Read Uab Meto 1 SAMUEL 26 Bible Online

1 SAMUEL 26 - Uab Meto bible

1 SAMUEL 26

¹Anbi neno mese atoni-atoni na'ko Zif sin nem neu Nai Saul anbi Gibea ma naton neune nak Nai Daud in fe natolo' anbi Tubu Hakhila anbi mnela hufui Yehuda in ninen.

²Oke te nok lab-labah Nai Saul in anfen ma anao ma to meo ai solalus nifun tenu na'ko Israel natuin in an ali mnela hufui Zif he nami Nai Daud.

³Nai Saul nahakeb in um-ume anbi lanan ninen anhaumak Tubu Hakhila nane. Ma Nai Daud in anbi mnela hufui, in anen nak Nai Saul natuin in fun in nem antia mnela hufui.

⁴Oke te in amsa ansonu atoni atnu'us, ma in nahin nok namneo nak Nai Saul in es bale nane.

⁵Ma nok lab-labah in anfen ma anao neu Nai Saul in um-ume ma anbi nane in napeni Nai Saul in um-ume le Nai Saul antup anbine anhaumak Nai Abner Nai Ner anmone. Nai Saul in um-ume es atnan le'uf, ma ale in solalus sin nahakeb sin um-ume funam natef nan in.

⁶Nalali te Nai Daud natoti neu Nai Ahimelekh atoni Het nane, ma neu Nai Abisai Nai Yoab in biaf (sin ainaf bi Zeruya) nak, “Sekau nabe'i hen sanu nok kau neu Nai Saul in um-ume nanan?” Nai Abisai natae nak, “Au lomi!”

⁷Ma anbi fai nane Nai Daud ma Nai Abisai sin anhataniok ma ma sin antam neu um-ume nane nanan ma sin nit Nai Saul fe antup anbi um-ume atnanan, ma in suni nateta anbi nain anhaumak in anakan. Ma Nai Abner ma in solalus sin antup anfun natef nan Nai Saul.

⁸Oke te Nai Abisai nak neu Nai Daud nak, “Uisneno nana'at nalali ko ho musu neu ho nimam nanan anbi fai i. Mufetin kau he au upau in eki in auni kun anbolan bati in aon antia nain, au umate in al upau in hae mese fun ka hae nua fa!”

⁹Mes Nai Daud natae nak, “Kais ho moe sa'-sa' neu in! UISNENO of anfe kasat neu atoni le anmoe amle'ut neu kesel le In anbeti nani.

¹⁰Anbi UISNENO amonit, au uhin nak UISNENO In neknon kun of namate Nai Saul, leka in tabu antia, ai kalu of in anmate anbi makenat in nanan.

¹¹So nati' UISNENO nakain kau he umate kesel le In anbeti nalali! Maiti nai in anmi ma in bale oe, oke te hit atnao!”

¹²Onane te Nai Daud in naiti nan Nai Saul in suni ma in boit oe le nabelak anbi aon bian antom in anakan. Katit fa es amsa le he nit lasi nane ai he nahin sa' le anbol nalali, ai he naskek amsa, natuin UISNENO anmoe sin antup anmate.

¹³Oke te Nai Daud anlak anfani neu nonof bian anteni antia tubu tunan, talantia in na'lo na'ko Nai Saul in um-ume.

¹⁴Oke te Nai Daud ankoa Nai Abner ma Nai Saul in solalus sin nak, “Abner! Hom nen au hanak ai kahaf?” Nai Abner amsa ankoa nak, “Ho sekau ko ka es amkoa-koa nane?”

¹⁵Nai Daud natae nak, “Abner, ai ho ka atoni matain le'uf ko ka anbi Israel? Nansa' ho kam panat fa ho Usi, ho Kesel? Fe le i atoni antaman ho um-ume he namate ho Usi.

¹⁶Ho ka mube'i amteni fa he munaoba ho mepu, Abner! Nok UISNENO amonit, hi al-al ki oke mes he mate, natuin hi kam panat fa hi Usi, Kesel le UISNENO anbeti nalali in. Aiti hom kiso mit! Kesel in auni esme ka? Ma kesel in boit oe es me le nabel'on anbi in aon bian anbi in anakan?”

¹⁷Nai Saul nahin Nai Daud in hanan ma in natoti in nak, “Daud, Au anmone, ho es ko nane ka?” Onane te Nai Daud natae nak, “Namneo, koi au Usi.”

¹⁸Oke te in nak anteni nak, “Nansa' Usi talantia fe hom li'u kau piut-piut? Ho ate au usanab sa' ka?

¹⁹Koi Usi, amnen fa ho ate au hanak i. Kalu onle UISNENO es anlelu au Usi ko he nati' hom laban kau, fua tulu mese of nabe'i nasanut In to'as neu ho ate kau. Mes kalu alelut le anlelu au Usi ko nane atoni pah pinan kun, so nati' UISNENO ansukat in! Fun natuin sin mo'et nane, hom li'u ho ate kau ma au poi u'ko UISNENO In pah fef bela, ma nok a'seke au mes he nao eu pah a'teta ma anbi nane ho ate kau mes ululi ma ubes neu ale uisneno teta bian.

²⁰Kaisa mufetin ho ate kau he au mate bi atoni bian sin pah, u'lo u'ko UISNENO. Maota sa' ka neu Kesel Israel le anli'u ate mese onle ho ate kau le i? Maota sa' ka neu Kesel Israel le in anfen nem he namate asi asu mese onle ho ate kau le i? Maota sa' ka neu Kesel Israel le anli'u ate mese onle atoni sin anli'u manu fui mese anbi nasi nanan?”

²¹Oke te Nai Saul in natae nak, “Au moe ulali sanat. Amfani aum Nai Daud, koi Au anmone ko! Au of ka moe teni fa amle'ut neu ko natuin hom lomi he fe au moni anbi fai afinit nane. Au taos ma au mo'et nane namneo-namneo lo lasi mono kun. Namneo-namneo au akman ulali!”

²²Mes Nai Daud natae nak, “Ho auni es i Usi, amlelu ho solalus mese he nem neu i he naiti nafani Usi ho auni.

²³UISNENO of anfe tetus neu sekau le na'ki nok amneot. Natuin maski neno i UISNENO nana'at au Usi neu ho ate kau, mes au ka moe fa amle'ut neu au Usi ko, Kesel le UISNENO anbeti nalali in.

²⁴Es nane te, onle au fe lomi he Usi fe ho moni anbi neno i, onane amsa so nati' UISNENO naneo ma nahafo ho ate kau ma nafetin kau na'ko ale lasi amle'ut sin!”

²⁵Oke te Nai Saul nak neu Nai Daud nak, “So nati' UISNENO anfe neu ko tetus, koi Au anmone! Ho of mis anbi ale ho mepu sin!” Oke te Nai Daud in anao anfini kun, ma Nai Saul amsa in anfani kun neu in sonaf.