natolo' anbi nuat anhaumak Adulam. Leka in tataf sin ma ale in ume nanan sin anen nak in anbi bale nane, sin nem neu in.

²Onane amsa ale atoni asusat, ma ale atoni le natus, ma ale atoni le nekan kan malin fa, sin al-al sin nabua nok Nai Daud, ma Nai Daud anfani ahel lanan neu sin. Fun le natuin Nai Daud sin amfauken oni atoni natun ha.

³Na'ko nuat nane Nai Daud in anao neu Mizpa anbi Moab ma in nak neu kesel pah Moab nak, “Mufetin kau fa Usi he ho ate au Ama ma au Aina natua nok ko Usi, talantia ho ate au uhin Uisneno In lomin neu kau.”

⁴Oke te in neki in Amaf ma in Ainaf neu kesel Moab, ma sin natua anbi bale nane leka Nai Daud in natolo' anbi nuat.

⁵Anbi neno mese Mafefa knino Nai Gad nem neu Nai Daud ma nak, “Kais ho mutua anbi nuat i, amano nai labah meu pah Yehuda.” Oke te Nai Daud in anao ma antam neu nasi Keret.

⁶Anbi neno mese Nai Saul fe in antoko anbi hau suf-me un anbi Tubu Gibea tunan; in ana' in suni ma ale in to meo nakaf anhake anfun natef nan in. Leka in anen nak Nai Daud nok in amnokten sin bale tolo' nane ka natolo' anteni fa natuin sin nahin nalalien,

⁷in nak neu ale in to meo nakaf sin nane nak, “Amnen nai, hoi ale atoni Benyamin! Ai Nai Daud nane of anfe neu ki lene meto ma lene tua min kase ka? Ai of in naiti ki ok-oke hem fani to meo nakaf anbi in to meo sin ka?

⁸Es nane te hi malokin lasi hem laban kau ma katit fa es amsa he naton neu kau nak au anah in neknon kun amsa anpesi nalali Nai Daud nane ka? Katit fa es amsa anbi ki le he natenab au aok ai he naton neu kau nak Nai Daud, au to meo nane, anbi tabu le i anpao menuan he namate kau, ma nok au anmone Nai Yonatan in neknon anhatani Nai Daud neu he namate kau!”

⁹Onane te Nai Doëg nakaf apao mu'it na'ko Nai Saul in amsa anbi nane nok ale Nai Saul in to meo nakaf sin, ma Nai Doëg in nak neu Nai Saul nak, “Ho ate au it ulali Nai Daud in nem neu Nai Ahimelekh Nai Ahitub anmone anbo Nob.

¹⁰Nai Ahimelekh natoti UISNENO neu sa' le mes Nai Daud hen tao ma anmoe. Ma anesi na'ko nane te anfe neune bukae amsa ma oke te anfe neune Nai Goliat in suni, atoni Filistin nane.”

¹¹Oke te Kesel Nai Saul anlelu no'en Ana' Fuat Knino Nai Ahimelekh ma ale in-ini sin le anfani Ana' fuat knino anbi Nob; ma sin al-al sin nem neu Kesel Nai Saul.

¹²Nai Saul nak neu Nai Ahimelekh nak, “Amnen nai, hoi Nai Ahitub anmone!” Nai Ahimelekh natae nak, “Au es kau i, Usi.”

¹³Nai Saul natoti neune nak, “Nansa' ho malokin lasi mok Nai Daud hem laban kau ka? Nansa' hom fe neune utunu' ma hom fe neune suni ma ho mutoti Uisneno neu Nai Daud in monin? Muni i in anlaban kau ma in fe anpao menuan he namate kau.”

¹⁴Oke te Nai Ahimelekh natae nak, “Mes ai Nai Daud nane ka Usi to meo nakaf le in es na'ki neu ko anesi na'ko ale to meo sin. In amsa nane Usi ho moen fe'u, in amsa anakaf apaot neu Usi hit aok, ma in amsa ale atoni anbi Usi ho sonaf nanan antola in matani.

¹⁵Namneo, ho ate au toti ulali Uisneno, neu in monin, mes i ka hae ahunut fa au tao ma moe lasi nane. Neu lasi malokin lasi hem laban ko Usi, kaisa Usi hom heke ho ate kau ai es amsa anbi au ume nanan sin. Ho ate au ka uhin fa sa'-sa' neu lasi nane!”

¹⁶Mes kesel nak, “Hoi Ahimelekh! Ho ma ho ume nanan sin mes hi he mate.”

¹⁷Oke te in naplenat ale to meo le anhake anahumak in nak, “Neu nai, mimate ale Ana' fuat knino UISNENO nane nai! Sin malokin nalali lasi nok Nai Daud. Sin nahin neu Nai Daud naen nafetin in aon mes sin ka naton kau fa lasi nane.” Mes ale to meo nane sin kan lomi fa he namate UISNENO In Ana' fuat knino sin.

¹⁸Es nane te Nai Saul nak neu Nai Doëg nak, “Neu nai lab! Ho es meki nom mumate sin!” Onane te Nai Doëg in anfonat anao mat ma namate ale Ana' fuat knino nane. Anbi neno nane in namate Ana' fuat knino bo'fanu am nim le sin anpake sobalu bet kone Efod.

¹⁹Nai Saul amsa anfe plenat he namate ale Nob tuaken ok-oke, kot Ana' fuat knino nane, atoni, ma bife, li'ana ma li'ana le fe ansusu, ma bijae amsa, bikase luke mnanu ma bibi kase, ale nane ok-oke namate nani sin.

²⁰Al Nai Abyatar, Nai Ahimelekh in anmone mese in es nafetnon na'ko lasi maten nane. In naen neu Nai Daud,

²¹oke te natonan Nai Daud nak Nai Saul namate nalali UISNENO In Ana' fuat knino sin.

²²Onane te Nai Daud nak neune nak, “Leka au it Nai Doëg anbi nane bi neno nane, au uhin nak namneo in es of naton lasi nane neu Nai Saul. Es nane te au es asutai lasi maten ho Ama ume nanan sin ok-oke.

²³Mubalah mok kau ma kais mumtau. Nai Saul anlomi he namate ko, mes in lomi he namate kau amsa. Es nane te, ho of aomina ko anbi au bale.”