Read Uab Meto 1 SAMUEL 24 Bible Online

1 SAMUEL 24 - Uab Meto bible

1 SAMUEL 24

¹Na'ko bale nane Nai Daud in anao neu En-Gedi, ma atolo' anbi ale nuat.

²Leka Nai Saul fe anfani nem na'ko makenat anlaban atoni Filistin, in napeni hanaf nak Nai Daud in es amnela hufui anhaumak En-Gedi.

³Nok labah Nai Saul anbeti nan to meo makenat alekot abainesit nifun tenu na'ko Israel ok-oke, oke te in anfen ma anao ma nami Nai Daud ma in amnokten anbi neno saen Tubu Fatu Bibi Nasi.

⁴Ma Nai Saul in nem anhaumak o'of bibi kase fauk-fauk anbi lanan in ninen. Anbi nane anmu'i nuat mese amsa, ma Nai Saul antam hen holok haen. Mes anbi nuat nane Nai Daud nok in amnokten amsa sin anbi nuat nanan muni le'uf.

⁵Oke te Nai Daud in amnokten nak neu Nai Daud nak, “Neno i neno alekot neu ko Ama! Ai UISNENO ka nak neu ko fa Ama nak on i, “Ho musu Au of una'at ani neu ko, amtao ma amoe natuin ho lomim neu in nai!’ ” Nalali te Nai Daud anfen ma anao nok manoe le'uf neu bale Nai Saul anbine ma nok amnes-nes in anlefi nan Nai Saul in sobalu bet kone panan pisa ana' mese.

⁶Mes oke onane, Nai Daud in anaben te in nasanab natuin in anmoe nalali lasi nane.

⁷Es nane te in nak neu in amnokten nak, “So nati' UISNENO anpanat kau he nati' kais au moe amle'ut neu au Usi le UISNENO anbeti nalali. An-an es amsa ka nabe'i fa he au umenab in, natuin in kesel kun le UISNENO anbeti nani!”

⁸Onle nane Nai Daud in anfe lasi tainine neu in amnokten sin nekan, ka nafetin fa sin he namate Nai Saul. Nai Saul in anfen ma nasaitan nuat nane, ma in anao anfini kun.

⁹Nai Daud amsa anpoi na'ko nuat nane ma ankoa natuin Nai Saul kotin nak, “Koi au Usi!”

¹⁰Ma Nai Saul in nasneku oke te Nai Daud anli'tu ma nabes ma nak, “Nansa' au Usi hom nen uab molok atoni amfaun le nak ho ate kau he ule'un au Usi ko?

¹¹Neno i au Usi mit meki ho matam nak UISNENO nana'at nalali au Usi ko neu kau anbi nuat nanan. Ma es na'ko au amnokten anfuli nalali kau he umate ko Usi, mes au tite lasi nane. Ho ate au utae ak ho ate ka lomi fa he umenab au Usi le UISNENO anbeti nalali.

¹²Amkiso nai, koi au Ama! Amkiso Usi ho sobalu bet kone pisa ana' mese le ho ate ana' le i! Namneo ho ate he umate ko Usi, mes ho ate al au ketu an Usi ho sobalu bet kone pisa ana mese. Es nane te, namneo nak ho ate ka mu'i fa tenab amle'ut neu he laban ko. Usi hom li'u kau piut-piut he mumate ho ate kau, maski au ka usanab fa sa'-sa' neu au Usi ko.

¹³So nati' UISNENO In neknon kun es nafek neu sekau ka anbi hit nua kit es nasanab! So nati' UISNENO In neknon kun es anseunbanin Usi ho taos ho mo'et neu ho ate kau, mes an-ana mese amsa ho ate of ka umenab fa au Usi ko.

¹⁴Usi ho muhin mnasi un-unu sin uab nak, ‘Atoni amle'ut es antao ma anmoe lasi amle'ut!’ Es nane te ho ate of ka usanab fa neu au Usi ko.

¹⁵Amlilo mit fa Usi Israel he namate ho ate kau le i. Amkiso mit fa Usi Israel anli'u Ho ate kau piut-piut. Ho ate kau al on asu maten mese, al on asi asu an-ana' mese.

¹⁶UISNENO of anfani alef lasi neu kit anbi au Usi ma ho ate kau. So nati' In antae hit lasi i, ma anpesi ho ate ma oke te nafetin ho ate na'ko au Usi ko.”

¹⁷Leka Nai Daud namolok nalali onane te Nai Saul nak, “Ho es ko nane ka, koi Daud au anmone?” Oke te Nai Saul in ankae.

¹⁸Ma in nak neu Nai Daud nak, “Ho es amneot, ma au es asanat.

¹⁹Au lasi amle'ut neu ko hom seunbanin mulali meki lasi alekot. Anbi neno le i ho mulile mulali nak ho mutenab alekot neu kau, natuin ho ka mumate kau fa, maski nak UISNENO nana'at nalali kau neu ko.

²⁰Katit fa es le natef nok in musu mes nafetin in musu nane hen moni! Es nane te, so nati' UISNENO anfe neu ko tetus natuin ho mo'et alekot neu kau anbi neno i!

²¹Neno i au uhin nak ho of amsae kesel neu to Israel ma plenat Israel of anhake na'ki nabalah anbi ho plenat.

²²Es nane te muhakeb nai lasi fef bela ma manba'an nai neu kau anbi UISNENO In kanan, nak of ho ka mumate fa au suka ka'uf sin, ma of ho ka muneku fa kanaf na'ko au ume nanan sin!”

²³Oke te Nai Daud ansup nak in of nanaoba lasi nane. Nalali te Nai Saul anfani neu in sonaf, mes Nai Daud nok in amnokten amsa sin anfani neu sin bale tolo' nanan.