Read Uab Meto 1 SAMUEL 25 Bible Online

1 SAMUEL 25 - Uab Meto bible

1 SAMUEL 25

¹Namuni ka lo fa onane te Nai Samuel anmate. To Israel ok-oke sin nabua ma natuin lasi luli besa kulut kaet nane. Nalali te sin ansub in anbi in ume anbi Rama. Namuni na'ko nane Nai Daud anao neu mnesat snaen Paran.

²Anbi kot Maon anmu'i atoni mese na'ko Nai Kaleb ume nanan, in kanan Nai Nabal. In anmu'i nain hao mu'it anhaumak kot Karmel. In atoni amu'it anae le'uf mese ma in anmu'i bibi kase 3.000 ma bibi 1.000. In fenai bi Abigail, bife ahinet ma amasat, mes in mone Nai Nabal nane nek manu' ma in amonin nahenu nok amle'ut. Anbi neno mese Nai Nabal ankateli in bibi kase sin nafun anbi Karmel.

⁴Leka Nai Daud le anbi mnela hufui, in anen lasi nane,

⁵in anlelu in anmunif bo'mese ma anao neu Karmel,

⁶he natef nok Nai Nabal ma natiaba lasi aomina na'ko Nai Daud neu in. Nai Daud anlelu sin he na'uab nak on i neu Nai Nabal, “Aomina ma halinat neu ko ma neu ho ume nanan sin ma neu ale ho mu'im.

⁷Au amnen neu ho fe amkateli ho bibi kase sin nafun. Ho muhin neu ho atukus sin le anbi hai bale, hai ka miaunu fa sin, ma sin ka naneku fa sa'-sa' es amsa leka sin fe anbi Karmel.

⁸Aiti ho mutoti mit sin, of sin naton ko neu lasi nane nak namneo onane. Es nane au ufnekan he nati' hom simo au anah sin nok alekot anbi ho ume, natuin hai aim meu ko anbi neno naek i. Amfe fa ho manekam neu ho ate-ate sin le i ma neu kau, Nai Daud ho sob leko, sa' alekot natuin kun ho lomim.”

⁹Leka sin nem antia Karmel, Nai Daud in anah sin natiaba lasi nane neu Nai Nabal onle Nai Daud anlelu sin, oke te sin anpao.

¹⁰Mes Nai Nabal nak, “Nai Daud nane sekau ka? Sekau ka es Nai Isai anmone nane? Muni le i anmui ate namfau naen na'ko in tuan.

¹¹Leka me au he aiti au utunu' ma oe mninut, ma au sisi le au uloitan ulali neu ale au akatelis sin, oke te au he fe ani ale nane oke neu atoni le au ka uhin fa in he nem na'ko me ka?”

¹²Ma oke te Nai Daud in anah sin nane anfani neu Nai Daud ma natonan Nai Daud neu ale uab molok na'ko Nai Nabal nane.

¹³Leka Nai Daud in anen onane te, in anfe plenat nak, “Amfutun hi suni anbi hi atnanam mese-mese nai!” Ma nok lab-labah in amnokten sin natuin in aplenat nane. Nai Daud in anfutun in suni anbi in atnanan ma anfen ma anao nok atoni oni 400, ma 200 nabalah hen panat ale sin bale sin.

¹⁴Mes Nai Nabal in ameput mese natonan bi Abigail Nai Nabal in fenai, nak on i, “Ain kato' hom nen mulalien ai fe kahaf? Nai Daud anlelu nalali in haefen na'ko mnela hufui he natiaba aomina neu hit Usi Nai Nabal, mes hit Usi na'akan sin ok-oke.

¹⁵Mes sin le nane leok le'uf neu kai. Sin ka na'aunu kai fa, ma hai sa' es amsa ka namneku fa leka hai mok sin anbi mnela hufui.

¹⁶Anbi manas ma fai sin naneo ma nahafo kai leka hai fe mituku hai bibi ma hai bibi kase anhaumak sin.

¹⁷Es nane te, hom tai nai lasi i, ma mufek nai sa' le Ain Kato' ho he moe mani. Natuin namneo of seunbanit nem neu hit Usi ma neu in ume nanan sin ok-oke. Hit Usi nane in anakan fatu anae le'uf kun talantia ka ta uab tok ne fa!”

¹⁸Oke te bi Abigail nok lab-labah in naiti utunu' pisa natun nua ma nius pasu nahenu nok tua mina mtasa, bibi kase nim le anse'i sin, ane kase seka kilo bo'mese am hitu ma tua min kase fuaf ki' natun mese ma bub fua mina pisa natun nua. Nasaeb ale nane ok-oke neu ale bikase luke mnanu sin.

¹⁹Oke te in nak neu in ameput sin nak, “Him nao mihunun kau; of au utuin ki.” Mes in ka naton fa sa'-sa' neu in mone.

²⁰Bi Abigail ansae neu in bikase luke mnanu, ma leka in nem antia lan tali'af anbi tubu aon bian, in natef nok Nai Daud ma in amnokten le fe nem an ali in.

²¹Anbi tabu nane Nai Daud fe natenab nak, “Fun lum-luman kun au panat ma pao atoni nane in amu'in anbi mnela hufui i! Katit fa sa'-sa' es le he namneku na'ko in amu'in; ma neno i in anseunbanin au lasi alekot neki lasi amle'ut!

²²So nati' Uisneno namate kau leka au ka umate fa ale atoni le anbi bale nane nahunu na'ko manas fe kan bol fa!”

²³Leka bi Abigail in nit Nai Daud, in ansanu lab-labah na'ko in bikase luke mnanu oke te in anli'tu anbi Nai Daud in haen,

²⁴ma nak neu Nai Daud nak, “Koi au Usi, so amnen kau fa! So mautu nai sanat nane ho ate es asutai ani!

²⁵Kaisa au Usi mutenab Nai Nabal, atoni ka maota nane! In atoni amonot papmese onle in kanan in otan. Ho ate kau au ka it fa au Usi ho haefen le hom lelu sin.

²⁶Uisneno nakain nalali au Usi na'ko hom lefi lasi ma amseunbanin ma mumate au Usi ho musu-musu sin. Ma neno i koi au Usi, natuin UISNENO amonit, ho ate au sup, so nati' monit na'ko ale su Usi ho musu sin ma sekau le anlomi he nale'un au Usi so nati' sin papmese on Nai Nabal in monin.

²⁷Amsimo nai amut le ho ate au eki le i neu au Usi ko, ma neu au Usi ho amnokten.

²⁸Muneku ho ate au tanhais sin, UISNENO of nasaeba au Usi ho sufam sin anfani kesel neu Israel, natuin au Usi ho maken neu UISNENO; ma au Usi of ho ka moe fa amle'ut anbi ho monim nanan.

²⁹Ma leka onle es he nale'un au Usi ma nami he namate au Usi, ma namneo UISNENO of naneo ma nahafo au Usi ko onle bale maupa in usin anpanat ma anpao in. Mes UISNENO of anpolin naskotun au Usi ho musu-musu sin, onle anpolin naikotin sin na'ko tani finu in alun.

³⁰UISNENO of anmoe ale lasi alekot le In anba'an nani neu au Usi, ma ka lo fa anteni of In han ba'an neu au Usi he nasaeba ko hem fani kesel neu to Israel.

³¹Anbi tabu nane au Usi of ho mumnau nak au Usi ka mumate fa natuin kan mu'if fa in lasi ai ka mufek fa lasi al mumnau ho aom talantia au Usi ho nekam ka nanu'on fa ai kam tofom fa. Ma leka UISNENO anfe tetus neu au Usi ko, so nati' kaisa amnikan ho ate bife kau.”

³²Oke te Nai Daud nak neune nak, “Pules ma liatas neu UISNENO, Uisneno atoni Israel, le ansonu ko he mutef mok kau anbi neno i!

³³Ma mapules neu ho nek mahinem ma mapules neu ko amsa natuin hom eka ma amtu' man kau he nati' kais au umate ma lefi kuk au lasi.

³⁴UISNENO an eka ma antu' nan kau he nati' kais au moe amle'ut neu ko. Anbi UISNENO, Uisneno atoni Israel amonit, leka ho ka aum fa lab he mueku ma mutef mok kau, namneo ale Nai Nabal in amnokten anmate nalali ok-oke anbi nok-noka nahunu na'ko manas fe kan bol fa!”

³⁵Oke te Nai Daud ansimo ale sa' le bi Abigail in neki sin neune, oke te Nai Daud nak neune nak, “Amfani nai neu ho ume ma kais mumtau. Ho han totis nane au simo ulali.”

³⁶Leka bi Abigail anfani neu in mone Nai Nabal, anmu'i fesat anaek anbi in ume, onle kesel in fesat. Ma natuin Nai Nabal anmafu ma namlil nam'oke, in fenai ka naton neune fa sa'-sa' amsa talantia noka fa anfani.

³⁷Ma noka fa onane, leka Nai Nabal kan mafu anteni fa, in naton neune antom ale lasi amle'ut nane. Oke te Nai Nabal nekan nas'unu ma in asnasan an ek ma in aon an ole ok-oke.

³⁸Oni neno bo'mese namuni te UISNENO an ek Nai Nabal asnasan talantia Nai Nabal anmate.

³⁹Leka Nai Daud in nen nak Nai Nabal in anmate, onane te in nak, “Pules ma liatas neu UISNENO! In anseunbanin nalali si'ut ma akan le Nai Nabal anmoe neu kau, ma In an eka ma antu' nan In ate kau le i he moe amle'ut.” Oke te Nai Daud ansonu haef neu bi Abigail ma antoti in hen fani in fenai.

⁴⁰Ma Nai Daud in haefen nane sin nem antia bife nane anbi Karmel ma sin nak neune nak, “Nai Daud anlelu kai he aim meu ko Ain Kato', natuin in lomi hen toti ko he hom fani in fenai.”

⁴¹Ma bi Abigail in anfen ma anli'tu ma in nak, “Au le i Nai Daud in ate kau, au lomi he nati' au boe ale in ate sin haeken.”

⁴²Nalali te in na'ikab nok lab-lab. Ma in ansae neu in bikase luke mnanu ma in bife ameput nim nok in, fun anfen ma anao natuin Nai Daud in haefen, ma in anfani Nai Daud in fenai.

⁴³Nahunu na'ko nane Nai Daud in nakato nalalien nok bi Ahinoam na'ko Yizreel, ma onane bi Abigail anfani kun in kato amsa.

⁴⁴Mes Nai Saul anfe nalali in anfeto bi Mikhal, Nai Daud in fenai nane, neu Nai Palti Nai Lais anmone na'ko kot Galim anfani kun in fenai.