Read Uab Meto 1 SAMUEL 28 Bible Online

1 SAMUEL 28 - Uab Meto bible

1 SAMUEL 28

¹Namuni na'ko nane te atoni Filistin nabuab sin solalus sin hen maken ma anlaban Israel, ma Nai Akhis nak neu Nai Daud nak, “Ho muhin lek-leko nak ho ma ho amnokten hi mes ampesi kau anbi makenat.”

²Nai Daud natae nak, “Namneo onen, Usi of ho mit lek-leko sa' le ho ate kau he moe nane.” Oke te Nai Akhis nak, “Leko! Au aiti ko hom fani au apaot neu au aok anbi ale tabu.”

³Nai Samuel anmate nalali ma to Israel ok-oke ankae ma ankulu neune ma ansub in anbi Rama, anbi in kot kun. Anbi neno ahunut Nai Saul anli'u ale atoni akiso munif ma mnane amno'en smanaf amates anbi Israel.

⁴Ma leka solalus Filistin sin nabua ma nahakeb sin um-ume anhaumak kot Sunem, Nai Saul amsa in anibun nabuab atoni Israel, ma sin nahakeb sin um-ume anbi Tubu Gilboa.

⁵Leka Nai Saul in nit solalus Filistin nane, in namtau anae le'uf kun.

⁶Oke te in antoti lekat lulut na'ko UISNENO, mes UISNENO ka natae fa in, leko he nao nok nanai, ai he nao nok Urim ma Tumim ai he nao nok ale Mafefa knino sin.

⁷Es nane te Nai Saul nak neu in ameput sin nak, “Hi mami kau mnane bife mese amno'en smanaf amates, ma of au nao eu in he nati' au toti lekat lulut na'ko in.” Fun sin natae nak, “Anbi En-Dor anmu'i mnane onle nane.”

⁸Oke te Nai Saul ansab in human ma anseka in bale pake he nati' es kais nahin in. Oke te in anfen ma anao nok atoni nua ma in anao antia mnane nane in ume nok fai. Ma Nai Saul nak, “Ho mo'en kau smanaf atoni amates le of au uton ko in kanan ma amtoti in he nati' in naton neu kau sa' le of hen bol neu kau.”

⁹Bife nane natae nak, “Usi ho muhin kum nok lek-leko nak Kesel Nai Saul anli'u nalali ale akiso munif ma mnane amno'en smanaf amates. Nansa' Usi hom su' kau he mule'un kau ma he mumate kau ka?”

¹⁰Oke te Nai Saul ansup nak, “Anbi UISNENO amonit, au manta'en nak of ka namate ko fa natuin ho munaoba lasi i.”

¹¹Oke te bife nane natoti neune nak, “Sekau in sman-nitun esle' au he o'en neu ko ka?” Nai Saul natae nak, “Nai Samuel in sman-nitun.”

¹²Leka bife nane in nit Nai Samuel, in ankoa ma nak neu Nai Saul nak, “Nansa' au Usi ho mumoe ho ate kau ka? Oni au Usi ko Kesel Nai Saul!”

¹³Kesel natae nak, “Kais mumtau! Ho muton neu kau sa' le ho mit!” Bife nane natae nak, “Ho ate au it sman nitu le ansae nem na'ko pah pinan.”

¹⁴Nai Saul natoti nak, “In human onme ka?” In natae nak, “Atoni mnasi mese. In ansae nem nok pake sobalu bet kone.” Oke te Nai Saul in nahin nak nane Nai Samuel, ma in anli'tu ma nabes neune.

¹⁵Nalali onane te Nai Samuel nak neu Nai Saul nak, “Nansa' ho mu'aunu kau? Nansa' ho mo'en mufani kau ka?” Nai Saul natae nak, “Au nekak namneku anae le'uf natuin atoni Filistin sin nateku kau, mes Uisneno In nasaitan nalali kau. In ka natae anteni kau fa, leko he nao nok Mafefa knino, ai he nao nok nanait. Es nane te au toti neu ko Ama, he nati' Ama muton neu kau sa' le mes au he moe ani.”

¹⁶Oke te Nai Samuel nak, “Maota sa' ka neu ho mo'en kau kalu UISNENO In nasaitan nalali ko ma In anfani ho musu?

¹⁷UISNENO anmoe nalali neu ko lasi le afi In naton nalali neu ko nao nok kau. UISNENO naiti natnaib nani plenat Israel na'ko ho nimam ma In anfe nalali neu Nai Daud.

¹⁸Natuin hom laban mulali UISNENO In aplenat ma ho kam lomi fa he mule'un atoni Amalek ma ale sin amu'in ok-oke. Es nane te UISNENO anmoe ko onle i anbi neno i.

¹⁹UISNENO of nana'at ko ma to Israel neu atoni Filistin. Ma anbi neno noka fa ho ma ho anmone sin of hi mibua mok kau; ma anesi na'ko nane te UISNENO of nana'at solalus Israel ok-oke neu atoni Filistin.”

²⁰Anbi tabu nane amsa, Nai Saul anbel anpolinon neu afu onle ken-neno antoman in, natuin in naskek ma namtau anae le'uf leka in anen Nai Samuel in uab nane. Anesi anteni te in ole anae le'uf, natuin fai mese in nanan in kan bukae fa sa'-sa' es.

²¹Mnane nane nem anhaumak Nai Daud ma in nit Nai Daud neu in nekan namneku anae le'uf; es nane te bife nane nak neune nak, “Koi au Usi, au lelnok ma unaoba sa' le Usi hom toti.

²²Es nane te, so nati' au Usi amsa amsimo ho ate au han totis; ambukae fa kle'o na'ko bukae le ho ate he ubalab he nati' nabe'i au Usi hom nao amfani.”

²³Nai Saul antite han totis bife nane ma in nak in kan lomi fa hen bukae. Mes ale in ameput sin naseke in, onane te in natuin. In anfen na'ko afu ma in antunon anbi hala.

²⁴Bife nane anlolo in bijae ana apokat nok labah ma naiti ut ma ankumu, ma anmoe utunu' le ka nok fa lalu haef.

²⁵Oke te in nabalab bukae nane neu Nai Saul ma Nai Saul in ameput sin, oke te sin anbukae. Nalali te sin anfen ma anao nani anbi fai nane amsa.