Read Uab Meto 1 SAMUEL 23 Bible Online

1 SAMUEL 23 - Uab Meto bible

1 SAMUEL 23

¹Anbi neno mese natonan Nai Daud nak atoni Filistin nem nape' kot Kehila ma antet nan ane kase le fe anlefi nalali.

²Oke te in natoti UISNENO nak, “Au mes he nao he maken ma manua ok atoni Filistin ka?” UISNENO nakua a'an nak, “Leko, hom nao nai maken ma manua mok sin ma mufetin Kehila tuaken.”

³Mes Nai Daud in amnokten nak neune nak, “Fe hit atbi i, atbi Yehuda, hit tamtau anae le'uf; sa' anteni leka hit mes het nao he tape' to meo Filistin anbi Kehila.”

⁴Es nane te haef mese anteni Nai Daud antoti UISNENO In alomin, ma UISNENO natae nak, “Kais mumtau. Mupe' ma amken kot Kehila, natuin to meo Filistin nane Au of una'at sin neu ko.”

⁵Ma Nai Daud in anao nok in amnokten neu Kehila ma oke te sin nape' ma anken kot nane ma namate atoni Filistin namfau, ma nasik nani sin mu'it. Onle nane Nai Daud nafetin kot nane sin tuaken.

⁶Leka Nai Abyatar Nai Ahimelekh anmone naen neu Nai Daud, ma in nok Nai Daud neu Kehila, in amsa neki Efod.

⁷Leka natonan Nai Saul nak Nai Daud es Kehila, Nai Saul natenab nak, “Uisneno nana'at nalali Nai Daud neu kau. Nakekat nan in natuin in antam nalali neu kot nanan le mabaki lape ma ma'eno baki lape.”

⁸Oke te Nai Saul neki in to meo sin ma sin anfen ma anao neu Kehila he niusnan Nai Daud nok ale in amnokten.

⁹Mes Nai Daud in nahin nalali neu Nai Saul natenab amle'ut neu in. Es nane te in nak neu Ana' Fuat Knino Nai Abyatar nak, “Ho meki Efod nane aum meu i.”

¹⁰Oke te Nai Daud in onen nak, “Koi UISNENO, Uisneno atoni Israel, au nen nak Nai Saul he nem neu Kehila ma he nale'un kot nane natuin Ho ate kau.

¹¹Lasi le au nen nane namneo ka? Koi UISNENO, Uisneno atoni Israel, amnek mumnau kau fa ma muton neu kau fa lasi nane.” UISNENO natae nak, “Namneo, Nai Saul in of nem.” Oke te Nai Daud natoti anteni nak, “Ai of Kehila tuaken nana'at kau nok au amnokten neu Nai Saul ka?” Ma UISNENO natae nak, “Namneo.”

¹³Oke te Nai Daud nok in amnokten oni atoni 600, sin nasaitan Kehila nok lab-lab ma sin anao naoinsok na'ko bale mese anao neu bale bian. Leka Nai Saul in anen nak Nai Daud naoinson nalali na'ko Kehila, onane te Nai Saul in ka nanaoba fa in salit he nao he nale'un Kehila.

¹⁴Oke te Nai Daud natolo' anbi ale nuat anbi neten mnela hufui Zif. Nai Saul anli'u Nai Daud piut, mes UISNENO ka nana'at fa Nai Daud neu Kesel Nai Saul.

¹⁵Maski onane Nai Daud namtau amsa natuin Nai Saul ansali he namate in. Anbi neno mese Nai Daud anbi Hores anbi mnela hufui Zif.

¹⁶Nai Yonathan in anao neu mnela nane he nahelan Nai Daud nekan nak Uisneno of naneo ma nahafo in.

¹⁷Nai Yonathan nak neu Nai Daud nak, “Kais ho mumtau, ho of ka mofu fa neu au Ama in niman. Au Ama nahin namneo-namneo nak ho of es amfani Kesel Israel ma au of upeni toko plenat ka namnes fa nok ko.”

¹⁸Nalali te Nai Daud ma Nai Yonathan sin nua sin nahakeb lasi fef bela anbi UISNENO In human In matan. Oke te Nai Yonathan anfani neu in ume ma Nai Daud nabalah anbi Hores.

¹⁹Nalali te atoni fauk-fauk na'ko Zif sin anao neu Nai Saul anbi Gibea ma sin nak, “Nai Daud in natolo' es hai bale anbi nuat-nuat anhaumak Hores anbi Tubu Hakhila tunan anbi bian a'ne'u mnela hufui Yehuda.

²⁰Hai mihin, neu Usi hom lomi hem heke in; es nane te amkoenom aum nai Usi meu hai bale. Haim haek mat anbi lasi i ma namneo of Usi amheke man in.”

²¹Nai Saul natae nak, “So nati' UISNENO anfe tetus neu ki natuin hi moe lasi alekot neu kau!

²²Amnao nai ma mitnu' milek-leko; amtae nok namneo-namneo neu Nai Daud in esme ma sekau es nit Nai Daud anbi nane. Au nen ulali neu in mahin le'uf kun.

²³Es nane te amtae nai nok amnutu ale nuat-nuat le afi in natolo' anbine, ma amfani aim amteni he miton neu kau lasi nane. Oke te au of ok ki antao bua', ma leka in fe es bale nane, namneo of au ami in, maski Yehuda ok-oke of au pukai ani!”

²⁴Nalali te sin anfen ma anao nahunun Nai Saul anbi Zif. Anbi tabu nane Nai Daud nak neu in amnoten anbi mnela hufui Maon, anbi anonof maninib bian a'ne'u mnela hufui Yehuda.

²⁵Nai Saul nok in to meo sin nem he nami Nai Daud, mes atonas natonan Nai Daud neu lasi nane, talantia Nai Daud in anao neu tubu fatu anbi mnela hufui Maon ma in natua anbi nane. Leka Nai Saul in nen lasi nane, nok labah in anli'u Nai Daud.

²⁶Nai Saul nok in to meo sin anao nok tubu aon bian i, ma Nai Daud nok in amnokten sin anao nok aon bian nane. Nai Daud nok in amnokten sin anmanap le'-le'uf he nahunun nafetnon na'ko Nai Saul le aniusnan sin ma hen heke sin.

²⁷Mes naskeke te atoni mese nem ma natonan Nai Saul nak, “So nati' Usi hom fani nai nok lab-labah! Atoni Filistin sin nem nape' ma anken hit pah!”

²⁸Oke te Nai Saul nasnasab mali'ut neu hen li'u Nai Daud ma in anao anfani hen maken ma anlaban atoni Filistin. Es nane te bale nane antek nak Tubu Fatu Fetin.